১৩. তেৰসকনিপাতো

৪৭৪. অম্বজাতকং (১)

১. অহাসি [আহাসি (?)] মে অম্বফলানি পুব্বে, অণূনি থূলানি চ ব্ৰহ্মচাৰি;

তেহেৱ মন্তেহি ন দানি তুয্হং, দুমপ্ফলা পাতুভৱন্তি ব্ৰহ্মে.

২. নক্খত্তযোগং পটিমানযামি, খণং মুহুত্তঞ্চ মন্তে ন পস্সং [খণং মুহুত্তং ন মং তোসযন্তি (সী. পী.)];

নক্খত্তযোগঞ্চ খণঞ্চ লদ্ধা, অদ্ধাহৰিস্সম্বফলং [অথাহৰিস্সম্বফলং (সী. পী.)] পহূতং.

৩. নক্খত্তযোগং ন পুৰে অভাণি, খণং মুহুত্তং ন পুৰে অসংসি;

সযং হৰী [অথাহৰী (সী. স্যা. পী.)] অম্বফলং পহূতং, ৱণ্ণেন গন্ধেন ৰসেনুপেতং.

৪. মন্তাভিজপ্পেন পুৰে হি [পুৰ’স্স (সী. পী.), পুৰেপি (স্যা.)] তুয্হং, দুমপ্ফলা পাতুভৱন্তি ব্ৰহ্মে;

স্ৱাজ্জ ন পাৰেসি জপ্পম্পি মন্তং [জপম্পি মন্তে (সী. পী.)], অযং সো কো নাম তৱজ্জ ধম্মো.

৫. চণ্ডালপুত্তো মম সম্পদাসি, ধম্মেন মন্তে পকতিঞ্চ সংসি;

মা চস্সু মে পুচ্ছিতো নামগোত্তং, গুয্হিত্থো অত্থং [মা তং (সী. স্যা. পী.)] ৱিজহেয্য মন্তো [ৱিজহেয্যুমন্তা (স্যা.)].

৬. সোহং জনিন্দেন জনম্হি পুট্ঠো, মক্খাভিভূতো অলিকং অভাণিং;

‘‘মন্তা ইমে ব্ৰাহ্মণস্সা’’তি মিচ্ছা, পহীনমন্তো কপণো ৰুদামি.

৭. এৰণ্ডা পুচিমন্দা ৱা, অথ ৱা পালিভদ্দকা;

মধুং মধুত্থিকো ৱিন্দে, সো হি তস্স দুমুত্তমো.

৮. খত্তিযা ব্ৰাহ্মণা ৱেস্সা, সুদ্দা চণ্ডালপুক্কুসা;

যম্হা ধম্মং ৱিজানেয্য, সো হি তস্স নৰুত্তমো.

৯. ইমস্স দণ্ডঞ্চ ৱধঞ্চ দত্ৱা, গলে গহেত্ৱা খলযাথ [বলযাথ (স্যা.), গলযাথ (ক.)] জম্মং;

যো উত্তমত্থং কসিৰেন লদ্ধং, মানাতিমানেন ৱিনাসযিত্থ.

১০. যথা সমং মঞ্ঞমানো পতেয্য, সোব্ভং গুহং নৰকং পূতিপাদং;

ৰজ্জূতি ৱা অক্কমে কণ্হসপ্পং, অন্ধো যথা জোতিমধিট্ঠহেয্য;

এৱম্পি মং ত্ৱং খলিতং সপঞ্ঞ [সপঞ্ঞা (পী.)], পহীনমন্তস্স পুনপ্পদাহি [পুন সম্পদাহি (স্যা.), পুনপ্পসীদ (সী. পী.)].

১১. ধম্মেন মন্তং [মন্তে (সী. স্যা. পী.)] তৱ সম্পদাসিং, তুৱম্পি ধম্মেন [ত্ৱম্পি ধম্মেনেৱ (ক.)] পৰিগ্গহেসি;

পকতিম্পি তে অত্তমনো অসংসিং, ধম্মে ঠিতং তং [পতিট্ঠং (ক.)] ন জহেয্য মন্তো.

