৪৯২. তচ্ছসূকৰজাতকং (৯)

১৬০. যদেসমানা ৱিচৰিম্হ, পব্বতানি ৱনানি চ;

অন্ৱেসং ৱিচৰিং [ৱিপুলে (স্যা. ক.)] ঞাতী, তেমে অধিগতা মযা.

১৬১. বহুঞ্চিদং মূলফলং, ভক্খো চাযং অনপ্পকো;

ৰম্মা চিমা গিৰীনজ্জো [গিৰিনদিযো (সী. পী.)], ফাসুৱাসো ভৱিস্সতি.

১৬২. ইধেৱাহং ৱসিস্সামি, সহ সব্বেহি ঞাতিভি;

অপ্পোস্সুক্কো নিৰাসঙ্কী, অসোকো অকুতোভযো.

১৬৩. অঞ্ঞম্পি [অঞ্ঞং হি (সী. পী.)] লেণং পৰিযেস, সত্তু নো ইধ ৱিজ্জতি;

সো তচ্ছ সূকৰে হন্তি, ইধাগন্ত্ৱা ৱৰং ৱৰং.

১৬৪. কো নুম্হাকং [কো নম্হাকং (সী. পী.)] ইধ সত্তু, কো ঞাতী সুসমাগতে;

দুপ্পধংসে [অপ্পধংসে (সী. পী.)] পধংসেতি, তং মে অক্খাথ পুচ্ছিতা.

১৬৫. উদ্ধগ্গৰাজী মিগৰাজা, বলী দাঠাৱুধো মিগো;

সো তচ্ছ সূকৰে হন্তি, ইধাগন্ত্ৱা ৱৰং ৱৰং.

১৬৬. ন নো দাঠা ন ৱিজ্জন্তি [নু ৱিজ্জন্তি (ক.)], বলং কাযে সমোহিতং;

সব্বে সমগ্গা হুত্ৱান, ৱসং কাহাম এককং.

১৬৭. হদযঙ্গমং কণ্ণসুখং, ৱাচং ভাসসি তচ্ছক;

যোপি যুদ্ধে পলাযেয্য, তম্পি পচ্ছা হনামসে.

১৬৮. পাণাতিপাতা ৱিৰতো নু অজ্জ, অভযং নু তে সব্বভূতেসু দিন্নং;

দাঠা নু তে মিগৱধায [মিগ ৱিৰিযং (সী. স্যা. পী.)] ন সন্তি, যো সঙ্ঘপত্তো কপণোৱ ঝাযসি.

১৬৯. ন মে দাঠা ন ৱিজ্জন্তি, বলং কাযে সমোহিতং;

ঞাতী চ দিস্ৱান সামগ্গী একতো, তস্মা চ ঝাযামি ৱনম্হি এককো.

১৭০. ইমস্সুদং যন্তি দিসোদিসং পুৰে, ভযট্টিতা লেণগৱেসিনো পুথু;

তে দানি সঙ্গম্ম ৱসন্তি একতো, যত্থট্ঠিতা দুপ্পসহজ্জ তে মযা.

১৭১. পৰিণাযকসম্পন্না, সহিতা একৱাদিনো;

তে মং সমগ্গা হিংসেয্যুং, তস্মা নেসং ন পত্থযে [অপত্থৱে (পী.)].

১৭২. একোৱ ইন্দো অসুৰে জিনাতি, একোৱ সেনো হন্তি দিজে পসয্হ;

একোৱ ব্যগ্ঘো মিগসঙ্ঘপত্তো, ৱৰং ৱৰং হন্তি বলঞ্হি তাদিসং.

১৭৩. ন হেৱ ইন্দো ন সেনো, নপি ব্যগ্ঘো মিগাধিপো;

সমগ্গে সহিতে ঞাতী, ন ব্যগ্ঘে [ব্যগ্ঘে চ (সী. পী.), ব্যগ্ঘো ন (স্যা.)] কুৰুতে ৱসে.

১৭৪. কুম্ভীলকা সকুণকা, সঙ্ঘিনো গণচাৰিনো;

সম্মোদমানা একজ্ঝং, উপ্পতন্তি ডযন্তি চ.

১৭৫. তেসঞ্চ ডযমানানং, একেত্থ অপসক্কতি [অপৱত্ততি (সী. পী.)];

তঞ্চ সেনো নিতাড়েতি, ৱেয্যগ্ঘিযেৱ সা গতি.

১৭৬. উস্সাহিতো জটিলেন, লুদ্দেনামিসচক্খুনা;

দাঠী দাঠীসু পক্খন্দি, মঞ্ঞমানো যথা পুৰে.

১৭৭. সাধু সম্বহুলা ঞাতী, অপি ৰুক্খা অৰঞ্ঞজা;

সূকৰেহি সমগ্গেহি, ব্যগ্ঘো একাযনে হতো.

১৭৮. ব্ৰাহ্মণঞ্চেৱ ব্যগ্ঘঞ্চ, উভো হন্ত্ৱান সূকৰা.

আনন্দিনো পমুদিতা, মহানাদং পনাদিসুং.

১৭৯. তে সু উদুম্বৰমূলস্মিং, সূকৰা সুসমাগতা;

তচ্ছকং অভিসিঞ্চিংসু, ‘‘ত্ৱং নো ৰাজাসি ইস্সৰো’’তি.

তচ্ছসূকৰজাতকং নৱমং.