১২. দ্ৱাদসকনিপাতো

৪৬৪. চূড়কুণালজাতকং (১)

১. লুদ্ধানং [খুদ্দানং (সী. স্যা. পী.)] লহুচিত্তানং, অকতঞ্ঞূন দুব্ভিনং;

নাদেৱসত্তো পুৰিসো, থীনং সদ্ধাতুমৰহতি.

২. ন তা পজানন্তি কতং ন কিচ্চং, ন মাতৰং পিতৰং ভাতৰং ৱা;

অনৰিযা সমতিক্কন্তধম্মা, সস্সেৱ চিত্তস্স ৱসং ৱজন্তি.

৩. চিৰানুৱুট্ঠম্পি [চিৰানুৱুত্থম্পি (সী. পী.)] পিযং মনাপং, অনুকম্পকং পাণসমম্পি ভত্তুং [সন্তং (সী. স্যা. পী.)];

আৱাসু কিচ্চেসু চ নং জহন্তি, তস্মাহমিত্থীনং ন ৱিস্সসামি.

৪. থীনঞ্হি চিত্তং যথা ৱানৰস্স, কন্নপ্পকন্নং যথা ৰুক্খছাযা;

চলাচলং হদযমিত্থিযানং, চক্কস্স নেমি ৱিয পৰিৱত্ততি.

৫. যদা তা পস্সন্তি সমেক্খমানা, আদেয্যৰূপং পুৰিসস্স ৱিত্তং;

সণ্হাহি ৱাচাহি নযন্তি মেনং, কম্বোজকা জলজেনেৱ অস্সং.

৬. যদা ন পস্সন্তি সমেক্খমানা, আদেয্যৰূপং পুৰিসস্স ৱিত্তং;

সমন্ততো নং পৰিৱজ্জযন্তি, তিণ্ণো নদীপাৰগতোৱ কুল্লং.

৭. সিলেসূপমা সিখিৰিৱ সব্বভক্খা, তিক্খমাযা নদীৰিৱ সীঘসোতা;

সেৱন্তি হেতা পিযমপ্পিযঞ্চ, নাৱা যথা ওৰকূলং পৰঞ্চ.

৮. ন তা একস্স ন দ্ৱিন্নং, আপণোৱ পসাৰিতো;

যো তা ময্হন্তি মঞ্ঞেয্য, ৱাতং জালেন বাধযে [বন্ধযে (স্যা. ক.)].

৯. যথা নদী চ পন্থো চ, পানাগাৰং সভা পপা;

এৱং লোকিত্থিযো নাম, ৱেলা তাসং ন ৱিজ্জতি [ইমিস্সা গাথায পুব্বদ্ধাপৰদ্ধং ৱিপৰিযাযেন দিস্সতি (ক.)].

১০. ঘতাসনসমা এতা, কণ্হসপ্পসিৰূপমা;

গাৱো বহিতিণস্সেৱ, ওমসন্তি ৱৰং ৱৰং.

১১. ঘতাসনং কুঞ্জৰং কণ্হসপ্পং, মুদ্ধাভিসিত্তং পমদা চ সব্বা;

এতে নৰো নিচ্চযতো [নিচ্চযত্তো (সী. পী.)] ভজেথ, তেসং হৱে দুব্বিদু সব্বভাৱো [সচ্চভাৱো (স্যা.)].

১২. নচ্চন্তৱণ্ণা ন বহূনং কন্তা, ন দক্খিণা পমদা সেৱিতব্বা;

ন পৰস্স ভৰিযা ন ধনস্স হেতু, এতিত্থিযো পঞ্চ ন সেৱিতব্বাতি.

চূড়কুণালজাতকং পঠমং.

৪৬৫. ভদ্দসালজাতকং (২)

১৩. কা ত্ৱং সুদ্ধেহি ৱত্থেহি, অঘে ৱেহাযসং [ৱেহাসযং (সী. পী.)] ঠিতা;

কেন ত্যাস্সূনি ৱত্তন্তি, কুতো তং ভযমাগতং.

