৪৯৯. সিৱিজাতকং (৩)

৫২. দূৰে অপস্সং থেৰোৱ, চক্খুং যাচিতুমাগতো;

একনেত্তা ভৱিস্সাম, চক্খুং মে দেহি যাচিতো.

৫৩. কেনানুসিট্ঠো ইধ মাগতোসি, ৱনিব্বক [ৱণিব্বক (সী.)] চক্খুপথানি যাচিতুং;

সুদুচ্চজং যাচসি উত্তমঙ্গং, যমাহু নেত্তং পুৰিসেন দুচ্চজং.

৫৪. যমাহু দেৱেসু সুজম্পতীতি, মঘৱাতি নং আহু মনুস্সলোকে;

তেনানুসিট্ঠো ইধ মাগতোস্মি, ৱনিব্বকো চক্খুপথানি যাচিতুং.

৫৫. ৱনিব্বতো [ৱনিব্বকো (স্যা. পী.)] ময্হ ৱনিং [ৱনং (ক.), ৱণিং (সী. স্যা. পী.)] অনুত্তৰং, দদাহি তে চক্খুপথানি যাচিতো;

দদাহি মে চক্খুপথং অনুত্তৰং, যমাহু নেত্তং পুৰিসেন দুচ্চজং.

৫৬. যেন অত্থেন আগচ্ছি [আগঞ্ছি (সী. পী.)], যমত্থমভিপত্থযং;

তে তে ইজ্ঝন্তু সঙ্কপ্পা, লভ চক্খূনি ব্ৰাহ্মণ.

৫৭. একং তে যাচমানস্স, উভযানি দদামহং;

স চক্খুমা গচ্ছ জনস্স পেক্খতো, যদিচ্ছসে ত্ৱং তদতে সমিজ্ঝতু.

৫৮. মা নো দেৱ অদা চক্খুং, মা নো সব্বে পৰাকৰি [পৰক্কৰি (স্যা. ক. অট্ঠ.), পৰিক্কৰি (ক.) পৰি + আ + কৰি = পৰাকৰি];

ধনং দেহি মহাৰাজ, মুত্তা ৱেড়ুৰিযা বহূ.

৫৯. যুত্তে দেৱ ৰথে দেহি, আজানীযে চলঙ্কতে;

নাগে দেহি মহাৰাজ, হেমকপ্পনৱাসসে.

৬০. যথা তং সিৱযো [সীৱিযো (স্যা.)] সব্বে, সযোগ্গা সৰথা সদা;

সমন্তা পৰিকিৰেয্যুং [পৰিকৰেয্যুং (স্যা. পী.)], এৱং দেহি ৰথেসভ.

৬১. যো ৱে দস্সন্তি ৱত্ৱান, অদানে কুৰুতে মনো;

ভূম্যং [ভূম্যা (সী. পী.)] সো পতিতং পাসং, গীৱাযং পটিমুঞ্চতি.

৬২. যো ৱে দস্সন্তি ৱত্ৱান, অদানে কুৰুতে মনো;

পাপা পাপতৰো হোতি, সম্পত্তো যমসাধনং.

৬৩. যঞ্হি যাচে তঞ্হি দদে, যং ন যাচে ন তং দদে;

স্ৱাহং তমেৱ দস্সামি, যং মং যাচতি ব্ৰাহ্মণো.

৬৪. আযুং নু ৱণ্ণং নু সুখং বলং নু, কিং পত্থযানো নু জনিন্দ দেসি;

কথঞ্হি ৰাজা সিৱিনং অনুত্তৰো, চক্খূনি দজ্জা পৰলোকহেতু.

৬৫. ন ৱাহমেতং যসসা দদামি, ন পুত্তমিচ্ছে ন ধনং ন ৰট্ঠং;

সতঞ্চ ধম্মো চৰিতো পুৰাণো, ইচ্চেৱ দানে ৰমতে মনো মম [মমং (সী. পী.)].

৬৬. সখা চ মিত্তো চ মমাসি সীৱিক [সীৱক (সী. পী.)], সুসিক্খিতো সাধু কৰোহি মে ৱচো;

উদ্ধৰিত্ৱা [উদ্ধত্ৱ (সী.), লদ্ধ ত্ৱং (পী.)] চক্খূনি মমং জিগীসতো, হত্থেসু ঠপেহি [আৱেসি (সী.)] ৱনিব্বকস্স.