১২. যো বাল মন্তং [বলমন্তং (ক.)] কসিৰেন লদ্ধং, যং দুল্লভং অজ্জ মনুস্সলোকে;

কিঞ্চাপি লদ্ধা জীৱিতুং অপ্পপঞ্ঞো [কিচ্ছা লদ্ধং জীৱিকং অপ্পপঞ্ঞো (সী. স্যা.), কচ্ছাপি লদ্ধা জীৱিকং অপ্পঞ্ঞ (পী.)], ৱিনাসযী অলিকং ভাসমানো.

১৩. বালস্স মূড়্হস্স অকতঞ্ঞুনো চ, মুসা ভণন্তস্স অসঞ্ঞতস্স;

মন্তে মযং তাদিসকে ন দেম, কুতো মন্তা গচ্ছ ন ময্হ ৰুচ্চসীতি.

অম্বজাতকং পঠমং.

৪৭৫. ফন্দনজাতকং (২)

১৪. কুঠাৰিহত্থো [কুধাৰিহত্থো (ক.)] পুৰিসো, ৱনমোগয্হ তিট্ঠসি;

পুট্ঠো মে সম্ম অক্খাহি, কিং দাৰুং ছেতুমিচ্ছসি.

১৫. ইস্সো [ইসো (সী.), ঈসো (স্যা. পী.)] ৱনানি চৰসি, সমানি ৱিসমানি চ;

পুট্ঠো মে সম্ম অক্খাহি, কিং দাৰুং নেমিযা দড়্হং.

১৬. নেৱ সালো ন খদিৰো, নাস্সকণ্ণো কুতো ধৱো;

ৰুক্খো চ [ৰুক্খোৱ (সী. পী.)] ফন্দনো নাম, তং দাৰুং নেমিযা দড়্হং.

১৭. কীদিসানিস্স পত্তানি, খন্ধো ৱা পন কীদিসো;

পুট্ঠো মে সম্ম অক্খাহি, যথা জানেমু ফন্দনং.

১৮. যস্স সাখা পলম্বন্তি, নমন্তি ন চ ভঞ্জৰে;

সো ৰুক্খো ফন্দনো নাম, যস্স মূলে অহং ঠিতো.

১৯. অৰানং চক্কনাভীনং, ঈসানেমিৰথস্স চ;

সব্বস্স তে কম্মনিযো, অযং হেস্সতি ফন্দনো.

২০. ইতি ফন্দনৰুক্খোপি, তাৱদে অজ্ঝভাসথ;

ময্হম্পি ৱচনং অত্থি, ভাৰদ্ৱাজ সুণোহি মে.

২১. ইস্সস্স [ইমস্স (ক. সী. ক.)] উপক্খন্ধম্হা [উপখন্ধম্হা (ক. সী. পী. ক.)], উক্কচ্চ চতুৰঙ্গুলং;

তেন নেমিং পসাৰেসি [পৰিহৰেসি (সী. পী.)], এৱং দড়্হতৰং সিযা.

২২. ইতি ফন্দনৰুক্খোপি, ৱেৰং অপ্পেসি তাৱদে;

জাতানঞ্চ অজাতানং, ইস্সানং দুক্খমাৱহি.

২৩. ইচ্চেৱং [ইচ্চেৱ (সী. পী.)] ফন্দনো ইস্সং, ইস্সো চ পন ফন্দনং;

অঞ্ঞমঞ্ঞং ৱিৱাদেন, অঞ্ঞমঞ্ঞমঘাতযুং.

২৪. এৱমেৱ মনুস্সানং, ৱিৱাদো যত্থ জাযতি;

মযূৰনচ্চং নচ্চন্তি, যথা তে ইস্সফন্দনা.

২৫. তং ৱো ৱদামি ভদ্দং ৱো [ভদ্দন্তে (ক.)], যাৱন্তেত্থ সমাগতা;

সম্মোদথ মা ৱিৱদথ [মাৱিৱদিত্থ (সী. স্যা. পী.)], মা হোথ ইস্সফন্দনা.