১৪. তৱেৱ দেৱ ৱিজিতে, ভদ্দসালোতি মং ৱিদূ;

সট্ঠি [সট্ঠিং (সী. পী.)] ৱস্সসহস্সানি, তিট্ঠতো পূজিতস্স মে.

১৫. কাৰযন্তা নগৰানি, অগাৰে চ দিসম্পতি;

ৱিৱিধে চাপি পাসাদে, ন মং তে অচ্চমঞ্ঞিসুং;

যথেৱ মং তে পূজেসুং, তথেৱ ত্ৱম্পি পূজয.

১৬. তং ইৱাহং [তঞ্চ অহং (সী. স্যা. পী.)] ন পস্সামি, থূলং কাযেন তে দুমং;

আৰোহপৰিণাহেন, অভিৰূপোসি জাতিযা.

১৭. পাসাদং কাৰযিস্সামি, একত্থম্ভং মনোৰমং;

তত্থ তং উপনেস্সামি, চিৰং তে যক্খ জীৱিতং.

১৮. এৱং চিত্তং উদপাদি, সৰীৰেন ৱিনাভাৱো;

পুথুসো মং ৱিকন্তিত্ৱা, খণ্ডসো অৱকন্তথ.

১৯. অগ্গে চ ছেত্ৱা মজ্ঝে চ, পচ্ছা মূলম্হি ছিন্দথ [মূলঞ্চ ছিন্দথ (সী.), মূলং ৱিছিন্দথ (পী.)];

এৱং মে ছিজ্জমানস্স, ন দুক্খং মৰণং সিযা.

২০. হত্থপাদং [হত্থপাদে (ক.)] যথা ছিন্দে [ছিন্নে (ক.)], কণ্ণনাসঞ্চ জীৱতো;

ততো পচ্ছা সিৰো ছিন্দে, তং দুক্খং মৰণং সিযা.

২১. সুখং নু খণ্ডসো ছিন্নং, ভদ্দসালৱনপ্পতি;

কিং হেতু কিং উপাদায, খণ্ডসো ছিন্নমিচ্ছসি.

২২. যঞ্চ হেতুমুপাদায, হেতুং ধম্মূপসংহিতং;

খণ্ডসো ছিন্নমিচ্ছামি, মহাৰাজ সুণোহি মে.

২৩. ঞাতী মে সুখসংৱদ্ধা, মম পস্সে নিৱাতজা;

তেপিহং উপহিংসেয্যং, পৰেসং অসুখোচিতং.

২৪. চেতেয্যৰূপং [চেতব্বৰূপং (সী. পী.)] চেতেসি, ভদ্দসালৱনপ্পতি;

হিতকামোসি ঞাতীনং, অভযং সম্ম দম্মি তেতি.

ভদ্দসালজাতকং দুতিযং.

৪৬৬. সমুদ্দৱাণিজজাতকং (৩)

২৫. কসন্তি ৱপন্তি তে জনা, মনুজা কম্মফলূপজীৱিনো;

নযিমস্স দীপকস্স ভাগিনো, জম্বুদীপা ইদমেৱ নো ৱৰং.

২৬. তিপঞ্চৰত্তূপগতম্হি চন্দে, ৱেগো মহা হেহিতি সাগৰস্স;

উপ্লৱিস্সং দীপমিমং উড়াৰং, মা ৱো ৱধী গচ্ছথ লেণমঞ্ঞং.

২৭. ন জাতুযং সাগৰৱাৰিৱেগো, উপ্লৱিস্সং দীপমিমং উড়াৰং;

তং মে নিমিত্তেহি বহূহি দিট্ঠং, মা ভেথ কিং সোচথ মোদথৱ্হো [মোদথ ৱো (ক.) ৬.৩৮ মোগ্গল্লানসুত্তং পস্সিতব্বং].

