৪৮৬. মহাউক্কুসজাতকং (৩)

৪৪. উক্কা চিলাচা [মিলাচা (সী. স্যা. পী.)] বন্ধন্তি দীপে [বন্ধন্তি লুদ্দা, দীপে (ক.)], পজা মমং খাদিতুং পত্থযন্তি;

মিত্তং সহাযঞ্চ ৱদেহি সেনক, আচিক্খ ঞাতিব্যসনং দিজানং.

৪৫. দিজো দিজানং পৱৰোসি পক্খিম [পক্খি (সী. পী.), পক্খি চ (স্যা.)], উক্কুসৰাজ সৰণং তং উপেম [উপেমি (সী. স্যা. পী.)];

পজা মমং খাদিতুং পত্থযন্তি, লুদ্দা চিলাচা [মিলাচা (সী. স্যা. পী.)] ভৱ মে সুখায.

৪৬. মিত্তং সহাযঞ্চ কৰোন্তি পণ্ডিতা, কালে অকালে সুখমেসমানা [মাসযানা (পী.)];

কৰোমি তে সেনক এতমত্থং, অৰিযো হি অৰিযস্স কৰোতি কিচ্চং.

৪৭. যং হোতি কিচ্চং অনুকম্পকেন, অৰিযস্স অৰিযেন কতং তযীদং [তৱ যিদং (সী. পী.)];

অত্তানুৰক্খী ভৱ মা অদয্হি [অডয্হ (সী. পী.)], লচ্ছাম পুত্তে তযি জীৱমানে.

৪৮. তৱেৱ [তমেৱ (স্যা. ক.)] ৰক্খাৱৰণং কৰোন্তো, সৰীৰভেদাপি ন সন্তসামি;

কৰোন্তি হেকে [হেতে (ক. সী. স্যা. পী.)] সখীনং সখাৰো, পাণং চজন্তা [চজন্তি (সী. পী.)] সতমেস [সতানেস (পী.)] ধম্মো.

৪৯. সুদুক্কৰং কম্মমকাসি [মকা (সী. পী.)], অণ্ডজাযং ৱিহঙ্গমো;

অত্থায কুৰৰো পুত্তে, অড্ঢৰত্তে অনাগতে.

৫০. চুতাপি হেকে [একে (সী. পী.)] খলিতা সকম্মুনা, মিত্তানুকম্পায পতিট্ঠহন্তি;

পুত্তা মমট্টা গতিমাগতোস্মি, অত্থং চৰেথো [চৰেথ (সী. স্যা. পী.)] মম ৱাৰিচৰ [ৱাৰিছন্ন (সী. পী.)].

৫১. ধনেন ধঞ্ঞেন চ অত্তনা চ, মিত্তং সহাযঞ্চ কৰোন্তি পণ্ডিতা;

কৰোমি তে সেনক এতমত্থং, অৰিযো হি অৰিযস্স কৰোতি কিচ্চং.

৫২. অপ্পোস্সুক্কো তাত তুৱং নিসীদ, পুত্তো পিতু চৰতি অত্থচৰিযং;

অহং চৰিস্সামি তৱেতমত্থং, সেনস্স পুত্তে পৰিতাযমানো.

৫৩. অদ্ধা হি তাত সতমেস ধম্মো, পুত্তো পিতু যং চৰে [পিতুনং চৰে (ক.), পিতু যঞ্চৰেথ (সী. পী.)] অত্থচৰিযং;

অপ্পেৱ মং দিস্ৱান পৱড্ঢকাযং, সেনস্স পুত্তা ন ৱিহেঠযেয্যুং.

৫৪. পসূ মনুস্সা মিগৱীৰসেট্ঠ [মিগৱিৰিযসেট্ঠ (সী. পী.)], ভযট্টিতা [ভযদ্দিতা (সী. পী.)] সেট্ঠমুপব্বজন্তি;

পুত্তা মমট্টা গতিমাগতোস্মি, ত্ৱং নোসি ৰাজা ভৱ মে সুখায.

৫৫. কৰোমি তে সেনক এতমত্থং, আযামি তে তং দিসতং ৱধায;

কথঞ্হি ৱিঞ্ঞূ পহু সম্পজানো, ন ৱাযমে অত্তজনস্স গুত্তিযা.

৫৬. মিত্তঞ্চ কযিৰাথ সুহদযঞ্চ [সুহদ্দযঞ্চ (সী.), সখাঘৰঞ্চ (পী.)], অযিৰঞ্চ কযিৰাথ সুখাগমায;

নিৱত্থকোচোৱ [কোজোৱ (সী. পী.)] সৰেভিহন্ত্ৱা, মোদাম পুত্তেহি সমঙ্গিভূতা.

৫৭. সকমিত্তস্স কম্মেন, সহাযস্সাপলাযিনো;

কূজন্তমুপকূজন্তি, লোমসা হদযঙ্গমং.

৫৮. মিত্তং সহাযং অধিগম্ম পণ্ডিতো, সো ভুঞ্জতী পুত্ত পসুং ধনং ৱা;

অহঞ্চ পুত্তা চ পতী চ ময্হং, মিত্তানুকম্পায সমঙ্গিভূতা.

৫৯. ৰাজৱতা সূৰৱতা চ অত্থো, সম্পন্নসখিস্স ভৱন্তি হেতে;

সো মিত্তৱা যসৱা উগ্গতত্তো, অস্মিংধলোকে [অস্মিঞ্চ লোকে (সী. স্যা. পী.)] মোদতি কামকামী.

৬০. কৰণীযানি মিত্তানি, দলিদ্দেনাপি সেনক;

পস্স মিত্তানুকম্পায, সমগ্গম্হা সঞাতকে [সঞাতকা (?)].

৬১. সূৰেন বলৱন্তেন, যো মিত্তে [মেত্তে (সী.), মিত্তং (স্যা.)] কুৰুতে দিজো;

এৱং সো সুখিতো হোতি, যথাহং ত্ৱঞ্চ সেনকাতি.

মহাউক্কুসজাতকং ততিযং.