২৬. সামগ্গিমেৱ [সামগ্যমেৱ (স্যা. ক.)] সিক্খেথ, বুদ্ধেহেতং পসংসিতং;

সামগ্গিৰতো ধম্মট্ঠো, যোগক্খেমা ন ধংসতীতি.

ফন্দনজাতকং দুতিযং.

৪৭৬. জৱনহংসজাতকং (৩)

২৭. ইধেৱ হংস নিপত, পিযং মে তৱ দস্সনং;

ইস্সৰোসি অনুপ্পত্তো, যমিধত্থি পৱেদয.

২৮. সৱনেন একস্স পিযা ভৱন্তি, দিস্ৱা পনেকস্স ৱিযেতি [ৱিনেতি (স্যা.), ৱিহেতি (পী.), ৱিগেতি (ক. অট্ঠ.)] ছন্দো;

দিস্ৱা চ সুত্ৱা চ পিযা ভৱন্তি, কচ্চিন্নু মে পীযসি [পিয্যসি (সী. পী.)] দস্সনেন.

২৯. সৱনেন পিযো মেসি, ভিয্যো চাগম্ম দস্সনং;

এৱং পিযদস্সনো মে [এৱং পিযদস্সনো সমানো (সী. স্যা. পী.)], ৱস হংস মমন্তিকে [মম সন্তিকে (সী. স্যা. পী.)].

৩০. ৱসেয্যাম তৱাগাৰে, নিচ্চং সক্কতপূজিতা;

মত্তো চ একদা ৱজ্জে [ৱজ্জা (সী. পী.)], ‘‘হংসৰাজং পচন্তু মে’’.

৩১. ধিৰত্থু তং মজ্জপানং, যং মে পিযতৰং তযা;

ন চাপি মজ্জং পিস্সামি [পিৱিস্সামি (স্যা.), পাযামি (সী. পী.)], যাৱ মে ৱচ্ছসী ঘৰে.

৩২. সুৱিজানং সিঙ্গালানং, সকুণানঞ্চ [সকুন্তানঞ্চ (সী. স্যা. পী.)] ৱস্সিতং;

মনুস্সৱস্সিতং ৰাজ, দুব্বিজানতৰং ততো.

৩৩. অপি চে মঞ্ঞতী পোসো, ঞাতি মিত্তো সখাতি ৱা;

যো পুব্বে সুমনো হুত্ৱা, পচ্ছা সম্পজ্জতে দিসো.

৩৪. যস্মিং মনো নিৱিসতি, অৱিদূৰে সহাপি সো;

সন্তিকেপি হি সো দূৰে, যস্মিং নাৱিসতে [যস্মা ৱিৱসতে (সী. স্যা. পী.)] মনো.

৩৫. অন্তোপি সো হোতি পসন্নচিত্তো, পাৰং সমুদ্দস্স পসন্নচিত্তো;

অন্তোপি সো হোতি পদুট্ঠচিত্তো, পাৰং সমুদ্দস্স পদুট্ঠচিত্তো.

৩৬. সংৱসন্তা ৱিৱসন্তি, যে দিসা তে ৰথেসভ;

আৰা সন্তো সংৱসন্তি, মনসা ৰট্ঠৱড্ঢন.

৩৭. অতিচিৰং নিৱাসেন, পিযো ভৱতি অপ্পিযো;

আমন্ত খো তং গচ্ছাম [গচ্ছামি (স্যা.)], পুৰা তে হোম অপ্পিযা [হোমি অপ্পিযো (স্যা.)].

৩৮. এৱং চে যাচমানানং, অঞ্জলিং নাৱবুজ্ঝসি;

পৰিচাৰকানং সতং [সন্তানং (সী. স্যা.), সত্তানং (পী.)], ৱচনং ন কৰোসি নো;

এৱং তং অভিযাচাম, পুন কযিৰাসি পৰিযাযং.

