৪৬৯. মহাকণ্হজাতকং (৬)

৬১. কণ্হো কণ্হো চ ঘোৰো চ, সুক্কদাঠো পভাসৱা [পতাপৱা (সী. স্যা. পী.)];

বদ্ধো পঞ্চহি ৰজ্জূহি, কিং ৰৱি [ধীৰ (সী. পী.), ৱীৰ (স্যা.)] সুনখো তৱ.

৬২. নাযং মিগানমত্থায, উসীনক [উসীনৰ (সী. পী.), উসীন্নৰ (স্যা.)] ভৱিস্সতি;

মনুস্সানং অনযো হুত্ৱা, তদা কণ্হো পমোক্খতি.

৬৩. পত্তহত্থা সমণকা, মুণ্ডা সঙ্ঘাটিপাৰুতা;

নঙ্গলেহি কসিস্সন্তি, তদা কণ্হো পমোক্খতি.

৬৪. তপস্সিনিযো [তপনীযা (ক.) দুতিযন্তপদানি হেতানি] পব্বজিতা, মুণ্ডা সঙ্ঘাটিপাৰুতা;

যদা লোকে গমিস্সন্তি, তদা কণ্হো পমোক্খতি.

৬৫. দীঘোত্তৰোট্ঠা জটিলা, পঙ্কদন্তা ৰজস্সিৰা;

ইণং চোদায [ৱোদায (সী. পী.), চোদয (স্যা.)] গচ্ছন্তি, তদা কণ্হো পমোক্খতি.

৬৬. অধিচ্চ ৱেদে [ৱেদং (ক.)] সাৱিত্তিং, যঞ্ঞতন্তঞ্চ [তন্ত্ৰঞ্চ (সী. স্যা. পী.)] ব্ৰাহ্মণা;

ভতিকায যজিস্সন্তি, তদা কণ্হো পমোক্খতি.

৬৭. মাতৰং পিতৰঞ্চাপি, জিণ্ণকং গতযোব্বনং;

পহূ সন্তো [সন্তা (সী.)] ন ভৰন্তি, তদা কণ্হো পমোক্খতি.

৬৮. মাতৰং পিতৰঞ্চাপি, জিণ্ণকং গতযোব্বনং;

বালা তুম্হেতি ৱক্খন্তি, তদা কণ্হো পমোক্খতি.

৬৯. আচৰিযভৰিযং সখিং [আচৰিযভৰিযং সখাভৰিযং (সী. পী.)], মাতুলানিং পিতুচ্ছকিং [পিতুচ্ছযং (সী.), পিতুচ্ছসং (পী.)];

যদা লোকে গমিস্সন্তি, তদা কণ্হো পমোক্খতি.

৭০. অসিচম্মং গহেত্ৱান, খগ্গং পগ্গয্হ ব্ৰাহ্মণা;

পন্থঘাতং কৰিস্সন্তি, তদা কণ্হো পমোক্খতি.

৭১. সুক্কচ্ছৱী ৱেধৱেৰা, থূলবাহূ অপাতুভা;

মিত্তভেদং কৰিস্সন্তি, তদা কণ্হো পমোক্খতি.

৭২. মাযাৱিনো নেকতিকা, অসপ্পুৰিসচিন্তকা;

যদা লোকে ভৱিস্সন্তি, তদা কণ্হো পমোক্খতীতি.

মহাকণ্হজাতকং ছট্ঠং.