৪৯৪. সাধিনজাতকং (১১)

২০২. অব্ভুতো ৱত লোকস্মিং, উপ্পজ্জি লোমহংসনো;

দিব্বো ৰথো পাতুৰহু, ৱেদেহস্স যসস্সিনো.

২০৩. দেৱপুত্তো মহিদ্ধিকো, মাতলি [মাতলী (সী.)] দেৱসাৰথি;

নিমন্তযিত্থ ৰাজানং, ৱেদেহং মিথিলগ্গহং.

২০৪. এহিমং ৰথমাৰুয্হ, ৰাজসেট্ঠ দিসম্পতি;

দেৱা দস্সনকামা তে, তাৱতিংসা সইন্দকা;

সৰমানা হি তে দেৱা, সুধম্মাযং সমচ্ছৰে.

২০৫. ততো চ ৰাজা সাধিনো [সাধীনো (সী. পী.)], ৱেদেহো মিথিলগ্গহো [পমুখো ৰথমাৰুহি (সী. পী.)];

সহস্সযুত্তমাৰুয্হ [যুত্তং অভিৰুয্হ (সী.)], অগা দেৱান সন্তিকে;

তং দেৱা পটিনন্দিংসু, দিস্ৱা ৰাজানমাগতং.

২০৬. স্ৱাগতং তে মহাৰাজ, অথো তে অদুৰাগতং;

নিসীদ দানি ৰাজীসি [ৰাজিসি (সী. স্যা. পী.)], দেৱৰাজস্স সন্তিকে.

২০৭. সক্কোপি পটিনন্দিত্থ, ৱেদেহং মিথিলগ্গহং;

নিমন্তযিত্থ [নিমন্তযী চ (সী. পী.)] কামেহি, আসনেন চ ৱাসৱো.

২০৮. সাধু খোসি অনুপ্পত্তো, আৱাসং ৱসৱত্তিনং;

ৱস দেৱেসু ৰাজীসি, সব্বকামসমিদ্ধিসু;

তাৱতিংসেসু দেৱেসু, ভুঞ্জ কামে অমানুসে.

২০৯. অহং পুৰে সগ্গগতো ৰমামি, নচ্চেহি গীতেহি চ ৱাদিতেহি;

সো দানি অজ্জ ন ৰমামি সগ্গে, আযুং নু খীণো [খীণং (স্যা.)] মৰণং নু সন্তিকে;

উদাহু মূড়্হোস্মি জনিন্দসেট্ঠ.

২১০. ন তাযু [ন চাযু (সী. পী. ক.)] খীণং মৰণঞ্চ [মৰণং তে (সী. পী.)] দূৰে, ন চাপি মূড়্হো নৰৱীৰসেট্ঠ;

তুয্হঞ্চ [তৱঞ্চ (সী. পী.), তৱ চ (ক.)] পুঞ্ঞানি পৰিত্তকানি, যেসং ৱিপাকং ইধ ৱেদযিত্থো [ৱেদযতো (পী. ক.)].

২১১. ৱস দেৱানুভাৱেন, ৰাজসেট্ঠ দিসম্পতি;

তাৱতিংসেসু দেৱেসু, ভুঞ্জ কামে অমানুসে.

২১২. যথা যাচিতকং যানং, যথা যাচিতকং ধনং;

এৱং সম্পদমেৱেতং, যং পৰতো দানপচ্চযা.

২১৩. ন চাহমেতমিচ্ছামি, যং পৰতো দানপচ্চযা;

সযংকতানি পুঞ্ঞানি, তং মে আৱেণিকং [আৱেণিযং (সী. স্যা. পী.), আৱেনিকং (ক.)] ধনং.

২১৪. সোহং গন্ত্ৱা মনুস্সেসু, কাহামি কুসলং বহুং;

দানেন সমচৰিযায, সংযমেন দমেন চ;

যং কত্ৱা সুখিতো হোতি, ন চ পচ্ছানুতপ্পতি.

২১৫. ইমানি তানি খেত্তানি, ইমং নিক্খং সুকুণ্ডলং;

ইমা তা হৰিতানূপা, ইমা নজ্জো সৱন্তিযো.

২১৬. ইমা তা পোক্খৰণী ৰম্মা, চক্কৱাকপকূজিতা [চক্কৱাকূপকূজিতা (সী. পী.)];

মন্দালকেহি সঞ্ছন্না, পদুমুপ্পলকেহি চ;

যস্সিমানি মমাযিংসু, কিং নু তে দিসতং গতা.

২১৭. তানীধ খেত্তানি সো ভূমিভাগো, তেযেৱ আৰামৱনুপচাৰা [তে আৰামা তে ৱন’মে পচাৰা (সী. পী.), তে যেৱ আৰামৱনানি সঞ্চৰা (ক.)];

তমেৱ ময্হং জনতং অপস্সতো, সুঞ্ঞংৱ মে নাৰদ খাযতে দিসা.

২১৮. দিট্ঠা মযা ৱিমানানি, ওভাসেন্তা চতুদ্দিসা;

সম্মুখা দেৱৰাজস্স, তিদসানঞ্চ সম্মুখা.

২১৯. ৱুত্থং মে ভৱনং দিব্যং [দিব্বং (সী. পী.)], ভুত্তা কামা অমানুসা;

তাৱতিংসেসু দেৱেসু, সব্বকামসমিদ্ধিসু.

২২০. সোহং এতাদিসং হিত্ৱা, পুঞ্ঞাযম্হি ইধাগতো;

ধম্মমেৱ চৰিস্সামি, নাহং ৰজ্জেন অত্থিকো.

২২১. অদণ্ডাৱচৰং মগ্গং, সম্মাসম্বুদ্ধদেসিতং;

তং মগ্গং পটিপজ্জিস্সং, যেন গচ্ছন্তি সুব্বতাতি.

সাধিনজাতকং [সাধিনৰাজজাতকং (স্যা.)] একাদসমং.