৩৯. এৱং চে নো ৱিহৰতং, অন্তৰাযো ন হেস্সতি;

তুয্হঞ্চাপি [ৱাপি (স্যা. পী. ক.)] মহাৰাজ, ময্হঞ্চ [ৱা (বহূসু)] ৰট্ঠৱড্ঢন;

অপ্পেৱ নাম পস্সেমু [পস্সেম (সী. স্যা. পী.)], অহোৰতানমচ্চযেতি.

জৱনহংসজাতকং ততিযং.

৪৭৭. চূড়নাৰদজাতকং (৪)

৪০. ন তে কট্ঠানি ভিন্নানি, ন তে উদকমাভতং;

অগ্গীপি তে ন হাপিতো [হাসিতো (সী. স্যা.)], কিং নু মন্দোৱ ঝাযসি.

৪১. ন উস্সহে ৱনে ৱত্থুং, কস্সপামন্তযামি তং;

দুক্খো ৱাসো অৰঞ্ঞস্মিং, ৰট্ঠং ইচ্ছামি গন্তৱে.

৪২. যথা অহং ইতো গন্ত্ৱা, যস্মিং জনপদে ৱসং;

আচাৰং ব্ৰহ্মে [ব্ৰহ্মং (ক.)] সিক্খেয্যং, তং ধম্মং অনুসাস মং.

৪৩. সচে অৰঞ্ঞং হিত্ৱান, ৱনমূলফলানি চ;

ৰট্ঠে ৰোচযসে ৱাসং, তং ধম্মং নিসামেহি মে.

৪৪. ৱিসং মা পটিসেৱিত্থো [পটিসেৱিত্থ (স্যা. ক.)], পপাতং পৰিৱজ্জয;

পঙ্কে চ মা ৱিসীদিত্থো [পঙ্কো চ মা ৱিসিযিত্থো (ক.)], যত্তো চাসীৱিসে চৰে.

৪৫. কিং নু ৱিসং পপাতো ৱা, পঙ্কো ৱা ব্ৰহ্মচাৰিনং;

কং ত্ৱং আসীৱিসং ব্ৰূসি, তং মে অক্খাহি পুচ্ছিতো;

৪৬. আসৱো তাত লোকস্মিং, সুৰা নাম পৱুচ্চতি;

মনুঞ্ঞো [মনুঞ্ঞা (সী. স্যা. পী.)] সুৰভী ৱগ্গু, সাদু [মধু (সী. স্যা.)] খুদ্দৰসূপমো [ৰসূপমা (সী. স্যা. পী.)];

ৱিসং তদাহু অৰিযা সে, ব্ৰহ্মচৰিযস্স নাৰদ.

৪৭. ইত্থিযো তাত লোকস্মিং, পমত্তং পমথেন্তি তা;

হৰন্তি যুৱিনো চিত্তং, তূলং ভট্ঠংৱ মালুতো;

পপাতো এসো অক্খাতো, ব্ৰহ্মচৰিযস্স নাৰদ.

৪৮. লাভো সিলোকো সক্কাৰো, পূজা পৰকুলেসু চ;

পঙ্কো এসো চ [এসোৱ (সী. স্যা. পী.)] অক্খাতো, ব্ৰহ্মচৰিযস্স নাৰদ.

৪৯. সসত্থা [মহন্তা (স্যা. ক.)] তাত ৰাজানো, আৱসন্তি মহিং ইমং;

তে তাদিসে মনুস্সিন্দে, মহন্তে তাত নাৰদ.

৫০. ইস্সৰানং অধিপতীনং, ন তেসং পাদতো চৰে;

আসীৱিসোতি [আসীৱিসো সো (সী. পী.)] অক্খাতো, ব্ৰহ্মচৰিযস্স নাৰদ.

৫১. ভত্তত্থো ভত্তকালে চ [যং (সী. পী.)], যং গেহমুপসঙ্কমে;

যদেত্থ কুসলং জঞ্ঞা, তত্থ ঘাসেসনং চৰে.

৫২. পৱিসিত্ৱা পৰকুলং, পানত্থং [পানত্থো (স্যা. পী.)] ভোজনায ৱা;

মিতং খাদে মিতং ভুঞ্জে, ন চ ৰূপে মনং কৰে.

