৫০০. সিৰীমন্তজাতকং (৪)

৮৩. পঞ্ঞাযুপেতং সিৰিযা ৱিহীনং, যসস্সিনং ৱাপি অপেতপঞ্ঞং;

পুচ্ছামি তং সেনক এতমত্থং, কমেত্থ সেয্যো কুসলা ৱদন্তি.

৮৪. ধীৰা চ বালা চ হৱে জনিন্দ, সিপ্পূপপন্না চ অসিপ্পিনো চ;

সুজাতিমন্তোপি অজাতিমস্স, যসস্সিনো পেসকৰা [পেস্সকৰা (সী. পী.)] ভৱন্তি;

এতম্পি দিস্ৱান অহং ৱদামি, পঞ্ঞো নিহীনো সিৰীমাৱ [সিৰিমাৱ (সী. স্যা. পী.)] সেয্যো.

৮৫. তুৱম্পি পুচ্ছামি অনোমপঞ্ঞ, মহোসধ কেৱলধম্মদস্সি;

বালং যসস্সিং পণ্ডিতং অপ্পভোগং, কমেত্থ সেয্যো কুসলা ৱদন্তি.

৮৬. পাপানি কম্মানি কৰোতি বালো [কৰোন্তি বালা (স্যা. ক.)], ইধমেৱ [ইদমেৱ (স্যা. ক. অট্ঠ.), ইমমেৱ (ক.)] সেয্যো ইতি মঞ্ঞমানো [মঞ্ঞমানা (স্যা. ক.)];

ইধলোকদস্সী পৰলোকমদস্সী, উভযত্থ বালো কলিমগ্গহেসি;

এতম্পি দিস্ৱান অহং ৱদামি, পঞ্ঞোৱ সেয্যো ন যসস্সি বালো.

৮৭. ন সিপ্পমেতং ৱিদধাতি ভোগং, ন বন্ধুৱা [ন বন্ধৱা (সী. স্যা. ক.)] ন সৰীৰৱণ্ণো যো [ন সৰীৰাৱকাসো (সী. স্যা. পী.)];

পস্সেড়মূগং সুখমেধমানং, সিৰী হি নং ভজতে গোৰৱিন্দং [গোৰিমন্দং (সী. পী.)];

এতম্পি দিস্ৱান অহং ৱদামি, পঞ্ঞো নিহীনো সিৰীমাৱ সেয্যো.

৮৮. লদ্ধা সুখং মজ্জতি অপ্পপঞ্ঞো, দুক্খেন ফুট্ঠোপি পমোহমেতি;

আগন্তুনা দুক্খসুখেন ফুট্ঠো, পৱেধতি ৱাৰিচৰোৱ ঘম্মে;

এতম্পি দিস্ৱান অহং ৱদামি, পঞ্ঞোৱ সেয্যো ন যসস্সি বালো.

৮৯. দুমং যথা সাদুফলং অৰঞ্ঞে, সমন্ততো সমভিসৰন্তি [সমভিচৰন্তি (সী. পী.)] পক্খী;

এৱম্পি অড্ঢং সধনং সভোগং, বহুজ্জনো ভজতি অত্থহেতু;

এতম্পি দিস্ৱান অহং ৱদামি, পঞ্ঞো নিহীনো সিৰীমাৱ সেয্যো.

৯০. ন সাধু বলৱা বালো, সাহসা ৱিন্দতে ধনং;

কন্দন্তমেতং দুম্মেধং, কড্ঢন্তি নিৰযং ভুসং;

এতম্পি দিস্ৱান অহং ৱদামি, পঞ্ঞোৱ সেয্যো ন যসস্সি বালো.

৯১. যা কাচি নজ্জো গঙ্গমভিস্সৱন্তি, সব্বাৱ তা নামগোত্তং জহন্তি;

গঙ্গা সমুদ্দং পটিপজ্জমানা, ন খাযতে ইদ্ধিং পঞ্ঞোপি লোকে [ইদ্ধিপৰো হি লোকে (ক. সী. স্যা.), ইদ্ধিপৰো হি লোকো (সী. পী. অট্ঠ.)];

এতম্পি দিস্ৱান অহং ৱদামি, পঞ্ঞো নিহীনো সিৰীমাৱ সেয্যো.

৯২. যমেতমক্খা উদধিং মহন্তং, সৱন্তি নজ্জো সব্বকালমসঙ্খ্যং;

সো সাগৰো নিচ্চমুড়াৰৱেগো, ৱেলং ন অচ্চেতি মহাসমুদ্দো.

৯৩. এৱম্পি বালস্স পজপ্পিতানি, পঞ্ঞং ন অচ্চেতি সিৰী কদাচি;

এতম্পি দিস্ৱান অহং ৱদামি, পঞ্ঞোৱ সেয্যো ন যসস্সি বালো.

