৪৮৩. সৰভমিগজাতকং (১০)

১৩৪. আসীসেথেৱ [আসিংসেথেৱ (সী. স্যা. পী.)] পুৰিসো, ন নিব্বিন্দেয্য পণ্ডিতো;

পস্সামি ৱোহং অত্তানং, যথা ইচ্ছিং তথা অহু.

১৩৫. আসীসেথেৱ পুৰিসো, ন নিব্বিন্দেয্য পণ্ডিতো;

পস্সামি ৱোহং অত্তানং, উদকা থলমুব্ভতং.

১৩৬. ৱাযমেথেৱ পুৰিসো, ন নিব্বিন্দেয্য পণ্ডিতো;

পস্সামি ৱোহং অত্তানং, যথা ইচ্ছিং তথা অহু.

১৩৭. ৱাযমেথেৱ পুৰিসো, ন নিব্বিন্দেয্য পণ্ডিতো;

পস্সামি ৱোহং অত্তানং, উদকা থলমুব্ভতং.

১৩৮. দুক্খূপনীতোপি নৰো সপঞ্ঞো, আসং ন ছিন্দেয্য সুখাগমায;

বহূ হি ফস্সা অহিতা হিতা চ, অৱিতক্কিতা মচ্চমুপব্বজন্তি [মচ্চুমুপব্বজন্তি (ক. সী. পী.), মচ্চুমুপপজ্জন্তি (স্যা. ক.) এত্থ ‘‘অৱিতক্কিতাপি ফস্সো মচ্চং জনং উপগচ্ছন্তী’’তি অত্থো].

১৩৯. অচিন্তিতম্পি ভৱতি, চিন্তিতম্পি ৱিনস্সতি;

ন হি চিন্তামযা ভোগা, ইত্থিযা পুৰিসস্স ৱা.

১৪০. সৰভং গিৰিদুগ্গস্মিং, যং ত্ৱং অনুসৰী পুৰে;

অলীনচিত্তস্স তুৱং, ৱিক্কন্তমনুজীৱসি [তৱ, ৱিক্কন্তং জীৱিতং লভি (ক.)].

১৪১. যো তং ৱিদুগ্গা নৰকা সমুদ্ধৰি, সিলায যোগ্গং সৰভো কৰিত্ৱা;

দুক্খূপনীতং মচ্চুমুখা পমোচযি, অলীনচিত্তং তং মিগং [তমেৱ (স্যা. ক.)] ৱদেসি.

১৪২. কিং ত্ৱং নু [তুৱন্নু (সী. পী.)] তত্থেৱ তদা অহোসি, উদাহু তে কোচি নং [তং (ক.)] এতদক্খা;

ৱিৱট্টচ্ছদ্দো নুসি সব্বদস্সী, ঞাণং নু তে ব্ৰাহ্মণ ভিংসৰূপং.

১৪৩. ন চেৱহং তত্থ তদা অহোসিং, ন চাপি মে কোচি নং [তং (ক.)] এতদক্খা;

গাথাপদানঞ্চ সুভাসিতানং, অত্থং তদানেন্তি জনিন্দ ধীৰা.

১৪৪. আদায পত্তিং [পত্তং (স্যা.), পট্টিং (ক.)] পৰৱিৰিযঘাতিং, চাপে সৰং কিং ৱিচিকিচ্ছসে তুৱং;

নুন্নো [নুণ্ণো (ক. সী. স্যা.), তুণ্ণো (ক.)] সৰো সৰভং হন্তু খিপ্পং, অন্নঞ্হি এতং ৱৰপঞ্ঞ ৰঞ্ঞো.

১৪৫. অদ্ধা পজানামি অহম্পি এতং, অন্নং মিগো ব্ৰাহ্মণ খত্তিযস্স;

পুব্বে কতঞ্চ [পুব্বে চ কতং (ক.)] অপচাযমানো, তস্মা মিগং সৰভং নো হনামি.

১৪৬. নেসো মিগো মহাৰাজ, অসুৰেসো দিসম্পতি;

এতং হন্ত্ৱা মনুস্সিন্দ, ভৱস্সু অমৰাধিপো.

১৪৭. সচে চ ৰাজা [ৰাজ (সী. স্যা. পী.)] ৱিচিকিচ্ছসে তুৱং, হন্তুং মিগং সৰভং সহাযকং [সহাযকং মে (সী. পী.)];

সপুত্তদাৰো নৰৱীৰসেট্ঠ [নৰৱিৰিযসেট্ঠ (সী. পী.)], গন্ত্ৱা [গন্তা (সী. পী. অট্ঠ.)] তুৱং ৱেতৰণিং যমস্স.

১৪৮. কামং অহং জানপদা চ সব্বে, পুত্তা চ দাৰা চ সহাযসঙ্ঘা;

গচ্ছেমু তং ৱেতৰণিং যমস্স, ন ত্ৱেৱ হঞ্ঞো মম পাণদো যো [পাণদ’স্স (সী. স্যা. পী.)].

১৪৯. অযং মিগো কিচ্ছগতস্স ময্হং, একস্স কত্তা ৱিৱনস্মি ঘোৰে;

তং তাদিসং পুব্বকিচ্চং সৰন্তো, জানং মহাব্ৰহ্মে কথং হনেয্যং.

১৫০. মিত্তাভিৰাধী চিৰমেৱ জীৱ, ৰজ্জং ইমং ধম্মগুণে [ৰজ্জম্পিমং চস্স গণে (ক.)] পসাস;

নাৰীগণেহি পৰিচাৰিযন্তো, মোদস্সু ৰট্ঠে তিদিৱেৱ ৱাসৱো.

১৫১. অক্কোধনো নিচ্চপসন্নচিত্তো, সব্বাতিথী যাচযোগো ভৱিত্ৱা [পাহুনকে কৰিত্ৱা (স্যা.), যাচযোগো ৱিদিত্ৱা (ক.)];

দত্ৱা চ ভুত্ৱা চ যথানুভাৱং, অনিন্দিতো সগ্গমুপেহি ঠানন্তি.

সৰভমিগজাতকং দসমং.

তেৰসকনিপাতং নিট্ঠিতং.