১৪. পকিণ্ণকনিপাতো

৪৮৪. সালিকেদাৰজাতকং (১)

১. সম্পন্নং সালিকেদাৰং, সুৱা ভুঞ্জন্তি কোসিয;

পটিৱেদেমি তে ব্ৰহ্মে, ন নে [তে (সী. স্যা.), নং (সী. স্যা. পী. অট্ঠ.), তং (ক. অট্ঠ.)] ৱাৰেতুমুস্সহে.

২. একো চ তত্থ সকুণো, যো নেসং [তেসং (সী. অট্ঠ.)] সব্বসুন্দৰো;

ভুত্ৱা সালিং যথাকামং, তুণ্ডেনাদায গচ্ছতি.

৩. ওড্ডেন্তু [উজ্ঝুন্তু (স্যা. ক.) অঙ্গুত্তৰনিকাযে পস্সিতব্বং] ৱাড়পাসানি, যথা ৱজ্ঝেথ সো দিজো;

জীৱঞ্চ নং গহেত্ৱান, আনযেহি [আনযেথ (সী. পী.)] মমন্তিকে.

৪. এতে ভুত্ৱা পিৱিত্ৱা চ [ভুত্ৱা চ পিত্ৱা চ (পী.)], পক্কমন্তি ৱিহঙ্গমা;

একো বদ্ধোস্মি পাসেন, কিং পাপং পকতং মযা.

৫. উদৰং নূন অঞ্ঞেসং, সুৱ অচ্চোদৰং তৱ;

ভুত্ৱা সালিং যথাকামং, তুণ্ডেনাদায গচ্ছসি.

৬. কোট্ঠং নু তত্থ পূৰেসি, সুৱ ৱেৰং নু তে মযা;

পুট্ঠো মে সম্ম অক্খাহি, কুহিং সালিং নিদাহসি [নিধীযসি (পী.)].

৭. ন মে ৱেৰং তযা সদ্ধিং, কোট্ঠো ময্হং ন ৱিজ্জতি;

ইণং মুঞ্চামিণং দম্মি, সম্পত্তো কোটসিম্বলিং;

নিধিম্পি তত্থ নিদহামি, এৱং জানাহি কোসিয.

৮. কীদিসং তে ইণদানং, ইণমোক্খো চ কীদিসো;

নিধিনিধানমক্খাহি, অথ পাসা পমোক্খসি.

৯. অজাতপক্খা তৰুণা, পুত্তকা ময্হ কোসিয;

তে মং ভতা ভৰিস্সন্তি, তস্মা তেসং ইণং দদে.

১০. মাতা পিতা চ মে ৱুদ্ধা, জিণ্ণকা গতযোব্বনা;

তেসং তুণ্ডেন হাতূন, মুঞ্চে পুব্বকতং [পুব্বে কতং (সী.)] ইণং.

১১. অঞ্ঞেপি তত্থ সকুণা, খীণপক্খা সুদুব্বলা;

তেসং পুঞ্ঞত্থিকো দম্মি, তং নিধিং আহু পণ্ডিতা.

১২. ঈদিসং [এদিসং (সী. পী.)] মে ইণদানং, ইণমোক্খো চ ঈদিসো;

নিধিনিধানমক্খামি [নিধিং নিধানং অক্খাতং (সী. পী.)], এৱং জানাহি কোসিয.

১৩. ভদ্দকো ৱতযং পক্খী, দিজো পৰমধম্মিকো;

একচ্চেসু মনুস্সেসু, অযং ধম্মো ন ৱিজ্জতি.

১৪. ভুঞ্জ সালিং যথাকামং, সহ সব্বেহি ঞাতিভি;

পুনাপি সুৱ পস্সেমু, পিযং মে তৱ দস্সনং.

১৫. ভুত্তঞ্চ পীতঞ্চ তৱস্সমম্হি [তৱস্সব্যম্হি (ক.)], ৰত্তিঞ্চ [ৰতী চ (সী. পী.)] নো কোসিয তে সকাসে;

নিক্খিত্তদণ্ডেসু দদাহি দানং, জিণ্ণে চ মাতাপিতৰো ভৰস্সু.

১৬. লক্খী ৱত মে উদপাদি অজ্জ, যো অদ্দসাসিং পৱৰং [যোহং অদস্সং পৰমং (স্যা. ক.)] দিজানং;

সুৱস্স সুত্ৱান সুভাসিতানি, কাহামি পুঞ্ঞানি অনপ্পকানি.

১৭. সো কোসিযো অত্তমনো উদগ্গো, অন্নঞ্চ পানঞ্চভিসঙ্খৰিত্ৱা [অন্নঞ্চ পানং অভিসংহৰিত্ৱা (ক.)];

অন্নেন পানেন পসন্নচিত্তো, সন্তপ্পযি সমণব্ৰাহ্মণে চাতি.

সালিকেদাৰজাতকং [কেদাৰজাতকং (ক.)] পঠমং.

