৪৮৯. সুৰুচিজাতকং (৬)

১০২. মহেসী সুৰুচিনো [ৰুচিনো (সী. স্যা. পী.)] ভৰিযা, আনীতা পঠমং অহং;

দস ৱস্সসহস্সানি, যং মং সুৰুচিমানযি.

১০৩. সাহং ব্ৰাহ্মণ ৰাজানং, ৱেদেহং মিথিলগ্গহং;

নাভিজানামি কাযেন, ৱাচায উদ চেতসা;

সুৰুচিং অতিমঞ্ঞিত্থ [অতিমঞ্ঞিত্থো (সী. পী.), অতিমঞ্ঞিতা (?)], আৱি [আৱিং (সী. পী.)] ৱা যদি ৱা ৰহো.

১০৪. এতেন সচ্চৱজ্জেন, পুত্তো উপ্পজ্জতং ইসে;

মুসা মে ভণমানায, মুদ্ধা ফলতু সত্তধা.

১০৫. ভত্তু মম সস্সু মাতা, পিতা চাপি চ সস্সুৰো;

তে মং ব্ৰহ্মে ৱিনেতাৰো, যাৱ অট্ঠংসু জীৱিতং.

১০৬. সাহং অহিংসাৰতিনী, কামসা [কামসো (সী.)] ধম্মচাৰিনী [ধম্মচাৰিণী (সী.)];

সক্কচ্চং তে উপট্ঠাসিং, ৰত্তিন্দিৱমতন্দিতা.

১০৭. এতেন সচ্চৱজ্জেন, পুত্তো উপ্পজ্জতং ইসে;

মুসা মে ভণমানায, মুদ্ধা ফলতু সত্তধা.

১০৮. সোড়সিত্থিসহস্সানি, সহভৰিযানি ব্ৰাহ্মণ;

তাসু ইস্সা ৱা কোধো ৱা, নাহু ময্হং কুদাচনং.

১০৯. হিতেন তাসং নন্দামি, ন চ মে কাচি অপ্পিযা;

অত্তানংৱানুকম্পামি, সদা সব্বা সপত্তিযো.

১১০. এতেন সচ্চৱজ্জেন, পুত্তো উপ্পজ্জতং ইসে;

মুসা মে ভণমানায, মুদ্ধা ফলতু সত্তধা.

১১১. দাসে কম্মকৰে পেস্সে [পোসে (স্যা. ক.)], যে চঞ্ঞে অনুজীৱিনো;

পেসেমি [পোসেমি (সী. স্যা. পী.)] সহধম্মেন, সদা পমুদিতিন্দ্ৰিযা.

১১২. এতেন সচ্চৱজ্জেন, পুত্তো উপ্পজ্জতং ইসে;

মুসা মে ভণমানায, মুদ্ধা ফলতু সত্তধা.

১১৩. সমণে ব্ৰাহ্মণে চাপি, অঞ্ঞে চাপি ৱনিব্বকে;

তপ্পেমি অন্নপানেন, সদা পযতপাণিনী.

১১৪. এতেন সচ্চৱজ্জেন, পুত্তো উপ্পজ্জতং ইসে;

মুসা মে ভণমানায, মুদ্ধা ফলতু সত্তধা.

১১৫. চাতুদ্দসিং পঞ্চদ্দসিং [পন্নৰসিং (সী. পী.)], যা চ পক্খস্স অট্ঠমী [অট্ঠমিং (সী. পী.)];

পাটিহাৰিযপক্খঞ্চ, অট্ঠঙ্গসুসমাগতং [অট্ঠঙ্গসুসমাহিতং (সব্বত্থ) ৱি. ৱ. ১২৯ পাড়িযা অট্ঠকথা পস্সিতব্বা];

উপোসথং উপৱসামি [উপৱসিং (ক.)], সদা সীলেসু সংৱুতা.

১১৬. এতেন সচ্চৱজ্জেন, পুত্তো উপ্পজ্জতং ইসে;

মুসা মে ভণমানায, মুদ্ধা ফলতু সত্তধা.

১১৭. সব্বেৱ তে ধম্মগুণা, ৰাজপুত্তি যসস্সিনি;

সংৱিজ্জন্তি তযি ভদ্দে, যে ত্ৱং কিত্তেসি অত্তনি.

১১৮. খত্তিযো জাতিসম্পন্নো, অভিজাতো যসস্সিমা;

ধম্মৰাজা ৱিদেহানং, পুত্তো উপ্পজ্জতে তৱ [তৱং (সী. পী.)].

১১৯. দুম্মী [ৰুম্মী (সী. পী.)] ৰজোজল্লধৰো, অঘে ৱেহাযসং ঠিতো;

মনুঞ্ঞং ভাসসে ৱাচং, যং ময্হং হদযঙ্গমং.

১২০. দেৱতানুসি সগ্গম্হা, ইসি ৱাসি [চাপি (ক.)] মহিদ্ধিকো;

কো ৱাসি ত্ৱং অনুপ্পত্তো, অত্তানং মে পৱেদয.

১২১. যং দেৱসঙ্ঘা ৱন্দন্তি, সুধম্মাযং সমাগতা;

সোহং সক্কো সহস্সক্খো, আগতোস্মি তৱন্তিকে.

১২২. ইত্থিযো [ইত্থিযা (পী.)] জীৱলোকস্মিং, যা হোতি [হোন্তি (সী. স্যা.)] সমচাৰিনী [সমচাৰিণী (সী.)];

মেধাৱিনী সীলৱতী, সস্সুদেৱা পতিব্বতা.

১২৩. তাদিসায সুমেধায, সুচিকম্মায নাৰিযা;

দেৱা দস্সনমাযন্তি, মানুসিযা অমানুসা.

১২৪. ত্ৱঞ্চ ভদ্দে সুচিণ্ণেন, পুব্বে সুচৰিতেন চ;

ইধ ৰাজকুলে জাতা, সব্বকামসমিদ্ধিনী.

১২৫. অযঞ্চ তে ৰাজপুত্তি, উভযত্থ কটগ্গহো;

দেৱলোকূপপত্তী চ, কিত্তী চ ইধ জীৱিতে.

১২৬. চিৰং সুমেধে সুখিনী, ধম্মমত্তনি পালয;

এসাহং তিদিৱং যামি, পিযং মে তৱ দস্সনন্তি.

সুৰুচিজাতকং ছট্ঠং.