৪৯১. মহামোৰজাতকং (৮)

১৪৩. সচে হি ত্যাহং ধনহেতু গাহিতো, মা মং ৱধী জীৱগাহং গহেত্ৱা;

ৰঞ্ঞো চ [ৰঞ্ঞোৱ (সী. পী.)] মং সম্ম উপন্তিকং [উপন্তি (সী. স্যা. পী.)] নেহি, মঞ্ঞে ধনং লচ্ছসিনপ্পৰূপং.

১৪৪. ন মে অযং তুয্হ ৱধায অজ্জ, সমাহিতো চাপধুৰে [চাপৱৰে (সী. পী.), চাপৱৰো (স্যা.)] খুৰপ্পো;

পাসঞ্চ ত্যাহং অধিপাতযিস্সং, যথাসুখং গচ্ছতু মোৰৰাজা.

১৪৫. যং সত্ত ৱস্সানি মমানুবন্ধি, ৰত্তিন্দিৱং খুপ্পিপাসং সহন্তো;

অথ কিস্স মং পাসৱসূপনীতং, পমুত্তৱে ইচ্ছসি বন্ধনস্মা.

১৪৬. পাণাতিপাতা ৱিৰতো নুসজ্জ, অভযং নু তে সব্বভূতেসু দিন্নং;

যং মং তুৱং পাসৱসূপনীতং, পমুত্তৱে ইচ্ছসি বন্ধনস্মা.

১৪৭. পাণাতিপাতা ৱিৰতস্স ব্ৰূহি, অভযঞ্চ যো সব্বভূতেসু দেতি;

পুচ্ছামি তং মোৰৰাজেতমত্থং, ইতো চুতো কিং লভতে সুখং সো.

১৪৮. পাণাতিপাতা ৱিৰতস্স ব্ৰূমি, অভযঞ্চ যো সব্বভূতেসু দেতি;

দিট্ঠেৱ ধম্মে লভতে পসংসং, সগ্গঞ্চ সো যাতি সৰীৰভেদা.

১৪৯. ন সন্তি দেৱা ইতি আহু [ইচ্চাহু (সী. পী.)] একে, ইধেৱ জীৱো ৱিভৱং উপেতি;

তথা ফলং সুকতদুক্কটানং, দত্তুপঞ্ঞত্তঞ্চ ৱদন্তি দানং;

তেসং ৱচো অৰহতং সদ্দহানো, তস্মা অহং সকুণে বাধযামি.

১৫০. চন্দো চ সুৰিযো চ উভো সুদস্সনা, গচ্ছন্তি ওভাসযমন্তলিক্খে;

ইমস্স লোকস্স পৰস্স ৱা তে, কথং নু তে আহু মনুস্সলোকে.

১৫১. চন্দো চ সুৰিযো চ উভো সুদস্সনা, গচ্ছন্তি ওভাসযমন্তলিক্খে;

পৰস্স লোকস্স ন তে ইমস্স, দেৱাতি তে আহু মনুস্সলোকে.

১৫২. এত্থেৱ তে নীহতা হীনৱাদা, অহেতুকা যে ন ৱদন্তি কম্মং;

তথা ফলং সুকতদুক্কটানং, দত্তুপঞ্ঞত্তং যে চ ৱদন্তি দানং.

১৫৩. অদ্ধা হি সচ্চং ৱচনং তৱেদং [তৱেতং (সী. স্যা. পী.)], কথঞ্হি দানং অফলং ভৱেয্য [ৱদেয্য (সী. পী.)];

তথা ফলং সুকতদুক্কটানং, দত্তুপঞ্ঞত্তঞ্চ কথং ভৱেয্য.

১৫৪. কথংকৰো কিন্তিকৰো কিমাচৰং, কিং সেৱমানো কেন তপোগুণেন;

অক্খাহি [অক্খাহি তং দানি (ক.)] মে মোৰৰাজেতমত্থং, যথা অহং নো নিৰযং পতেয্যং.

১৫৫. যে কেচি অত্থি সমণা পথব্যা, কাসাযৱত্থা অনগাৰিযা তে;

পাতোৱ পিণ্ডায চৰন্তি কালে, ৱিকালচৰিযা ৱিৰতা হি সন্তো.

১৫৬. তে তত্থ কালেনুপসঙ্কমিত্ৱা, পুচ্ছাহি যং তে মনসো পিযং সিযা;

তে তে পৱক্খন্তি যথাপজানং, ইমস্স লোকস্স পৰস্স চত্থং.

১৫৭. তচংৱ জিণ্ণং উৰগো পুৰাণং, পণ্ডূপলাসং হৰিতো দুমোৱ;

এসপ্পহীনো মম লুদ্দভাৱো, জহামহং লুদ্দকভাৱমজ্জ.

১৫৮. যে চাপি মে সকুণা অত্থি বদ্ধা, সতানিনেকানি নিৱেসনস্মিং;

তেসম্পহং [তেসং অহং (স্যা. ক.)] জীৱিতমজ্জ দম্মি, মোক্খঞ্চ তে পত্তা [পত্তো (সী.), অচ্ছ (স্যা.)] সকং নিকেতং.

১৫৯. লুদ্দো চৰী পাসহত্থো অৰঞ্ঞে, বাধেতু মোৰাধিপতিং যসস্সিং;

বন্ধিত্ৱা [বন্ধিত্ৱ (সী. পী.)] মোৰাধিপতিং যসস্সিং, দুক্খা স পমুচ্চি [দুক্খা পমুচ্চি (সী.), দুক্খা পমুঞ্চি (স্যা. পী.)] যথাহং পমুত্তোতি.

মহামোৰজাতকং অট্ঠমং.