৪৫৭. ধম্মদেৱপুত্তজাতকং (৩)

২৬. যসোকৰো পুঞ্ঞকৰোহমস্মি, সদাত্থুতো সমণব্ৰাহ্মণানং;

মগ্গাৰহো দেৱমনুস্সপূজিতো, ধম্মো অহং দেহি অধম্ম মগ্গং.

২৭. অধম্মযানং দড়্হমাৰুহিত্ৱা, অসন্তসন্তো বলৱাহমস্মি;

স কিস্স হেতুম্হি তৱজ্জ দজ্জং, মগ্গং অহং ধম্ম অদিন্নপুব্বং.

২৮. ধম্মো হৱে পাতুৰহোসি পুব্বে, পচ্ছা অধম্মো উদপাদি লোকে;

জেট্ঠো চ সেট্ঠো চ সনন্তনো চ, উয্যাহি জেট্ঠস্স কনিট্ঠ মগ্গা.

২৯. ন যাচনায নপি পাতিৰূপা, ন অৰহতা [ন অৰহতি (সী. পী.), অৰহতি (ক.)] তেহং দদেয্যং মগ্গং;

যুদ্ধঞ্চ নো হোতু উভিন্নমজ্জ, যুদ্ধম্হি যো জেস্সতি তস্স মগ্গো.

৩০. সব্বা দিসা অনুৱিসটোহমস্মি, মহব্বলো অমিতযসো অতুল্যো;

গুণেহি সব্বেহি উপেতৰূপো, ধম্মো অধম্ম ত্ৱং কথং ৱিজেস্সসি.

৩১. লোহেন ৱে হঞ্ঞতি জাতৰূপং, ন জাতৰূপেন হনন্তি লোহং;

সচে অধম্মো হঞ্ছতি [হঞ্ঞতি (সী. স্যা.), হঞ্ঞিতি (কত্থচি)] ধম্মমজ্জ, অযো সুৱণ্ণং ৱিয দস্সনেয্যং.

৩২. সচে তুৱং যুদ্ধবলো অধম্ম [যুদ্ধবলো’সি’ধম্ম (ক. সী.), যুদ্ধবলো’স’ধম্ম (পী.)], ন তুয্হ ৱুড্ঢা [ৱদ্ধা (সী. পী.)] চ গৰূ চ অত্থি;

মগ্গঞ্চ তে দম্মি পিযাপ্পিযেন, ৱাচাদুৰুত্তানিপি তে খমামি.

৩৩. ইদঞ্চ সুত্ৱা ৱচনং অধম্মো, অৱংসিৰো পতিতো উদ্ধপাদো;

‘‘যুদ্ধত্থিকো চে ন লভামি যুদ্ধং’’, এত্তাৱতা হোতি হতো অধম্মো.

৩৪. খন্তীবলো যুদ্ধবলং ৱিজেত্ৱা, হন্ত্ৱা অধম্মং নিহনিত্ৱ [ৱিহনিত্ৱা (ক.)] ভূম্যা;

পাযাসি ৱিত্তো [চিত্তো (স্যা.)] অভিৰুয্হ সন্দনং, মগ্গেনেৱ অতিবলো সচ্চনিক্কমো.

৩৫. মাতা পিতা সমণব্ৰাহ্মণা চ, অসম্মানিতা যস্স সকে অগাৰে;

ইধেৱ নিক্খিপ্প সৰীৰদেহং, কাযস্স ভেদা নিৰযং ৱজন্তি তে [ৱজন্তি (সী. পী.)];

যথা অধম্মো পতিতো অৱংসিৰো.

৩৬. মাতা পিতা সমণব্ৰাহ্মণা চ, সুসম্মানিতা যস্স সকে অগাৰে;

ইধেৱ নিক্খিপ্প সৰীৰদেহং, কাযস্স ভেদা সুগতিং ৱজন্তি তে;

যথাপি ধম্মো অভিৰুয্হ সন্দনন্তি.

ধম্মদেৱপুত্তজাতকং [ধম্মজাতকং (সী. পী.)] ততিযং.