২৮. পহূতভক্খং বহুঅন্নপানং, পত্তত্থ আৱাসমিমং উড়াৰং;

ন ৱো ভযং পটিপস্সামি কিঞ্চি, আপুত্তপুত্তেহি পমোদথৱ্হো.

২৯. যো দেৱোযং দক্খিণাযং [দক্খিণস্সং (সী.)] দিসাযং, খেমন্তি পক্কোসতি তস্স সচ্চং;

ন উত্তৰো ৱেদি ভযাভযস্স, মা ভেথ কিং সোচথ মোদথৱ্হো.

৩০. যথা ইমে ৱিপ্পৱদন্তি যক্খা, একো ভযং সংসতি খেমমেকো;

তদিঙ্ঘ ময্হং ৱচনং সুণাথ, খিপ্পং লহুং মা ৱিনস্সিম্হ সব্বে.

৩১. সব্বে সমাগম্ম কৰোম নাৱং, দোণিং দড়্হং সব্বযন্তূপপন্নং;

সচে অযং দক্খিণো সচ্চমাহ, মোঘং পটিক্কোসতি উত্তৰোযং;

সা চেৱ নো হেহিতি আপদত্থা, ইমঞ্চ দীপং ন পৰিচ্চজেম.

৩২. সচে চ খো উত্তৰো সচ্চমাহ, মোঘং পটিক্কোসতি দক্খিণোযং;

তমেৱ নাৱং অভিৰুয্হ সব্বে, এৱং মযং সোত্থি তৰেমু পাৰং.

৩৩. ন ৱে সুগণ্হং পঠমেন সেট্ঠং, কনিট্ঠমাপাথগতং গহেত্ৱা;

যো চীধ তচ্ছং [মজ্ঝং (সী. স্যা. পী.)] পৱিচেয্য গণ্হতি [গণ্হি (ক.)], স ৱে নৰো সেট্ঠমুপেতি ঠানং.

৩৪. যথাপি তে সাগৰৱাৰিমজ্ঝে, সকম্মুনা সোত্থি ৱহিংসু ৱাণিজা;

অনাগতত্থং পটিৱিজ্ঝিযান, অপ্পম্পি নাচ্চেতি স ভূৰিপঞ্ঞো.

৩৫. বালা চ মোহেন ৰসানুগিদ্ধা, অনাগতং অপ্পটিৱিজ্ঝিযত্থং;

পচ্চুপ্পন্নে সীদন্তি অত্থজাতে, সমুদ্দমজ্ঝে যথা তে মনুস্সা.

৩৬. অনাগতং পটিকযিৰাথ কিচ্চং, ‘‘মা মং কিচ্চং কিচ্চকালে ব্যধেসি’’;

তং তাদিসং পটিকত [পটিকতং (ক.), পটিগত (সী. অট্ঠ.), পটিকচ্চ (?)] কিচ্চকাৰিং, ন তং কিচ্চং কিচ্চকালে ব্যধেতীতি.

সমুদ্দৱাণিজজাতকং ততিযং.

৪৬৭. কামজাতকং (৪)

৩৭. কামং কামযমানস্স, তস্স চে তং সমিজ্ঝতি;

অদ্ধা পীতিমনো হোতি, লদ্ধা মচ্চো যদিচ্ছতি.

৩৮. কামং কামযমানস্স, তস্স চে তং সমিজ্ঝতি;

ততো নং অপৰং কামে, ধম্মে তণ্হংৱ ৱিন্দতি.

৩৯. গৱংৱ সিঙ্গিনো সিঙ্গং, ৱড্ঢমানস্স ৱড্ঢতি;

এৱং মন্দস্স পোসস্স, বালস্স অৱিজানতো;

ভিয্যো তণ্হা পিপাসা চ, ৱড্ঢমানস্স ৱড্ঢতি.