৬৭. চোদিতো সিৱিৰাজেন, সিৱিকো ৱচনঙ্কৰো;

ৰঞ্ঞো চক্খূনুদ্ধৰিত্ৱা [চক্খূনি উদ্ধত্ৱা (সী. পী.)], ব্ৰাহ্মণস্সূপনামযি;

সচক্খু ব্ৰাহ্মণো আসি, অন্ধো ৰাজা উপাৱিসি.

৬৮. ততো সো কতিপাহস্স, উপৰূড়্হেসু চক্খুসু;

সূতং আমন্তযী ৰাজা, সিৱীনং ৰট্ঠৱড্ঢনো.

৬৯. যোজেহি সাৰথি যানং, যুত্তঞ্চ পটিৱেদয;

উয্যানভূমিং গচ্ছাম, পোক্খৰঞ্ঞো ৱনানি চ.

৭০. সো চ পোক্খৰণীতীৰে [পোক্খৰণিযা তীৰে (সী. পী.)], পল্লঙ্কেন উপাৱিসি;

তস্স সক্কো পাতুৰহু, দেৱৰাজা সুজম্পতি.

৭১. সক্কোহমস্মি দেৱিন্দো, আগতোস্মি তৱন্তিকে;

ৱৰং ৱৰস্সু ৰাজীসি, যং কিঞ্চি মনসিচ্ছসি.

৭২. পহূতং মে ধনং সক্ক, বলং কোসো চনপ্পকো;

অন্ধস্স মে সতো দানি, মৰণঞ্ঞেৱ ৰুচ্চতি.

৭৩. যানি সচ্চানি দ্ৱিপদিন্দ, তানি ভাসস্সু খত্তিয;

সচ্চং তে ভণমানস্স, পুন চক্খু ভৱিস্সতি.

৭৪. যে মং যাচিতুমাযন্তি, নানাগোত্তা ৱনিব্বকা;

যোপি মং যাচতে তত্থ, সোপি মে মনসো পিযো;

এতেন সচ্চৱজ্জেন, চক্খু মে উপপজ্জথ.

৭৫. যং মং সো যাচিতুং আগা, দেহি চক্খুন্তি ব্ৰাহ্মণো;

তস্স চক্খূনি পাদাসিং, ব্ৰাহ্মণস্স ৱনিব্বতো [ৱণিব্বিনো (সী.), ৱনিব্বিনো (পী.)].

৭৬. ভিয্যো মং আৱিসী পীতি, সোমনস্সঞ্চনপ্পকং;

এতেন সচ্চৱজ্জেন, দুতিযং মে উপপজ্জথ.

৭৭. ধম্মেন ভাসিতা গাথা, সিৱীনং ৰট্ঠৱড্ঢন;

এতানি তৱ নেত্তানি, দিব্বানি পটিদিস্সৰে.

৭৮. তিৰোকুট্টং তিৰোসেলং, সমতিগ্গয্হ পব্বতং;

সমন্তা যোজনসতং, দস্সনং অনুভোন্তু তে.

৭৯. কো নীধ ৱিত্তং ন দদেয্য যাচিতো, অপি ৱিসিট্ঠং সুপিযম্পি অত্তনো;

তদিঙ্ঘ সব্বে সিৱযো সমাগতা, দিব্বানি নেত্তানি মমজ্জ পস্সথ.

৮০. তিৰোকুট্টং তিৰোসেলং, সমতিগ্গয্হ পব্বতং;

সমন্তা যোজনসতং, দস্সনং অনুভোন্তি মে.

৮১. ন চাগমত্তা পৰমত্থি কিঞ্চি, মচ্চানং ইধ জীৱিতে;

দত্ৱান মানুসং [দত্ৱা মানুসকং (সী.)] চক্খুং, লদ্ধং মে [মে ইতি পদং নত্থি সী. পোত্থকে] চক্খুং অমানুসং.

৮২. এতম্পি দিস্ৱা সিৱযো, দেথ দানানি ভুঞ্জথ;

দত্ৱা চ ভুত্ৱা চ যথানুভাৱং, অনিন্দিতা সগ্গমুপেথ ঠানন্তি.

সিৱিজাতকং ততিযং.