৫৩. গোট্ঠং মজ্জং কিৰাটঞ্চ [কিৰাসঞ্চ (সী. স্যা.), কিৰাসং ৱা (পী.)], সভা নিকিৰণানি চ;

আৰকা পৰিৱজ্জেহি, যানীৱ ৱিসমং পথন্তি.

চূড়নাৰদজাতকং চতুত্থং.

৪৭৮. দূতজাতকং (৫)

৫৪. দূতে তে ব্ৰহ্মে [দূতে ব্ৰাহ্মণ (ক.)] পাহেসিং, গঙ্গাতীৰস্মি ঝাযতো;

তেসং পুট্ঠো ন ব্যাকাসি, দুক্খং গুয্হমতং [গুয্হং মতং (সী.), তুয্হং মতং (স্যা. ক.)] নু তে.

৫৫. সচে তে দুক্খমুপ্পজ্জে, কাসীনং ৰট্ঠৱড্ঢন;

মা খো নং তস্স অক্খাহি, যো তং দুক্খা ন মোচযে.

৫৬. যো তস্স [যো চ তথা (পী.)] দুক্খজাতস্স, একঙ্গমপি ভাগসো [একন্তমপি ভাসতো (সী. পী.)];

ৱিপ্পমোচেয্য ধম্মেন, কামং তস্স পৱেদয [পৱেদযে (সী.)].

৫৭. সুৱিজানং সিঙ্গালানং, সকুণানঞ্চ ৱস্সিতং;

মনুস্সৱস্সিতং ৰাজ, দুব্বিজানতৰং ততো.

৫৮. অপি চে মঞ্ঞতী পোসো, ঞাতি মিত্তো সখাতি ৱা;

যো পুব্বে সুমনো হুত্ৱা, পচ্ছা সম্পজ্জতে দিসো.

৫৯. যো অত্তনো দুক্খমনানুপুট্ঠো, পৱেদযে জন্তু অকালৰূপে;

আনন্দিনো তস্স ভৱন্তিমিত্তা [ভৱন্ত’মিত্তা (সী. পী.)], হিতেসিনো তস্স দুখী ভৱন্তি.

৬০. কালঞ্চ ঞত্ৱান তথাৱিধস্স, মেধাৱীনং একমনং ৱিদিত্ৱা;

অক্খেয্য তিব্বানি [তিপ্পানি (সী. স্যা. পী.)] পৰস্স ধীৰো, সণ্হং গিৰং অত্থৱতিং পমুঞ্চে.

৬১. সচে চ জঞ্ঞা অৱিসয্হমত্তনো, ন তে হি ময্হং [নাযং নীতি ময্হ (সী. পী.)] সুখাগমায;

একোৱ তিব্বানি সহেয্য ধীৰো, সচ্চং হিৰোত্তপ্পমপেক্খমানো.

৬২. অহং ৰট্ঠানি ৱিচৰন্তো, নিগমে ৰাজধানিযো;

ভিক্খমানো মহাৰাজ, আচৰিযস্স ধনত্থিকো.

৬৩. গহপতী ৰাজপুৰিসে, মহাসালে চ ব্ৰাহ্মণে;

অলত্থং সত্ত নিক্খানি, সুৱণ্ণস্স জনাধিপ;

তে মে নট্ঠা মহাৰাজ, তস্মা সোচামহং ভুসং.

৬৪. পুৰিসা তে মহাৰাজ, মনসানুৱিচিন্তিতা;

নালং দুক্খা পমোচেতুং, তস্মা তেসং ন ব্যাহৰিং.

৬৫. ত্ৱঞ্চ খো মে মহাৰাজ, মনসানুৱিচিন্তিতো;

অলং দুক্খা পমোচেতুং, তস্মা তুয্হং পৱেদযিং.

৬৬. তস্সাদাসি পসন্নত্তো, কাসীনং ৰট্ঠৱড্ঢনো;

জাতৰূপমযে নিক্খে, সুৱণ্ণস্স চতুদ্দসাতি.

দূতজাতকং পঞ্চমং.

৪৭৯. কালিঙ্গবোধিজাতকং (৬)