৪৯৬. ভিক্খাপৰম্পৰজাতকং (১৩)

২৭০. সুখুমালৰূপং দিস্ৱা [দিস্ৱান (ক. সী. অট্ঠ.)], ৰট্ঠা ৱিৱনমাগতং;

কূটাগাৰৱৰূপেতং, মহাসযনমুপাসিতং [মুপোচিতং (বহূসু)].

২৭১. তস্স তে পেমকেনাহং, অদাসিং ৱড্ঢমোদনং [বদ্ধমোদনং (সী. পী.)];

সালীনং ৱিচিতং ভত্তং, সুচিং মংসূপসেচনং.

২৭২. তং ত্ৱং ভত্তং পটিগ্গয্হ, ব্ৰাহ্মণস্স অদাসযি [অদাপযি (সী. স্যা. পী.)];

অত্তানং [অত্তনা (পী. অট্ঠ. পাঠন্তৰং)] অনসিত্ৱান, কোযং ধম্মো নমত্থু তে.

২৭৩. আচৰিযো ব্ৰাহ্মণো ময্হং, কিচ্চাকিচ্চেসু ব্যাৱটো [ৱাৱটো (ক.)];

গৰু চ আমন্তনীযো [আমন্তণীযো (সী. পী.)] চ, দাতুমৰহামি ভোজনং.

২৭৪. ব্ৰাহ্মণং দানি পুচ্ছামি, গোতমং ৰাজপূজিতং;

ৰাজা তে ভত্তং পাদাসি, সুচিং মংসূপসেচনং.

২৭৫. তং ত্ৱং ভত্তং পটিগ্গয্হ, ইসিস্স ভোজনং অদা;

অখেত্তঞ্ঞূসি দানস্স, কোযং ধম্মো নমত্থু তে.

২৭৬. ভৰামি পুত্ত [পুত্তে (সী. পী.)] দাৰে চ, ঘৰেসু গধিতো [গথিতো (সী. পী.)] অহং;

ভুঞ্জে মানুসকে কামে, অনুসাসামি ৰাজিনো.

২৭৭. আৰঞ্ঞিকস্স [আৰঞ্ঞকস্স (সী. পী.)] ইসিনো, চিৰৰত্তং তপস্সিনো;

ৱুড্ঢস্স ভাৱিতত্তস্স, দাতুমৰহামি ভোজনং.

২৭৮. ইসিঞ্চ দানি পুচ্ছামি, কিসং ধমনিসন্থতং;

পৰূড়্হকচ্ছনখলোমং, পঙ্কদন্তং ৰজস্সিৰং.

২৭৯. একো অৰঞ্ঞে ৱিহৰসি [ৱিহাসি (ক.)], নাৱকঙ্খসি জীৱিতং;

ভিক্খু কেন তযা সেয্যো, যস্স ত্ৱং ভোজনং অদা.

২৮০. খণন্তালুকলম্বানি [খণমালুকলম্বানি (স্যা. ক.)], বিলালিতক্কলানি চ [বিড়ালিতক্কড়ানি চ (সী. পী.)];

ধুনং সামাকনীৱাৰং, সঙ্ঘাৰিযং পসাৰিযং [সংহাৰিযং পহাৰিযং (স্যা.), সংসাৰিযং পসাৰিযং (ক.)].

২৮১. সাকং ভিসং মধুং মংসং, বদৰামলকানি চ;

তানি আহৰিত্ৱা [আহত্ৱ (সী. স্যা.)] ভুঞ্জামি, অত্থি মে সো পৰিগ্গহো.

২৮২. পচন্তো অপচন্তস্স, অমমস্স সকিঞ্চনো [অকিঞ্চনো (ক.)];

অনাদানস্স সাদানো, দাতুমৰহামি ভোজনং.

২৮৩. ভিক্খুঞ্চ দানি পুচ্ছামি, তুণ্হীমাসীন সুব্বতং;

ইসি তে ভত্তং পাদাসি, সুচিং মংসূপসেচনং.

২৮৪. তং ত্ৱং ভত্তং পটিগ্গয্হ, তুণ্হী ভুঞ্জসি এককো;

নাঞ্ঞং কঞ্চি [কিঞ্চি (ক.)] নিমন্তেসি, কোযং ধম্মো নমত্থু তে.

২৮৫. ন পচামি ন পাচেমি, ন ছিন্দামি ন ছেদযে;

তং মং অকিঞ্চনং ঞত্ৱা, সব্বপাপেহি আৰতং.

২৮৬. ৱামেন ভিক্খমাদায, দক্খিণেন কমণ্ডলুং;

ইসি মে ভত্তং পাদাসি, সুচিং মংসূপসেচনং.

২৮৭. এতে হি দাতুমৰহন্তি, সমমা সপৰিগ্গহা;

পচ্চনীকমহং মঞ্ঞে, যো দাতাৰং নিমন্তযে.

২৮৮. অত্থায ৱত মে অজ্জ, ইধাগচ্ছি ৰথেসভো;

সোহং অজ্জ পজানামি [ইতো পুব্বে ন জানামি (সী. পী.)], যত্থ দিন্নং মহপ্ফলং.

২৮৯. ৰট্ঠেসু গিদ্ধা ৰাজানো, কিচ্চাকিচ্চেসু ব্ৰাহ্মণা;

ইসী মূলফলে গিদ্ধা, ৱিপ্পমুত্তা চ ভিক্খৱোতি.

ভিক্খাপৰম্পৰজাতকং তেৰসমং.

তস্সুদ্দানং –

সুৱ কিন্নৰ মুক্ক খৰাজিনসো, ভিসজাত মহেসি কপোতৱৰো;

অথ মোৰ সতচ্ছক ৱাণিজকো, অথ ৰাজ সব্ৰাহ্মণ ভিক্খপৰন্তি.

পকিণ্ণকনিপাতং নিট্ঠিতং.