৪০. পথব্যা সালিযৱকং, গৱস্সং [গৱাসং (সী. স্যা. পী.)] দাসপোৰিসং;

দত্ৱা চ [দত্ৱাপি (সী. স্যা.), দত্ৱা ৱা (পী.)] নালমেকস্স, ইতি ৱিদ্ৱা [ৱিদ্ধা (স্যা.)] সমং চৰে.

৪১. ৰাজা পসয্হ পথৱিং ৱিজিত্ৱা, সসাগৰন্তং মহিমাৱসন্তো;

ওৰং সমুদ্দস্স অতিত্তৰূপো [অতিত্তিৰূপো (ক.)], পাৰং সমুদ্দস্সপি পত্থযেথ.

৪২. যাৱ অনুস্সৰং কামে, মনসা তিত্তি নাজ্ঝগা;

ততো নিৱত্তা পটিকম্ম দিস্ৱা, তে ৱে সুতিত্তা যে [তিত্তা (সী. স্যা. পী.)] পঞ্ঞায তিত্তা.

৪৩. পঞ্ঞায তিত্তিনং [তিত্তীনং (সী. স্যা.)] সেট্ঠং, ন সো কামেহি তপ্পতি;

পঞ্ঞায তিত্তং পুৰিসং, তণ্হা ন কুৰুতে ৱসং.

৪৪. অপচিনেথেৱ কামানং [কামানি (সী. স্যা. পী.)], অপ্পিচ্ছস্স অলোলুপো;

সমুদ্দমত্তো পুৰিসো, ন সো কামেহি তপ্পতি.

৪৫. ৰথকাৰোৱ চম্মস্স, পৰিকন্তং উপাহনং;

যং যং চজতি [জহতি (স্যা. ক.)] কামানং, তং তং সম্পজ্জতে সুখং;

সব্বং চে সুখমিচ্ছেয্য, সব্বে কামে পৰিচ্চজে.

৪৬. অট্ঠ তে ভাসিতা গাথা, সব্বা হোন্তি সহস্সিযো [সহস্সিযা (?) উপৰি সুতসোমজাতকে তথা দিস্সতি];

পটিগণ্হ মহাব্ৰহ্মে, সাধেতং তৱ ভাসিতং.

৪৭. ন মে অত্থো সহস্সেহি, সতেহি নহুতেহি ৱা;

পচ্ছিমং ভাসতো গাথং, কামে মে ন ৰতো মনো.

৪৮. ভদ্ৰকো [সদ্দো (সী.)] ৱতাযং মাণৱকো, সব্বলোকৱিদূ মুনি;

যো ইমং তণ্হং [যো তণ্হং (সী. স্যা.)] দুক্খজননিং, পৰিজানাতি পণ্ডিতোতি.

কামজাতকং চতুত্থং.

৪৬৮. জনসন্ধজাতকং (৫)

৪৯. দস খলু ইমানি [খলুমানি (স্যা.)] ঠানানি, যানি পুব্বে অকৰিত্ৱা;

স পচ্ছা মনুতপ্পতি, ইচ্চেৱাহ [ইচ্চাহ ৰাজা (সী. স্যা. পী.)] জনসন্ধো.

৫০. অলদ্ধা ৱিত্তং তপ্পতি, পুব্বে অসমুদানিতং;

ন পুব্বে ধনমেসিস্সং, ইতি পচ্ছানুতপ্পতি.

৫১. সক্যৰূপং পুৰে সন্তং, মযা সিপ্পং ন সিক্খিতং;

কিচ্ছা ৱুত্তি অসিপ্পস্স, ইতি পচ্ছানুতপ্পতি.

৫২. কূটৱেদী পুৰে আসিং, পিসুণো পিট্ঠিমংসিকো;

চণ্ডো চ ফৰুসো চাপি [চাসিং (সী. স্যা. পী.)], ইতি পচ্ছানুতপ্পতি.

