৪৭১. মেণ্ডকপঞ্হজাতকং (৮)

৯৪. যেসং ন কদাচি ভূতপুব্বং, সখ্যং [সক্খিং (সী. পী.), সখি (স্যা.)] সত্তপদম্পিমস্মি লোকে;

জাতা অমিত্তা দুৱে সহাযা, পটিসন্ধায চৰন্তি কিস্স হেতু.

৯৫. যদি মে অজ্জ পাতৰাসকালে, পঞ্হং ন সক্কুণেয্যাথ ৱত্তুমেতং;

ৰট্ঠা পব্বাজযিস্সামি ৱো সব্বে, ন হি মত্থো দুপ্পঞ্ঞজাতিকেহি.

৯৬. মহাজনসমাগমম্হি ঘোৰে, জনকোলাহলসঙ্গমম্হি জাতে;

ৱিক্খিত্তমনা অনেকচিত্তা, পঞ্হং ন সক্কুণোম ৱত্তুমেতং.

৯৭. একগ্গচিত্তাৱ একমেকা, ৰহসি গতা অত্থং নিচিন্তযিত্ৱা [অত্থানি চিন্তযিত্ৱা (স্যা. ক.)];

পৱিৱেকে সম্মসিত্ৱান ধীৰা, অথ ৱক্খন্তি জনিন্দ এতমত্থং.

৯৮. উগ্গপুত্ত-ৰাজপুত্তিযানং, উৰব্ভস্স মংসং পিযং মনাপং;

ন সুনখস্স তে অদেন্তি মংসং, অথ মেণ্ডস্স সুণেন সখ্যমস্স.

৯৯. চম্মং ৱিহনন্তি এড়কস্স, অস্সপিট্ঠত্থৰস্সুখস্স [অস্সপিট্ঠত্থৰণসুখস্স (সী.)] হেতু;

ন চ তে সুনখস্স অত্থৰন্তি, অথ মেণ্ডস্স সুণেন সখ্যমস্স.

১০০. আৱেল্লিতসিঙ্গিকো হি মেণ্ডো, ন চ সুনখস্স ৱিসাণকানি অত্থি;

তিণভক্খো মংসভোজনো চ, অথ মেণ্ডস্স সুণেন সখ্যমস্স.

১০১. তিণমাসি পলাসমাসি মেণ্ডো, ন চ সুনখো তিণমাসি নো পলাসং;

গণ্হেয্য সুণো সসং বিড়াৰং, অথ মেণ্ডস্স সুণেন সখ্যমস্স.

১০২. অট্ঠড্ঢপদো চতুপ্পদস্স, মেণ্ডো অট্ঠনখো অদিস্সমানো;

ছাদিযমাহৰতী অযং ইমস্স, মংসং আহৰতী অযং অমুস্স.

১০৩. পাসাদৱৰগতো ৱিদেহসেট্ঠো, ৱিতিহাৰং অঞ্ঞমঞ্ঞভোজনানং;

অদ্দক্খি [অদ্দস (স্যা. ক.)] কিৰ সক্খিকং জনিন্দো, বুভুক্কস্স পুণ্ণং মুখস্স [ভোভুক্খস্স চ পুণ্ণমুখস্স (সী.)] চেতং.

১০৪. লাভা ৱত মে অনপ্পৰূপা, যস্স মেদিসা পণ্ডিতা কুলম্হি;

পঞ্হস্স গম্ভীৰগতং নিপুণমত্থং, পটিৱিজ্ঝন্তি সুভাসিতেন ধীৰা.

১০৫. অস্সতৰিৰথঞ্চ একমেকং, ফীতং গামৱৰঞ্চ একমেকং;

সব্বেসং ৱো দম্মি পণ্ডিতানং, পৰমপ্পতীতমনো সুভাসিতেনাতি.

মেণ্ডকপঞ্হজাতকং অট্ঠমং.