৫০১. ৰোহণমিগজাতকং (৫)

১০৪. এতে যূথা পতিযন্তি, ভীতা মৰণস্স [মৰণা (স্যা. পী.), মৰণ (ক.)] চিত্তক;

গচ্ছ তুৱম্পি মাকঙ্খি, জীৱিস্সন্তি তযা সহ.

১০৫. নাহং ৰোহণ [ৰোহন্ত (সী. পী.), ৰোহন (স্যা.)] গচ্ছামি, হদযং মে অৱকস্সতি;

ন তং অহং জহিস্সামি, ইধ হিস্সামি জীৱিতং.

১০৬. তে হি নূন মৰিস্সন্তি, অন্ধা অপৰিণাযকা;

গচ্ছ তুৱম্পি মাকঙ্খি, জীৱিস্সন্তি তযা সহ.

১০৭. নাহং ৰোহণ গচ্ছামি, হদযং মে অৱকস্সতি;

ন তং বদ্ধং [বন্ধং (ক.)] জহিস্সামি, ইধ হিস্সামি জীৱিতং.

১০৮. গচ্ছ ভীৰু পলাযস্সু, কূটে বদ্ধোস্মি আযসে;

গচ্ছ তুৱম্পি মাকঙ্খি, জীৱিস্সন্তি তযা সহ.

১০৯. নাহং ৰোহণ গচ্ছামি, হদযং মে অৱকস্সতি;

ন তং অহং জহিস্সামি, ইধ হিস্সামি জীৱিতং.

১১০. তে হি নূন মৰিস্সন্তি, অন্ধা অপৰিণাযকা;

গচ্ছ তুৱম্পি মাকঙ্খি, জীৱিস্সন্তি তযা সহ.

১১১. নাহং ৰোহণ গচ্ছামি, হদযং মে অৱকস্সতি;

ন তং বদ্ধং জহিস্সামি, ইধ হিস্সামি জীৱিতং.

১১২. অযং সো লুদ্দকো এতি, লুদ্দৰূপো [ৰুদ্দৰূপো (সী. পী.)] সহাৱুধো;

যো নো ৱধিস্সতি অজ্জ, উসুনা সত্তিযা অপি [মপি (সী. স্যা. পী.)].

১১৩. সা মুহুত্তং পলাযিত্ৱা, ভযট্টা [ভযট্ঠা (পী.)] ভযতজ্জিতা;

সুদুক্কৰং অকৰা ভীৰু, মৰণাযূপনিৱত্তথ.

১১৪. কিন্নু তেমে মিগা হোন্তি, মুত্তা বদ্ধং উপাসৰে;

ন তং চজিতুমিচ্ছন্তি, জীৱিতস্সপি কাৰণা.

১১৫. ভাতৰো হোন্তি মে লুদ্দ, সোদৰিযা একমাতুকা;

ন মং চজিতুমিচ্ছন্তি, জীৱিতস্সপি কাৰণা.

১১৬. তে হি নূন মৰিস্সন্তি, অন্ধা অপৰিণাযকা;

পঞ্চন্নং জীৱিতং দেহি, ভাতৰং মুঞ্চ লুদ্দক.

১১৭. সো ৱো অহং পমোক্খামি, মাতাপেত্তিভৰং মিগং;

নন্দন্তু মাতাপিতৰো, মুত্তং দিস্ৱা মহামিগং.

১১৮. এৱং লুদ্দক নন্দস্সু, সহ সব্বেহি ঞাতিভি;

যথাহমজ্জ নন্দামি, মুত্তং দিস্ৱা মহামিগং.

১১৯. কথং ত্ৱং পমোক্খো [কথং পমোক্খো (সী. পী.), কথং তে পৰোক্খো (?)] আসি, উপনীতস্মি জীৱিতে;

কথং পুত্ত অমোচেসি, কূটপাসম্হ লুদ্দকো.

১২০. ভণং কণ্ণসুখং ৱাচং, হদযঙ্গং হদযস্সিতং;

সুভাসিতাহি ৱাচাহি, চিত্তকো মং অমোচযি.

১২১. ভণং কণ্ণসুখং ৱাচং, হদযঙ্গং হদযস্সিতং;

সুভাসিতাহি ৱাচাহি, সুতনা মং অমোচযি.

১২২. সুত্ৱা কণ্ণসুখং ৱাচং, হদযঙ্গং হদযস্সিতং;

সুভাসিতানি সুত্ৱান, লুদ্দকো মং অমোচযি.

১২৩. এৱং আনন্দিতো হোতু, সহ দাৰেহি লুদ্দকো;

যথা মযজ্জ নন্দাম, দিস্ৱা ৰোহণমাগতং.

১২৪. ননু ত্ৱং অৱচ [অৱচা (সী. পী.)] লুদ্দ, ‘‘মিগচম্মানি আহৰিং’’;

অথ কেন নু ৱণ্ণেন, মিগচম্মানি নাহৰি.

১২৫. আগমা চেৱ হত্থত্থং, কূটপাসঞ্চ সো মিগো;

অবজ্ঝি তং [অবজ্ঝি তঞ্চ (পী.)] মিগৰাজং, তঞ্চ মুত্তা উপাসৰে.

১২৬. তস্স মে অহু সংৱেগো, অব্ভুতো লোমহংসনো;

ইমঞ্চাহং মিগং হঞ্ঞে, অজ্জ হিস্সামি জীৱিতং.

১২৭. কীদিসা তে মিগা লুদ্দ, কীদিসা ধম্মিকা মিগা;

কথংৱণ্ণা কথংসীলা, বাড়্হং খো নে পসংসসি.

১২৮. ওদাতসিঙ্গা সুচিৱাড়া, জাতৰূপতচূপমা;

পাদা লোহিতকা তেসং, অঞ্জিতক্খা মনোৰমা.

১২৯. এদিসা তে মিগা দেৱ, এদিসা ধম্মিকা মিগা;

মাতাপেত্তিভৰা দেৱ, ন তে সো অভিহাৰিতুং [অভিহাৰযুং (ক. সী.), অভিহাৰযিং (স্যা.), অভিহাৰযং (পী.)].

১৩০. দম্মি নিক্খসতং লুদ্দ, থূলঞ্চ মণিকুণ্ডলং;

চতুস্সদঞ্চ [চতুৰস্সঞ্চ (স্যা. ক.)] পল্লঙ্কং, উমাপুপ্ফসৰিন্নিভং [উম্মাপুপ্ফসিৰিন্নিভং (সী. স্যা. পী. ক.)].

১৩১. দ্ৱে চ সাদিসিযো ভৰিযা, উসভঞ্চ গৱং সতং;

ধম্মেন ৰজ্জং কাৰেস্সং, বহুকাৰো মেসি লুদ্দক.

১৩২. কসিৱাণিজ্জা [কসী ৱণিজ্জা (সী. স্যা. পী.)] ইণদানং, উঞ্ছাচৰিযা চ লুদ্দক;

এতেন দাৰং পোসেহি, মা পাপং অকৰী পুনাতি [অকৰা পুনন্তি (ক. সী. পী.)].

ৰোহণমিগজাতকং [ৰোহন্তমিগজাতকং (সী. পী.)] পঞ্চমং.