৪৯৩. মহাৱাণিজজাতকং (১০)

১৮০. ৱাণিজা সমিতিং কত্ৱা, নানাৰট্ঠতো আগতা;

ধনাহৰা পক্কমিংসু, একং কত্ৱান গামণিং.

১৮১. তে তং কন্তাৰমাগম্ম, অপ্পভক্খং অনোদকং;

মহানিগ্ৰোধমদ্দক্খুং, সীতচ্ছাযং মনোৰমং.

১৮২. তে চ তত্থ নিসীদিত্ৱা, তস্স ৰুক্খস্স ছাযযা [ছাদিযা (সী. স্যা. পী.)];

ৱাণিজা সমচিন্তেসুং, বালা মোহেন পাৰুতা.

১৮৩. অল্লাযতে [অদ্দাযতে (সী. পী.)] অযং ৰুক্খো, অপি ৱাৰীৱ [ৱাৰি চ (সী. পী.)] সন্দতি;

ইঙ্ঘস্স পুৰিমং সাখং, মযং ছিন্দাম ৱাণিজা.

১৮৪. সা চ ছিন্নাৱ পগ্ঘৰি, অচ্ছং ৱাৰিং অনাৱিলং;

তে তত্থ ন্হত্ৱা পিৱিত্ৱা, যাৱতিচ্ছিংসু ৱাণিজা.

১৮৫. দুতিযং সমচিন্তেসুং, বালা মোহেন পাৰুতা;

ইঙ্ঘস্স দক্খিণং সাখং, মযং ছিন্দাম ৱাণিজা.

১৮৬. সা চ ছিন্নাৱ পগ্ঘৰি, সালিমংসোদনং বহুং;

অপ্পোদৱণ্ণে কুম্মাসে, সিঙ্গিং ৱিদলসূপিযো [সিঙ্গিং বিদলসূপিযো (সী. পী.), সিঙ্গীৱেৰং লসূপিযো (ক.) সিঙ্গীন্তি সিঙ্গীৱেৰাদিকং উত্তৰিভঙ্গং; ৱিদলসূপিযোতি মুগ্গসূপাদযো (অট্ঠ.) ৱিদলং কলাযাদিম্হি ৱত্ততীতি সক্কতাভিধানে].

১৮৭. তে তত্থ ভুত্ৱা খাদিত্ৱা [ভুত্ৱা চ পিৱিত্ৱা চ (পী.)], যাৱতিচ্ছিংসু ৱাণিজা;

ততিযং সমচিন্তেসুং, বালা মোহেন পাৰুতা;

ইঙ্ঘস্স পচ্ছিমং সাখং, মযং ছিন্দাম ৱাণিজা.

১৮৮. সা চ ছিন্নাৱ পগ্ঘৰি, নাৰিযো সমলঙ্কতা;

ৱিচিত্ৰৱত্থাভৰণা, আমুত্তমণিকুণ্ডলা.

১৮৯. অপি সু ৱাণিজা একা, নাৰিযো পণ্ণৱীসতি;

সমন্তা পৰিৱাৰিংসু [পৰিকৰিংসু (সী. স্যা. পী.)], তস্স ৰুক্খস্স ছাযযা [ছাদিযা (সী. স্যা. পী.)].

১৯০. তে তাহি পৰিচাৰেত্ৱা [পৰিৱাৰেত্ৱা (সী. স্যা. পী.)], যাৱতিচ্ছিংসু ৱাণিজা;

চতুত্থং সমচিন্তেসুং, বালা মোহেন পাৰুতা;

ইঙ্ঘস্স উত্তৰং সাখং, মযং ছিন্দাম ৱাণিজা.

১৯১. সা চ ছিন্নাৱ পগ্ঘৰি, মুত্তা ৱেড়ুৰিযা বহূ;

ৰজতং জাতৰূপঞ্চ, কুত্তিযো পটিযানি চ.

১৯২. কাসিকানি চ ৱত্থানি, উদ্দিযানি চ কম্বলা [উদ্দিযানে চ কম্বলে (সী. পী.)];

তে তত্থ ভাৰে বন্ধিত্ৱা, যাৱতিচ্ছিংসু ৱাণিজা.

১৯৩. পঞ্চমং সমচিন্তেসুং, বালা মোহেন পাৰুতা;

ইঙ্ঘস্স মূলে [মূলং (সী. পী. ক.)] ছিন্দাম, অপি ভিয্যো লভামসে.

১৯৪. অথুট্ঠহি সত্থৱাহো, যাচমানো কতঞ্জলী;

নিগ্ৰোধো কিং পৰজ্ঝতি [অপৰজ্ঝথ (সী.), অপৰজ্ঝতি (স্যা. পী.)], ৱাণিজা ভদ্দমত্থু তে.

১৯৫. ৱাৰিদা পুৰিমা সাখা, অন্নপানঞ্চ দক্খিণা;

নাৰিদা পচ্ছিমা সাখা, সব্বকামে চ উত্তৰা;

নিগ্ৰোধো কিং পৰজ্ঝতি, ৱাণিজা ভদ্দমত্থু তে.

১৯৬. যস্স ৰুক্খস্স ছাযায, নিসীদেয্য সযেয্য ৱা;

ন তস্স সাখং ভঞ্জেয্য, মিত্তদুব্ভো হি পাপকো.

১৯৭. তে চ তস্সানাদিযিত্ৱা [তস্স অনাদিত্ৱা (সী. স্যা.)], একস্স ৱচনং বহূ;

নিসিতাহি কুঠাৰীহি [কুধাৰীহি (ক.)], মূলতো নং উপক্কমুং.

১৯৮. ততো নাগা নিক্খমিংসু, সন্নদ্ধা পণ্ণৱীসতি;

ধনুগ্গহানং তিসতা, ছসহস্সা চ ৱম্মিনো.

১৯৯. এতে হনথ বন্ধথ, মা ৱো মুঞ্চিত্থ [মুচ্চিত্থ (পী.)] জীৱিতং;

ঠপেত্ৱা সত্থৱাহংৱ, সব্বে ভস্মং [ভস্মী (সী.)] কৰোথ নে.

২০০. তস্মা হি পণ্ডিতো পোসো, সম্পস্সং অত্থমত্তনো;

লোভস্স ন ৱসং গচ্ছে, হনেয্যাৰিসকং [হনেয্য দিসতং (সী.), হনেয্য দিসকং (স্যা.)] মনং.

২০১. এৱ [এত (সী. পী.)] মাদীনৱং ঞত্ৱা, তণ্হা দুক্খস্স সম্ভৱং;

ৱীততণ্হো অনাদানো, সতো ভিক্খু পৰিব্বজেতি.

মহাৱাণিজজাতকং দসমং.