৪৭২. মহাপদুমজাতকং (৯)

১০৬. নাদট্ঠা [নাদিট্ঠা (ক. সী. স্যা. ক.)] পৰতো দোসং, অণুং থূলানি সব্বসো;

ইস্সৰো পণযে দণ্ডং, সামং অপ্পটিৱেক্খিয.

১০৭. যো চ অপ্পটিৱেক্খিত্ৱা, দণ্ডং কুব্বতি খত্তিযো;

সকণ্টকং সো গিলতি, জচ্চন্ধোৱ সমক্খিকং.

১০৮. অদণ্ডিযং দণ্ডযতি [দণ্ডিযতি (স্যা. পী.)], দণ্ডিযঞ্চ অদণ্ডিযং [অদণ্ডিয (নিয্য), ন দণ্ডযে (?)];

অন্ধোৱ ৱিসমং মগ্গং, ন জানাতি সমাসমং.

১০৯. যো চ এতানি ঠানানি, অণুং থূলানি সব্বসো;

সুদিট্ঠমনুসাসেয্য, স ৱে ৱোহৰিতু [ৱোহাতু (পী.)] মৰহতি.

১১০. নেকন্তমুদুনা সক্কা, একন্ততিখিণেন ৱা;

অত্তং মহন্তে [মহত্তে (স্যা. ক.)] ঠপেতুং [ঠাপেতুং (সী. স্যা. পী.)], তস্মা উভযমাচৰে.

১১১. পৰিভূতো মুদু হোতি, অতিতিক্খো চ ৱেৰৱা;

এতঞ্চ উভযং ঞত্ৱা, অনুমজ্ঝং সমাচৰে.

১১২. বহুম্পি ৰত্তো ভাসেয্য, দুট্ঠোপি বহু ভাসতি;

ন ইত্থিকাৰণা ৰাজ, পুত্তং ঘাতেতুমৰহসি.

১১৩. সব্বোৱ [সব্বো চ (ক. সী. পী.)] লোকো একতো [একন্তো (সী. পী.)], ইত্থী চ অযমেকিকা;

তেনাহং পটিপজ্জিস্সং, গচ্ছথ পক্খিপথেৱ [পক্খিপেথ (স্যা. অট্ঠ.)] তং.

১১৪. অনেকতালে নৰকে, গম্ভীৰে চ সুদুত্তৰে [গম্ভীৰে সুদুৰুত্তৰে (পী. ক.)];

পাতিতো গিৰিদুগ্গস্মিং, কেন ত্ৱং তত্থ নামৰি.

১১৫. নাগো জাতফণো তত্থ, থামৱা গিৰিসানুজো;

পচ্চগ্গহি মং ভোগেহি, তেনাহং তত্থ নামৰিং.

১১৬. এহি তং পটিনেস্সামি, ৰাজপুত্ত সকং ঘৰং;

ৰজ্জং কাৰেহি [কাৰেসি (সী.)] ভদ্দন্তে, কিং অৰঞ্ঞে কৰিস্সসি.

১১৭. যথা গিলিত্ৱা বড়িসং, উদ্ধৰেয্য সলোহিতং;

উদ্ধৰিত্ৱা সুখী অস্স, এৱং [সুখং (পী. ক.)] পস্সামি অত্তনং [অত্তনি (পী. ক.), অত্তনা (স্যা.), এৱং অহম্পি পুন সোত্থিভাৱপ্পত্তং গিলিতবড়িসং পুৰিসমিৱ অত্তানং পস্সামীতি (অট্ঠ. সংৱণ্ণনা)].

১১৮. কিং নু ত্ৱং বড়িসং ব্ৰূসি, কিং ত্ৱং ব্ৰূসি সলোহিতং;

কিং নু ত্ৱং উব্ভতং ব্ৰূসি, তং মে অক্খাহি পুচ্ছিতো.

১১৯. কামাহং বড়িসং ব্ৰূমি, হত্থিঅস্সং সলোহিতং;

চত্তাহং উব্ভতং ব্ৰূমি, এৱং জানাহি খত্তিয.

১২০. চিঞ্চামাণৱিকা মাতা, দেৱদত্তো চ মে পিতা;

আনন্দো পণ্ডিতো নাগো, সাৰিপুত্তো চ দেৱতা;

ৰাজপুত্তো অহং আসিং [অহং তদা ৰাজপুত্তো (সী. স্যা. পী.)], এৱং ধাৰেথ জাতকন্তি.

মহাপদুমজাতকং নৱমং.