৪৫৯. পানীযজাতকং (৫)

৫৯. মিত্তো মিত্তস্স পানীযং, অদিন্নং পৰিভুঞ্জিসং;

তেন পচ্ছা ৱিজিগুচ্ছিং, তং পাপং পকতং মযা;

মা পুন অকৰং পাপং, তস্মা পব্বজিতো অহং.

৬০. পৰদাৰঞ্চ দিস্ৱান, ছন্দো মে উদপজ্জথ [উপপজ্জথ (স্যা. ক.)];

তেন পচ্ছা ৱিজিগুচ্ছিং, তং পাপং পকতং মযা;

মা পুন অকৰং পাপং, তস্মা পব্বজিতো অহং.

৬১. পিতৰং মে মহাৰাজ, চোৰা অগণ্হু [অগণ্হুং (সী. পী.), অগণ্হি (ক.)] কাননে;

তেসাহং পুচ্ছিতো জানং, অঞ্ঞথা নং ৱিযাকৰিং.

৬২. তেন পচ্ছা ৱিজিগুচ্ছিং, তং পাপং পকতং মযা;

মা পুন অকৰং পাপং, তস্মা পব্বজিতো অহং.

৬৩. পাণাতিপাতমকৰুং, সোমযাগে উপট্ঠিতে;

তেসাহং সমনুঞ্ঞাসিং, তেন পচ্ছা ৱিজিগুচ্ছিং.

৬৪. তং পাপং পকতং মযা, মা পুন অকৰং পাপং;

তস্মা পব্বজিতো অহং.

৬৫. সুৰামেৰযমাধুকা [মধুকা (সী. স্যা. পী.)], যে জনা পঠমাসু নো;

বহূনং তে অনত্থায, মজ্জপানমকপ্পযুং.

৬৬. তেসাহং সমনুঞ্ঞাসিং, তেন পচ্ছা ৱিজিগুচ্ছিং;

তং পাপং পকতং মযা, মা পুন অকৰং পাপং;

তস্মা পব্বজিতো অহং.

৬৭. ধিৰত্থু সুবহূ কামে, দুগ্গন্ধে বহুকণ্টকে;

যে অহং পটিসেৱন্তো, নালভিং তাদিসং সুখং.

৬৮. মহস্সাদা সুখা কামা, নত্থি কামা পৰং [কামপৰং (সী. পী.)] সুখং;

যে কামে পটিসেৱন্তি, সগ্গং তে উপপজ্জৰে.

৬৯. অপ্পস্সাদা দুখা কামা, নত্থি কামা পৰং দুখং;

যে কামে পটিসেৱন্তি, নিৰযং তে উপপজ্জৰে.

৭০. অসী যথা সুনিসিতো, নেত্তিংসোৱ সুপাযিকো [সুপাসিতো (ক. সী. নিয্য), সুপাযিতো (ক. অট্ঠ.)];

সত্তীৱ উৰসি খিত্তা, কামা দুক্খতৰা ততো.

৭১. অঙ্গাৰানংৱ জলিতং, কাসুং সাধিকপোৰিসং;

ফালংৱ দিৱসংতত্তং, কামা দুক্খতৰা ততো.

৭২. ৱিসং যথা হলাহলং, তেলং পক্কুথিতং [উক্কট্ঠিতং (সী. পী.), পক্কুট্ঠিতং (স্যা.)] যথা;

তম্বলোহ [তম্পলোহং (স্যা.)] ৱিলীনংৱ, কামা দুক্খতৰা ততোতি.

পানীযজাতকং পঞ্চমং.