৫০৩. সত্তিগুম্বজাতকং (৭)

১৫৯. মিগলুদ্দো মহাৰাজা, পঞ্চালানং ৰথেসভো;

নিক্খন্তো সহ সেনায, ওগণো ৱনমাগমা.

১৬০. তত্থদ্দসা অৰঞ্ঞস্মিং, তক্কৰানং কুটিং কতং;

তস্সা [তস্মা (স্যা. পী. ক.)] কুটিযা নিক্খম্ম, সুৱো লুদ্দানি ভাসতি.

১৬১. সম্পন্নৱাহনো পোসো, যুৱা সম্মট্ঠকুণ্ডলো [কুণ্ডলী (স্যা. ক.)];

সোভতি লোহিতুণ্হীসো, দিৱা সূৰিযোৱ ভাসতি.

১৬২. মজ্ঝন্হিকে [মজ্ঝন্তিকে (সব্বত্থ)] সম্পতিকে, সুত্তো ৰাজা সসাৰথি;

হন্দস্সাভৰণং সব্বং, গণ্হাম সাহসা [সহসা (সী. স্যা. পী.)] মযং.

১৬৩. নিসীথেপি ৰহো দানি, সুত্তো ৰাজা সসাৰথি;

আদায ৱত্থং মণিকুণ্ডলঞ্চ, হন্ত্ৱান সাখাহি অৱত্থৰাম.

১৬৪. কিন্নু উম্মত্তৰূপোৱ, সত্তিগুম্ব পভাসসি;

দুৰাসদা হি ৰাজানো, অগ্গি পজ্জলিতো যথা.

১৬৫. অথ ত্ৱং পতিকোলম্ব, মত্তো থুল্লানি গজ্জসি;

মাতৰি ময্হং নগ্গায, কিন্নু ত্ৱং ৱিজিগুচ্ছসে.

১৬৬. উট্ঠেহি সম্ম তৰমানো, ৰথং যোজেহি সাৰথি;

সকুণো মে ন ৰুচ্চতি, অঞ্ঞং গচ্ছাম অস্সমং.

১৬৭. যুত্তো ৰথো মহাৰাজ, যুত্তো চ বলৱাহনো;

অধিতিট্ঠ মহাৰাজ, অঞ্ঞং গচ্ছাম অস্সমং.

১৬৮. কো নুমেৱ গতা [ক্ৱ নু’মে’পগতা (?)] সব্বে, যে অস্মিং পৰিচাৰকা;

এস গচ্ছতি পঞ্চালো, মুত্তো তেসং অদস্সনা.

১৬৯. কোদণ্ডকানি গণ্হথ, সত্তিযো তোমৰানি চ;

এস গচ্ছতি পঞ্চালো, মা ৱো মুঞ্চিত্থ জীৱতং [জীৱিতং (বহূসু)].

১৭০. অথাপৰো পটিনন্দিত্থ, সুৱো লোহিততুণ্ডকো;

স্ৱাগতং তে মহাৰাজ, অথো তে অদুৰাগতং;

ইস্সৰোসি অনুপ্পত্তো, যং ইধত্থি পৱেদয.

১৭১. তিন্দুকানি পিযালানি, মধুকে কাসুমাৰিযো;

ফলানি খুদ্দকপ্পানি, ভুঞ্জ ৰাজ ৱৰং ৱৰং.

১৭২. ইদম্পি পানীযং সীতং, আভতং গিৰিগব্ভৰা;

ততো পিৱ মহাৰাজ, সচে ত্ৱং অভিকঙ্খসি.

১৭৩. অৰঞ্ঞং উঞ্ছায গতা, যে অস্মিং পৰিচাৰকা;

সযং উট্ঠায গণ্হৱ্হো, হত্থা মে নত্থি দাতৱে.

১৭৪. ভদ্দকো ৱতযং পক্খী, দিজো পৰমধম্মিকো;

অথেসো ইতৰো পক্খী, সুৱো লুদ্দানি ভাসতি.

১৭৫. ‘‘এতং হনথ বন্ধথ, মা ৱো মুঞ্চিত্থ জীৱতং’’;

ইচ্চেৱং ৱিলপন্তস্স, সোত্থিং [সোত্থী (স্যা.)] পত্তোস্মি অস্সমং.

১৭৬. ভাতৰোস্ম মহাৰাজ, সোদৰিযা একমাতুকা;

একৰুক্খস্মিং সংৱড্ঢা, নানাখেত্তগতা উভো.

১৭৭. সত্তিগুম্বো চ চোৰানং, অহঞ্চ ইসীনং ইধ;

অসতং সো, সতং অহং, তেন ধম্মেন নো ৱিনা.

১৭৮. তত্থ ৱধো চ বন্ধো চ, নিকতী ৱঞ্চনানি চ;

আলোপা সাহসাকাৰা, তানি সো তত্থ সিক্খতি.

১৭৯. ইধ সচ্চঞ্চ ধম্মো চ, অহিংসা সংযমো দমো;

আসনূদকদাযীনং, অঙ্কে ৱদ্ধোস্মি ভাৰধ [ভাৰত (সী. স্যা. পী.)].

১৮০. যং যঞ্হি ৰাজ ভজতি, সন্তং ৱা যদি ৱা অসং;

সীলৱন্তং ৱিসীলং ৱা, ৱসং তস্সেৱ গচ্ছতি.

১৮১. যাদিসং কুৰুতে মিত্তং, যাদিসং চূপসেৱতি;

সোপি তাদিসকো হোতি, সহৱাসো হি [সহৱাসোপি (স্যা. ক.)] তাদিসো.

১৮২. সেৱমানো সেৱমানং, সম্ফুট্ঠো সম্ফুসং পৰং;

সৰো দিদ্ধো কলাপংৱ, অলিত্তমুপলিম্পতি;

উপলেপভযা [উপলিম্পভযা (স্যা. ক.)] ধীৰো, নেৱ পাপসখা সিযা.

১৮৩. পূতিমচ্ছং কুসগ্গেন, যো নৰো উপনয্হতি;

কুসাপি পূতি [পূতী (সী. পী.)] ৱাযন্তি, এৱং বালূপসেৱনা.

১৮৪. তগৰঞ্চ পলাসেন, যো নৰো উপনয্হতি;

পত্তাপি সুৰভি [সুৰভী (সী. স্যা. পী.)] ৱাযন্তি, এৱং ধীৰূপসেৱনা.

১৮৫. তস্মা পত্তপুটস্সেৱ [ফলপুটস্সেৱ (সী. পী.), পলপুটস্সেৱ (ক. অট্ঠ.), পলাসপুটস্সেৱ (স্যা. ক.)], ঞত্ৱা সম্পাকমত্তনো;

অসন্তে নোপসেৱেয্য, সন্তে সেৱেয্য পণ্ডিতো;

অসন্তো নিৰযং নেন্তি, সন্তো পাপেন্তি সুগ্গতিন্তি.

সত্তিগুম্বজাতকং সত্তমং.