৫০২. চূড়হংসজাতকং (৬)

১৩৩. এতে হংসা পক্কমন্তি, ৱক্কঙ্গা ভযমেৰিতা;

হৰিত্তচ হেমৱণ্ণ, কামং সুমুখ পক্কম.

১৩৪. ওহায মং ঞাতিগণা, একং পাসৱসং গতং;

অনপেক্খমানা [নাপেক্খমানা (ক.)] গচ্ছন্তি, কিং এসো অৱহিয্যসি.

১৩৫. পতেৱ পততং সেট্ঠ, নত্থি বদ্ধে সহাযতা [সহাযকা (স্যা.)];

মা অনীঘায হাপেসি, কামং সুমুখ পক্কম.

১৩৬. নাহং ‘‘দুক্খপৰেতো’’তি [দুক্খপৰেতোপি (ক.)], ধতৰট্ঠ তুৱং [তৱং (সী. পী.)] জহে;

জীৱিতং মৰণং ৱা মে, তযা সদ্ধিং ভৱিস্সতি.

১৩৭. এতদৰিযস্স কল্যাণং, যং ত্ৱং সুমুখ ভাসসি;

তঞ্চ ৱীমংসমানোহং, ‘‘পততেতং’’ অৱস্সজিং.

১৩৮. অপদেন পদং যাতি, অন্তলিক্খচৰো [অন্তলিক্খে চৰো (সী. পী.)] দিজো;

আৰা পাসং ন বুজ্ঝি ত্ৱং, হংসানং পৱৰুত্তম [পৱৰুত্তমো (ক. সী. পী.)].

১৩৯. যদা পৰাভৱো হোতি, পোসো জীৱিতসঙ্খযে;

অথ জালঞ্চ পাসঞ্চ, আসজ্জাপি ন বুজ্ঝতি.

১৪০. এতে হংসা পক্কমন্তি, ৱক্কঙ্গা ভযমেৰিতা;

হৰিত্তচ হেমৱণ্ণ, ত্ৱঞ্ঞেৱ [ত্ৱঞ্চ তং (সী.), ত্ৱঞ্চ (পী.)] অৱহিয্যসি.

১৪১. এতে ভুত্ৱা চ পিত্ৱা চ, পক্কমন্তি ৱিহঙ্গমা;

অনপেক্খমানা ৱক্কঙ্গা, ত্ৱঞ্ঞেৱেকো উপাসসি.

১৪২. কিন্নু ত্যাযং [তাযং (সী. স্যা. পী.)] দিজো হোতি, মুত্তো বদ্ধং উপাসসি;

ওহায সকুণা যন্তি, কিং একো অৱহিয্যসি.

১৪৩. ৰাজা মে সো দিজো মিত্তো, সখা পাণসমো চ মে;

নেৱ নং ৱিজহিস্সামি, যাৱ কালস্স পৰিযাযং.

১৪৪. যো চ ত্ৱং সখিনো হেতু, পাণং চজিতুমিচ্ছসি;

সো তে সহাযং মুঞ্চামি, হোতু ৰাজা তৱানুগো.

১৪৫. এৱং লুদ্দক নন্দস্সু, সহ সব্বেহি ঞাতিভি;

যথাহমজ্জ নন্দামি, দিস্ৱা মুত্তং দিজাধিপং.

১৪৬. কচ্চিন্নু ভোতো কুসলং, কচ্চি ভোতো অনামযং;

কচ্চি ৰট্ঠমিদং ফীতং, ধম্মেন মনুসাসসি.

১৪৭. কুসলঞ্চেৱ মে হংস, অথো হংস অনামযং;

অথো ৰট্ঠমিদং ফীতং, ধম্মেন মনুসাসহং.

১৪৮. কচ্চি ভোতো অমচ্চেসু, দোসো কোচি ন ৱিজ্জতি;

কচ্চি আৰা অমিত্তা তে, ছাযা দক্খিণতোৰিৱ.

১৪৯. অথোপি মে অমচ্চেসু, দোসো কোচি ন ৱিজ্জতি;

অথো আৰা অমিত্তা মে, ছাযা দক্খিণতোৰিৱ.

১৫০. কচ্চি তে সাদিসী ভৰিযা, অস্সৱা পিযভাণিনী;

পুত্তৰূপযসূপেতা, তৱ ছন্দৱসানুগা.

১৫১. অথো মে সাদিসী ভৰিযা, অস্সৱা পিযভাণিনী;

পুত্তৰূপযসূপেতা, মম ছন্দৱসানুগা.

১৫২. কচ্চি তে বহৱো পুত্তা, সুজাতা ৰট্ঠৱড্ঢন;

পঞ্ঞাজৱেন সম্পন্না, সম্মোদন্তি ততো ততো.

১৫৩. সতমেকো চ মে পুত্তা, ধতৰট্ঠ মযা সুতা;

তেসং ত্ৱং কিচ্চমক্খাহি, নাৱৰুজ্ঝন্তি [নাৱৰজ্ঝন্তি (ক. সী. পী.)] তে ৱচো.

১৫৪. উপপন্নোপি চে হোতি, জাতিযা ৱিনযেন ৱা;

অথ পচ্ছা কুৰুতে যোগং, কিচ্ছে [কিচ্চে (সী. স্যা. পী.)] আপাসু [আৱাসু (স্যা.), আপদাসু (ক.)] সীদতি.

১৫৫. তস্স সংহীৰপঞ্ঞস্স, ৱিৱৰো জাযতে মহা;

ৰত্তিমন্ধোৱ [নত্তমন্ধোৱ (সী. পী.)] ৰূপানি, থূলানি মনুপস্সতি.

১৫৬. অসাৰে সাৰযোগঞ্ঞূ, মতিং ন ত্ৱেৱ ৱিন্দতি;

সৰভোৱ গিৰিদুগ্গস্মিং, অন্তৰাযেৱ সীদতি.

১৫৭. হীনজচ্চোপি চে হোতি, উট্ঠাতা ধিতিমা নৰো;

আচাৰসীলসম্পন্নো, নিসে অগ্গীৱ ভাসতি.

১৫৮. এতং মে উপমং কত্ৱা, পুত্তে ৱিজ্জাসু ৱাচয [ঠাপস (স্যা. ক.)];

সংৱিৰূড়্হেথ মেধাৱী, খেত্তে বীজংৱ [খেত্তবীজংৱ (সী. পী.)] ৱুট্ঠিযাতি.

চূড়হংসজাতকং ছট্ঠং.