৯৪. অসঞ্ঞতো চেপি পৰেসমত্থং, ভণাতি সন্ধানগতো [সণ্ঠানগতো (স্যা. পী.), সন্থানগতো (সী.)] যসস্সী;

তস্সেৱ তং ৰূহতি ঞাতিমজ্ঝে, সিৰী হি নং [সিৰিহীনং (সী. ক.), সিৰীহীনং (স্যা. পী.)] কাৰযতে ন পঞ্ঞা [ন পঞ্ঞো (সী.), ন পঞ্ঞং (স্যা. ক.)];

এতম্পি দিস্ৱান অহং ৱদামি, পঞ্ঞো নিহীনো সিৰীমাৱ সেয্যো.

৯৫. পৰস্স ৱা অত্তনো ৱাপি হেতু, বালো মুসা ভাসতি অপ্পপঞ্ঞো;

সো নিন্দিতো হোতি সভায মজ্ঝে, পচ্ছাপি [পেচ্চম্পি (সী. পী.), পেচ্চাপি (?)] সো দুগ্গতিগামী হোতি;

এতম্পি দিস্ৱান অহং ৱদামি, পঞ্ঞোৱ সেয্যো ন যসস্সি বালো.

৯৬. অত্থম্পি চে ভাসতি ভূৰিপঞ্ঞো, অনাড়্হিযো [অনালযো (পী.)] অপ্পধনো দলিদ্দো;

ন তস্স তং ৰূহতি ঞাতিমজ্ঝে, সিৰী চ পঞ্ঞাণৱতো ন হোতি;

এতম্পি দিস্ৱান অহং ৱদামি, পঞ্ঞো নিহীনো সিৰীমাৱ সেয্যো.

৯৭. পৰস্স ৱা অত্তনো ৱাপি হেতু, ন ভাসতি অলিকং ভূৰিপঞ্ঞো;

সো পূজিতো হোতি সভায মজ্ঝে, পচ্ছাপি সো সুগ্গতিগামী হোতি;

এতম্পি দিস্ৱান অহং ৱদামি, পঞ্ঞোৱ সেয্যো ন যসস্সি বালো.

৯৮. হত্থী গৱস্সা মণিকুণ্ডলা চ, থিযো চ ইদ্ধেসু কুলেসু জাতা;

সব্বাৱ তা উপভোগা ভৱন্তি, ইদ্ধস্স পোসস্স অনিদ্ধিমন্তো;

এতম্পি দিস্ৱান অহং ৱদামি, পঞ্ঞো নিহীনো সিৰীমাৱ সেয্যো.

৯৯. অসংৱিহিতকম্মন্তং, বালং দুম্মেধমন্তিনং;

সিৰী জহতি দুম্মেধং, জিণ্ণংৱ উৰগো তচং;

এতম্পি দিস্ৱান অহং ৱদামি, পঞ্ঞোৱ সেয্যো ন যসস্সি বালো.

১০০. পঞ্চ পণ্ডিতা মযং ভদ্দন্তে, সব্বে পঞ্জলিকা উপট্ঠিতা;

ত্ৱং নো অভিভুয্য ইস্সৰোসি, সক্কোৱ ভূতপতি দেৱৰাজা;

এতম্পি দিস্ৱান অহং ৱদামি, পঞ্ঞো নিহীনো সিৰীমাৱ সেয্যো.

১০১. দাসোৱ পঞ্ঞস্স যসস্সি বালো, অত্থেসু জাতেসু তথাৱিধেসু;

যং পণ্ডিতো নিপুণং সংৱিধেতি, সম্মোহমাপজ্জতি তত্থ বালো;

এতম্পি দিস্ৱান অহং ৱদামি, পঞ্ঞোৱ সেয্যো ন যসস্সি বালো.

১০২. অদ্ধা হি পঞ্ঞাৱ সতং পসত্থা, কন্তা সিৰী ভোগৰতা মনুস্সা;

ঞাণঞ্চ বুদ্ধানমতুল্যৰূপং, পঞ্ঞং ন অচ্চেতি সিৰী কদাচি.

১০৩. যং তং অপুচ্ছিম্হ অকিত্তযী নো, মহোসধ কেৱলধম্মদস্সী;

গৱং সহস্সং উসভঞ্চ নাগং, আজঞ্ঞযুত্তে চ ৰথে দস ইমে;

পঞ্হস্স ৱেয্যাকৰণেন তুট্ঠো, দদামি তে গামৱৰানি সোড়সাতি.

সিৰীমন্তজাতকং [সিৰিমন্দজাতকং (সী. স্যা. পী.)] চতুত্থং.