৪৬০. যুধঞ্চযজাতকং (৬)

৭৩. মিত্তামচ্চপৰিব্যূড়্হং [পৰিব্বূড়্হং (সী. পী.)], অহং ৱন্দে ৰথেসভং;

পব্বজিস্সামহং ৰাজ [পব্বজিস্সং মহাৰাজ (সী. পী.)], তং দেৱো অনুমঞ্ঞতু.

৭৪. সচে তে ঊনং কামেহি, অহং পৰিপূৰযামি [অহংৱ পূৰযামি (ক.)] তে;

যো তং হিংসতি ৱাৰেমি, মা পব্বজ [পব্বজি (পী.)] যুধঞ্চয [যুধঞ্জয (সী. স্যা.), যুৱঞ্জয (পী.)].

৭৫. ন মত্থি ঊনং কামেহি, হিংসিতা মে ন ৱিজ্জতি;

দীপঞ্চ কাতুমিচ্ছামি, যং জৰা নাভিকীৰতি.

৭৬. পুত্তো ৱা পিতৰং যাচে, পিতা ৱা পুত্তমোৰসং;

নেগমো তং যাচে [নেগমো যাচতে (সী. স্যা. পী.)] তাত, মা পব্বজ যুধঞ্চয.

৭৭. মা মং দেৱ নিৱাৰেহি, পব্বজন্তং ৰথেসভ;

মাহং কামেহি সম্মত্তো, জৰায ৱসমন্ৱগূ.

৭৮. অহং তং তাত যাচামি, অহং পুত্ত নিৱাৰযে;

চিৰং তং দট্ঠুমিচ্ছামি, মা পব্বজ যুধঞ্চয.

৭৯. উস্সাৱোৱ তিণগ্গম্হি, সূৰিযুগ্গমনং পতি;

এৱমাযু মনুস্সানং, মা মং অম্ম নিৱাৰয.

৮০. তৰমানো ইমং যানং, আৰোপেতু [তৰমানা ইমং যানং, আৰোপেন্তু (সী. পী.)] ৰথেসভ;

মা মে মাতা তৰন্তস্স, অন্তৰাযকৰা অহু.

৮১. অভিধাৱথ ভদ্দন্তে, সুঞ্ঞং হেস্সতি ৰম্মকং;

যুধঞ্চযো অনুঞ্ঞাতো, সব্বদত্তেন ৰাজিনা.

৮২. যোহু সেট্ঠো সহস্সস্স [মনুস্সানং (স্যা.), সহস্সানং (ক.)], যুৱা কঞ্চনসন্নিভো;

সোযং কুমাৰো পব্বজিতো, কাসাযৱসনো বলী.

৮৩. উভো কুমাৰা পব্বজিতা, যুধঞ্চযো যুধিট্ঠিলো;

পহায মাতাপিতৰো, সঙ্গং ছেত্ৱান মচ্চুনোতি.

যুধঞ্চযজাতকং ছট্ঠং.