৫৩. পাণাতিপাতী পুৰে আসিং, লুদ্দো চাপি [চাসিং (সী. পী.)] অনাৰিযো;

ভূতানং নাপচাযিস্সং, ইতি পচ্ছানুতপ্পতি.

৫৪. বহূসু ৱত সন্তীসু, অনাপাদাসু ইত্থিসু;

পৰদাৰং অসেৱিস্সং, ইতি পচ্ছানুতপ্পতি.

৫৫. বহুম্হি ৱত সন্তম্হি, অন্নপানে উপট্ঠিতে;

ন পুব্বে অদদং [অদদিং (সী.)] দানং, ইতি পচ্ছানুতপ্পতি.

৫৬. মাতৰং পিতৰঞ্চাপি, জিণ্ণকং গতযোব্বনং [জিণ্ণকে গতযোব্বনে (সী. স্যা. পী.)];

পহু সন্তো ন পোসিস্সং, ইতি পচ্ছানুতপ্পতি.

৫৭. আচৰিযমনুসত্থাৰং, সব্বকামৰসাহৰং;

পিতৰং অতিমঞ্ঞিস্সং, ইতি পচ্ছানুতপ্পতি.

৫৮. সমণে ব্ৰাহ্মণে চাপি, সীলৱন্তে বহুস্সুতে;

ন পুব্বে পযিৰুপাসিস্সং, ইতি পচ্ছানুতপ্পতি.

৫৯. সাধু হোতি তপো চিণ্ণো, সন্তো চ পযিৰুপাসিতো;

ন চ পুব্বে তপো চিণ্ণো, ইতি পচ্ছানুতপ্পতি.

৬০. যো চ এতানি ঠানানি, যোনিসো পটিপজ্জতি;

কৰং পুৰিসকিচ্চানি, স পচ্ছা নানুতপ্পতীতি.

জনসন্ধজাতকং পঞ্চমং.

৪৬৯. মহাকণ্হজাতকং (৬)

৬১. কণ্হো কণ্হো চ ঘোৰো চ, সুক্কদাঠো পভাসৱা [পতাপৱা (সী. স্যা. পী.)];

বদ্ধো পঞ্চহি ৰজ্জূহি, কিং ৰৱি [ধীৰ (সী. পী.), ৱীৰ (স্যা.)] সুনখো তৱ.

৬২. নাযং মিগানমত্থায, উসীনক [উসীনৰ (সী. পী.), উসীন্নৰ (স্যা.)] ভৱিস্সতি;

মনুস্সানং অনযো হুত্ৱা, তদা কণ্হো পমোক্খতি.

৬৩. পত্তহত্থা সমণকা, মুণ্ডা সঙ্ঘাটিপাৰুতা;

নঙ্গলেহি কসিস্সন্তি, তদা কণ্হো পমোক্খতি.

৬৪. তপস্সিনিযো [তপনীযা (ক.) দুতিযন্তপদানি হেতানি] পব্বজিতা, মুণ্ডা সঙ্ঘাটিপাৰুতা;

যদা লোকে গমিস্সন্তি, তদা কণ্হো পমোক্খতি.

৬৫. দীঘোত্তৰোট্ঠা জটিলা, পঙ্কদন্তা ৰজস্সিৰা;

ইণং চোদায [ৱোদায (সী. পী.), চোদয (স্যা.)] গচ্ছন্তি, তদা কণ্হো পমোক্খতি.

৬৬. অধিচ্চ ৱেদে [ৱেদং (ক.)] সাৱিত্তিং, যঞ্ঞতন্তঞ্চ [তন্ত্ৰঞ্চ (সী. স্যা. পী.)] ব্ৰাহ্মণা;

ভতিকায যজিস্সন্তি, তদা কণ্হো পমোক্খতি.

৬৭. মাতৰং পিতৰঞ্চাপি, জিণ্ণকং গতযোব্বনং;

পহূ সন্তো [সন্তা (সী.)] ন ভৰন্তি, তদা কণ্হো পমোক্খতি.