৪৮৮. ভিসজাতকং (৫)

৭৮. অস্সং গৱং ৰজতং জাতৰূপং, ভৰিযঞ্চ সো ইধ লভতং মনাপং;

পুত্তেহি দাৰেহি সমঙ্গি হোতু, ভিসানি তে ব্ৰাহ্মণ যো অহাসি.

৭৯. মালঞ্চ সো কাসিকচন্দনঞ্চ, ধাৰেতু পুত্তস্স বহূ ভৱন্তু;

কামেসু তিব্বং কুৰুতং অপেক্খং, ভিসানি তে ব্ৰাহ্মণ যো অহাসি.

৮০. পহূতধঞ্ঞো কসিমা যসস্সী, পুত্তে গিহী ধনিমা সব্বকামে;

ৱযং অপস্সং ঘৰমাৱসাতু, ভিসানি তে ব্ৰাহ্মণ যো অহাসি.

৮১. সো খত্তিযো হোতু পসয্হকাৰী, ৰাজাভিৰাজা [ৰাজাধিৰাজা (স্যা. ক.)] বলৱা যসস্সী;

স চাতুৰন্তং মহিমাৱসাতু, ভিসানি তে ব্ৰাহ্মণ যো অহাসি.

৮২. সো ব্ৰাহ্মণো হোতু অৱীতৰাগো, মুহুত্তনক্খত্তপথেসু যুত্তো;

পূজেতু নং ৰট্ঠপতী যসস্সী, ভিসানি তে ব্ৰাহ্মণ যো অহাসি.

৮৩. অজ্ঝাযকং সব্বসমন্তৱেদং [সব্বসমত্তৱেদং (সী.), সব্বসমত্তৱেদনং (পী.)], তপস্সীনং মঞ্ঞতু সব্বলোকো;

পূজেন্তু নং জানপদা সমেচ্চ, ভিসানি তে ব্ৰাহ্মণ যো অহাসি.

৮৪. চতুস্সদং গামৱৰং সমিদ্ধং, দিন্নঞ্হি সো ভুঞ্জতু ৱাসৱেন;

অৱীতৰাগো মৰণং উপেতু, ভিসানি তে ব্ৰাহ্মণ যো অহাসি.

৮৫. সো গামণী হোতু সহাযমজ্ঝে, নচ্চেহি গীতেহি পমোদমানো;

সো ৰাজতো ব্যসন মালত্থ [মা ৰাজতো ৱ্যসন’মলত্থ (সী. স্যা. পী.)] কিঞ্চি, ভিসানি তে ব্ৰাহ্মণ যো অহাসি.

৮৬. যং একৰাজা পথৱিং ৱিজেত্ৱা, ইত্থীসহস্সান [ইত্থীসহস্সস্স (সী. পী.)] ঠপেতু অগ্গং;

সীমন্তিনীনং পৱৰা ভৱাতু, ভিসানি তে ব্ৰাহ্মণ যা অহাসি.

৮৭. ইসীনঞ্হি সা সব্বসমাগতানং, ভুঞ্জেয্য সাদুং অৱিকম্পমানা;

চৰাতু লাভেন ৱিকত্থমানা, ভিসানি তে ব্ৰাহ্মণ যা অহাসি.

৮৮. আৱাসিকো হোতু মহাৱিহাৰে, নৱকম্মিকো হোতু গজঙ্গলাযং [কজঙ্গলাযং (সী. স্যা. পী.)];

আলোকসন্ধিং দিৱসং [দিৱসা (সী. স্যা. পী.)] কৰোতু, ভিসানি তে ব্ৰাহ্মণ যো অহাসি.

৮৯. সো বজ্ঝতূ পাসসতেহি ছব্ভি [ছম্হি (সী. পী.), ছস্সু (?)], ৰম্মা ৱনা নিয্যতু ৰাজধানিং [ৰাজঠানিং (ক.)];

তুত্তেহি সো হঞ্ঞতু পাচনেহি, ভিসানি তে ব্ৰাহ্মণ যো অহাসি.

৯০. অলক্কমালী তিপুকণ্ণৱিদ্ধো, লট্ঠীহতো সপ্পমুখং উপেতু;

সকচ্ছবন্ধো [সক্কচ্চবদ্ধো (সী. পী.), সংকচ্চবন্ধো (নিয্য)] ৱিসিখং চৰাতু, ভিসানি তে ব্ৰাহ্মণ যো অহাসি.

৯১. যো ৱে অনট্ঠংৱ [অনট্ঠং (সী. স্যা. পী.)] নট্ঠন্তি চাহ, কামেৱ সো লভতং ভুঞ্জতঞ্চ [লভতু ভুঞ্জতু চ (স্যা.)];

অগাৰমজ্ঝে মৰণং উপেতু, যো ৱা ভোন্তো সঙ্কতি কঞ্চিদেৱ [কিঞ্চিদেৱ (ক.)].

৯২. যদেসমানা ৱিচৰন্তি লোকে, ইট্ঠঞ্চ কন্তঞ্চ বহূনমেতং;

পিযং মনুঞ্ঞং চিধ জীৱলোকে, কস্মা ইসযো নপ্পসংসন্তি কামে.

৯৩. কামেসু ৱে হঞ্ঞৰে বজ্ঝৰে চ, কামেসু দুক্খঞ্চ ভযঞ্চ জাতং;

কামেসু ভূতাধিপতী পমত্তা, পাপানি কম্মানি কৰোন্তি মোহা.

৯৪. তে পাপধম্মা পসৱেত্ৱ পাপং, কাযস্স ভেদা নিৰযং ৱজন্তি;

আদীনৱং কামগুণেসু দিস্ৱা, তস্মা ইসযো নপ্পসংসন্তি কামে.

৯৫. ৱীমংসমানো ইসিনো ভিসানি, তীৰে গহেত্ৱান থলে নিধেসিং;

সুদ্ধা অপাপা ইসযো ৱসন্তি, এতানি তে ব্ৰহ্মচাৰী ভিসানি.

৯৬. ন তে নটা নো পন কীড়নেয্যা, ন বন্ধৱা নো পন তে সহাযা;

কিস্মিং ৱুপত্থম্ভ সহস্সনেত্ত, ইসীহি ত্ৱং কীড়সি দেৱৰাজ.

৯৭. আচৰিযো মেসি পিতা চ ময্হং, এসা পতিট্ঠা খলিতস্স ব্ৰহ্মে;

একাপৰাধং খম ভূৰিপঞ্ঞ, ন পণ্ডিতা কোধবলা ভৱন্তি.

৯৮. সুৱাসিতং ইসিনং একৰত্তং, যং ৱাসৱং ভূতপতিদ্দসাম;

সব্বেৱ ভোন্তো সুমনা ভৱন্তু, যং ব্ৰাহ্মণো পচ্চুপাদী ভিসানি.

৯৯. অহঞ্চ সাৰিপুত্তো চ, মোগ্গল্লানো চ কস্সপো;

অনুৰুদ্ধো পুণ্ণো আনন্দো, তদাসুং সত্ত ভাতৰো.

১০০. ভগিনী উপ্পলৱণ্ণা চ, দাসী খুজ্জুত্তৰা তদা;

চিত্তো গহপতি দাসো, যক্খো সাতাগিৰো তদা.

১০১. পালিলেয্যো [পাৰিলেয্যো (সী. পী.)] তদা নাগো, মধুদো [মধুৱা (সী. পী.)] সেট্ঠৱানৰো;

কাড়ুদাযী তদা সক্কো, এৱং ধাৰেথ জাতকন্তি.

ভিসজাতকং পঞ্চমং.