৪৬৮. জনসন্ধজাতকং (৫)

৪৯. দস খলু ইমানি [খলুমানি (স্যা.)] ঠানানি, যানি পুব্বে অকৰিত্ৱা;

স পচ্ছা মনুতপ্পতি, ইচ্চেৱাহ [ইচ্চাহ ৰাজা (সী. স্যা. পী.)] জনসন্ধো.

৫০. অলদ্ধা ৱিত্তং তপ্পতি, পুব্বে অসমুদানিতং;

ন পুব্বে ধনমেসিস্সং, ইতি পচ্ছানুতপ্পতি.

৫১. সক্যৰূপং পুৰে সন্তং, মযা সিপ্পং ন সিক্খিতং;

কিচ্ছা ৱুত্তি অসিপ্পস্স, ইতি পচ্ছানুতপ্পতি.

৫২. কূটৱেদী পুৰে আসিং, পিসুণো পিট্ঠিমংসিকো;

চণ্ডো চ ফৰুসো চাপি [চাসিং (সী. স্যা. পী.)], ইতি পচ্ছানুতপ্পতি.

৫৩. পাণাতিপাতী পুৰে আসিং, লুদ্দো চাপি [চাসিং (সী. পী.)] অনাৰিযো;

ভূতানং নাপচাযিস্সং, ইতি পচ্ছানুতপ্পতি.

৫৪. বহূসু ৱত সন্তীসু, অনাপাদাসু ইত্থিসু;

পৰদাৰং অসেৱিস্সং, ইতি পচ্ছানুতপ্পতি.

৫৫. বহুম্হি ৱত সন্তম্হি, অন্নপানে উপট্ঠিতে;

ন পুব্বে অদদং [অদদিং (সী.)] দানং, ইতি পচ্ছানুতপ্পতি.

৫৬. মাতৰং পিতৰঞ্চাপি, জিণ্ণকং গতযোব্বনং [জিণ্ণকে গতযোব্বনে (সী. স্যা. পী.)];

পহু সন্তো ন পোসিস্সং, ইতি পচ্ছানুতপ্পতি.

৫৭. আচৰিযমনুসত্থাৰং, সব্বকামৰসাহৰং;

পিতৰং অতিমঞ্ঞিস্সং, ইতি পচ্ছানুতপ্পতি.

৫৮. সমণে ব্ৰাহ্মণে চাপি, সীলৱন্তে বহুস্সুতে;

ন পুব্বে পযিৰুপাসিস্সং, ইতি পচ্ছানুতপ্পতি.

৫৯. সাধু হোতি তপো চিণ্ণো, সন্তো চ পযিৰুপাসিতো;

ন চ পুব্বে তপো চিণ্ণো, ইতি পচ্ছানুতপ্পতি.

৬০. যো চ এতানি ঠানানি, যোনিসো পটিপজ্জতি;

কৰং পুৰিসকিচ্চানি, স পচ্ছা নানুতপ্পতীতি.

জনসন্ধজাতকং পঞ্চমং.