৪৮৭. উদ্দালকজাতকং (৪)

৬২. খৰাজিনা জটিলা পঙ্কদন্তা, দুম্মক্খৰূপা [দুম্মুধৰূপা (সী. পী. ক.)] যে মন্তং জপ্পন্তি [যেমে জপন্তি (সী. পী.), যে’মে জপ্পন্তি মন্তে (জা. ১.৬.১০)];

কচ্চিন্নু তে মানুসকে পযোগে, ইদং ৱিদূ পৰিমুত্তা অপাযা.

৬৩. পাপানি কম্মানি কৰেথ [কৰেয্য (স্যা.), কত্ৱান (জা. ১.৬.১১)] ৰাজ, বহুস্সুতো চে ন চৰেয্য ধম্মং;

সহস্সৱেদোপি ন তং পটিচ্চ, দুক্খা পমুচ্চে [পমুঞ্চে (স্যা.)] চৰণং অপত্ৱা.

৬৪. সহস্সৱেদোপি ন তং পটিচ্চ, দুক্খা পমুচ্চে চৰণং অপত্ৱা;

মঞ্ঞামি ৱেদা অফলা ভৱন্তি, সসংযমং চৰণঞ্ঞেৱ সচ্চং.

৬৫. ন হেৱ ৱেদা অফলা ভৱন্তি, সসংযমং চৰণঞ্ঞেৱ সচ্চং;

কিত্তিঞ্হি [কিত্তিঞ্চ (স্যা.)] পপ্পোতি অধিচ্চ ৱেদে, সন্তিং পুণাতি [পুনোতি (সী. অট্ঠ.), পুণেতি (স্যা. জা. ১.৬.১৩), পুনেতি (পী.)] চৰণেন দন্তো.

৬৬. ভচ্চা মাতা পিতা বন্ধূ, যেন জাতো সযেৱ সো;

উদ্দালকো অহং ভোতো [ভোতি (ক.)], সোত্তিযাকুলৱংসকো [ৱংসতো (ক.)].

৬৭. কথং ভো ব্ৰাহ্মণো হোতি, কথং ভৱতি কেৱলী;

কথঞ্চ পৰিনিব্বানং, ধম্মট্ঠো কিন্তি ৱুচ্চতি.

৬৮. নিৰংকত্ৱা অগ্গিমাদায ব্ৰাহ্মণো, আপো সিঞ্চং যজং উস্সেতি যূপং;

এৱংকৰো ব্ৰাহ্মণো হোতি খেমী, ধম্মে ঠিতং তেন অমাপযিংসু.

৬৯. ন সুদ্ধি সেচনেনত্থি, নাপি কেৱলী ব্ৰাহ্মণো;

ন খন্তী নাপি সোৰচ্চং, নাপি সো পৰিনিব্বুতো.

৭০. কথং সো [ভো (স্যা. ক.)] ব্ৰাহ্মণো হোতি, কথং ভৱতি কেৱলী;

কথঞ্চ পৰিনিব্বানং, ধম্মট্ঠো কিন্তি ৱুচ্চতি.

৭১. অখেত্তবন্ধূ অমমো নিৰাসো, নিল্লোভপাপো ভৱলোভখীণো;

এৱংকৰো ব্ৰাহ্মণো হোতি খেমী, ধম্মে ঠিতং তেন অমাপযিংসু.

৭২. খত্তিযা ব্ৰাহ্মণা ৱেস্সা, সুদ্দা চণ্ডালপুক্কুসা;

সব্বেৱ সোৰতা দন্তা, সব্বেৱ পৰিনিব্বুতা;

সব্বেসং সীতিভূতানং, অত্থি সেয্যোথ [সেয্যোৱ (সী. পী.)] পাপিযো.

৭৩. খত্তিযা ব্ৰাহ্মণা ৱেস্সা, সুদ্দা চণ্ডালপুক্কুসা;

সব্বেৱ সোৰতা দন্তা, সব্বেৱ পৰিনিব্বুতা;

সব্বেসং সীতিভূতানং, নত্থি সেয্যোথ পাপিযো.

৭৪. খত্তিযা ব্ৰাহ্মণা ৱেস্সা, সুদ্দা চণ্ডালপুক্কুসা;

সব্বেৱ সোৰতা দন্তা, সব্বেৱ পৰিনিব্বুতা.

৭৫. সব্বেসং সীতিভূতানং, নত্থি সেয্যোথ পাপিযো;

পনত্থং [পসত্থং (স্যা.), পসট্ঠং (ক.)] চৰসি ব্ৰহ্মঞ্ঞং, সোত্তিযাকুলৱংসতং.

৭৬. নানাৰত্তেহি ৱত্থেহি, ৱিমানং ভৱতি ছাদিতং;

ন তেসং ছাযা ৱত্থানং, সো ৰাগো অনুপজ্জথ.

৭৭. এৱমেৱ [এৱমেৱং (পী.)] মনুস্সেসু, যদা সুজ্ঝন্তি মাণৱা;

তে সজাতিং পমুঞ্চন্তি [ন তেসং জাতিং পুচ্ছন্তি (সী. স্যা. পী.), ন তেসং জাতি সুজ্ঝতি (ক.)], ধম্মমঞ্ঞায সুব্বতাতি.

উদ্দালকজাতকং চতুত্থং.