৪৮২. ৰুৰুমিগৰাজজাতকং (৯)

১১৭. তস্স [কস্স (সী. পী.)] গামৱৰং দম্মি, নাৰিযো চ অলঙ্কতা;

যো [কো (সী. স্যা. পী.)] মেতং মিগমক্খাতি [মক্খাসি (স্যা. ক.)], মিগানং মিগমুত্তমং.

১১৮. ময্হং গামৱৰং দেহি, নাৰিযো চ অলঙ্কতা;

অহং তে মিগমক্খিস্সং, মিগানং মিগমুত্তমং.

১১৯. এতস্মিং ৱনসণ্ডস্মিং, অম্বা সালা চ পুপ্ফিতা;

ইন্দগোপকসঞ্ছন্না, এত্থেসো তিট্ঠতে মিগো.

১২০. ধনুং অদ্ৱেজ্ঝং [অদেজ্ঝং (সী. পী.), সৰজ্জং (ক.)] কত্ৱান, উসুং সন্নয্হুপাগমি [সন্ধাযুপাগমি (সী. পী.)];

মিগো চ দিস্ৱা ৰাজানং, দূৰতো অজ্ঝভাসথ.

১২১. আগমেহি মহাৰাজ, মা মং ৱিজ্ঝি ৰথেসভ;

কো নু তে ইদমক্খাসি, এত্থেসো তিট্ঠতে মিগো.

১২২. এস পাপচৰো পোসো, সম্ম তিট্ঠতি আৰকা;

সোযং [সো হি (সী. স্যা. পী.)] মে ইদমক্খাসি, এত্থেসো তিট্ঠতে মিগো.

১২৩. সচ্চং কিৰেৱ মাহংসু, নৰা একচ্চিযা ইধ;

কট্ঠং নিপ্লৱিতং সেয্যো, ন ত্ৱেৱেকচ্চি যো নৰো.

১২৪. কিং নু ৰুৰু গৰহসি মিগানং, কিং পক্খীনং কিং পন মানুসানং;

ভযঞ্হি মং ৱিন্দতিনপ্পৰূপং, সুত্ৱান তং মানুসিং ভাসমানং.

১২৫. যমুদ্ধৰিং ৱাহনে ৱুয্হমানং, মহোদকে সলিলে সীঘসোতে;

ততোনিদানং ভযমাগতং মম, দুক্খো হৱে ৰাজ অসব্ভি সঙ্গমো.

১২৬. সোহং চতুপ্পত্তমিমং ৱিহঙ্গমং, তনুচ্ছিদং হদযে ওস্সজামি;

হনামি তং মিত্তদুব্ভিং অকিচ্চকাৰিং [হনামি মিত্তদ্দু’মকিচ্চকাৰিং (সী. পী.)], যো তাদিসং কম্মকতং ন জানে.

১২৭. ধীৰস্স বালস্স হৱে জনিন্দ, সন্তো ৱধং নপ্পসংসন্তি জাতু;

কামং ঘৰং গচ্ছতু পাপধম্মো, যঞ্চস্স ভট্ঠং তদেতস্স দেহি;

অহঞ্চ তে কামকৰো ভৱামি.

১২৮. অদ্ধা ৰুৰু অঞ্ঞতৰো সতং সো [সতং’সে (সী.)], যো দুব্ভতো [দুব্ভিনো (স্যা.), দূভতো (পী.)] মানুসস্স ন দুব্ভি;

কামং ঘৰং গচ্ছতু পাপধম্মো, যঞ্চস্স ভট্ঠং তদেতস্স দম্মি;

অহঞ্চ তে কামচাৰং দদামি.

১২৯. সুৱিজানং সিঙ্গালানং, সকুণানঞ্চৱস্সিতং;

মনুস্সৱস্সিতং ৰাজ, দুব্বিজানতৰং ততো.

১৩০. অপি চে মঞ্ঞতী পোসো, ঞাতি মিত্তো সখাতি ৱা;

যো পুব্বে সুমনো হুত্ৱা, পচ্ছা সম্পজ্জতে দিসো.

১৩১. সমাগতা জানপদা, নেগমা চ সমাগতা;

মিগা সস্সানি খাদন্তি, তং দেৱো পটিসেধতু.

১৩২. কামং জনপদো মাসি, ৰট্ঠঞ্চাপি ৱিনস্সতু;

ন ত্ৱেৱাহং ৰুৰুং দুব্ভে, দত্ৱা অভযদক্খিণং.

১৩৩. মা মে জনপদো আসি [মা মং জনপদো অহু (স্যা.)], ৰট্ঠঞ্চাপি ৱিনস্সতু;

ন ত্ৱেৱাহং [ন ত্ৱেৱ (ক. সী. ক.)] মিগৰাজস্স, ৱৰং দত্ৱা মুসা ভণেতি.

ৰুৰুমিগৰাজজাতকং নৱমং.