৪৮৫. চন্দকিন্নৰীজাতকং (২)

১৮. উপনীযতিদং মঞ্ঞে, চন্দে [লোহিতমদেন মজ্জামি; ৱিজহামি জীৱিতং পাণা, (সী. পী. অট্ঠ.)] লোহিতমদ্দনে;

অজ্জ জহামি জীৱিতং, পাণা [লোহিতমদেন মজ্জামি; ৱিজহামি জীৱিতং পাণা, (সী. পী. অট্ঠ.)] মে চন্দে নিৰুজ্ঝন্তি.

১৯. ওসীদি [ওসধি (সী. স্যা. পী.), ওসট্ঠি (ক.), ওসতি (অভিনৱটীকা), ওসীদতি (?)] মে দুক্খং [দুক্খং মে (সী. পী.)] হদযং, মে ডয্হতে নিতম্মামি;

তৱ চন্দিযা সোচন্তিযা, ন নং অঞ্ঞেহি সোকেহি.

২০. তিণমিৱ ৱনমিৱ মিলাযামি [মিলযামি (সী.), মিয্যামি (সী. পী. অট্ঠ.)], নদী অপৰিপুণ্ণাৱ [অপৰিপুণ্ণিযাৱ (সী. পী.)] সুস্সামি;

তৱ চন্দিযা সোচন্তিযা, ন নং অঞ্ঞেহি সোকেহি.

২১. ৱস্সমিৱ সৰে পাদে [ৱস্সংৱ সৰে পাদে (সী.), ৱস্সংৱ সৰে পব্বতপাদে (পী.)], ইমানি অস্সূনি ৱত্তৰে ময্হং;

তৱ চন্দিযা সোচন্তিযা, ন নং অঞ্ঞেহি সোকেহি.

২২. পাপো খোসি [পাপোসি খো (সী.), পাপো খো (স্যা. পী.)] ৰাজপুত্ত, যো মে ইচ্ছিতং [ইচ্ছিত (সী. স্যা. পী.)] পতিং ৱৰাকিযা;

ৱিজ্ঝসি ৱনমূলস্মিং, সোযং ৱিদ্ধো ছমা সেতি.

২৩. ইমং ময্হং হদযসোকং, পটিমুঞ্চতু ৰাজপুত্ত তৱ মাতা;

যো ময্হং হদযসোকো, কিম্পুৰিসং অৱেক্খমানায.

২৪. ইমং ময্হং হদযসোকং, পটিমুঞ্চতু ৰাজপুত্ত তৱ জাযা;

যো ময্হং হদযসোকো, কিম্পুৰিসং অৱেক্খমানায.

২৫. মা চ পুত্তং [পুত্তে (সী. পী.)] মা চ পতিং, অদ্দক্খি ৰাজপুত্ত তৱ মাতা;

যো কিম্পুৰিসং অৱধি, অদূসকং ময্হ কামা হি [ময্হং কামা (ক.)].

২৬. মা চ পুত্তং মা চ পতিং, অদ্দক্খি ৰাজপুত্ত তৱ জাযা;

যো কিম্পুৰিসং অৱধি, অদূসকং ময্হ কামা হি.

২৭. মা ত্ৱং চন্দে ৰোদি, মা সোচি ৱনতিমিৰমত্তক্খি;

মম ত্ৱং হেহিসি ভৰিযা, ৰাজকুলে পূজিতা নাৰীভি [নাৰী (সী. পী.)].

২৮. অপি নূনহং মৰিস্সং, নাহং [ন চ পনাহং (সী. পী.)] ৰাজপুত্ত তৱ হেস্সং;

যো কিম্পুৰিসং অৱধি, অদূসকং ময্হ কামা হি.

২৯. অপি ভীৰুকে অপি জীৱিতুকামিকে, কিম্পুৰিসি গচ্ছ হিমৱন্তং;

তালীসতগৰভোজনা, অঞ্ঞে [তালিস্সতগৰভোজনে, অৰঞ্ঞে (সী. পী.)] তং মিগা ৰমিস্সন্তি.

৩০. তে পব্বতা তা চ কন্দৰা, [তা চ গিৰিগুহাযো (সী. স্যা. পী.)] তা চ গিৰিগুহাযো তথেৱ তিট্ঠন্তি [তা চ গিৰিগুহাযো (সী. স্যা. পী.)];

তত্থেৱ [তত্থ (সী. স্যা. পী.)] তং অপস্সন্তী, কিম্পুৰিস কথং অহং কস্সং.

৩১. তে পণ্ণসন্থতা ৰমণীযা, ৱাড়মিগেহি অনুচিণ্ণা;

তত্থেৱ তং অপস্সন্তী, কিম্পুৰিস কথং অহং কস্সং [কাসং (সী. স্যা. পী.)].

৩২. তে পুপ্ফসন্থতা ৰমণীযা, ৱাড়মিগেহি অনুচিণ্ণা;