৪৫৬. জুণ্হজাতকং (২)

১৩. সুণোহি ময্হং ৱচনং জনিন্দ, অত্থেন জুণ্হম্হি ইধানুপত্তো;

ন ব্ৰাহ্মণে অদ্ধিকে তিট্ঠমানে, গন্তব্ব [গন্তব্য (ক.)] মাহু দ্ৱিপদিন্দ [দিপদান (সী. পী.), দ্ৱিপদান (স্যা.)] সেট্ঠ.

১৪. সুণোমি তিট্ঠামি ৱদেহি ব্ৰহ্মে, যেনাসি [যেনাপি (স্যা. ক.)] অত্থেন ইধানুপত্তো;

কং ৱা ত্ৱমত্থং মযি পত্থযানো, ইধাগমা ব্ৰহ্মে তদিঙ্ঘ ব্ৰূহি.

১৫. দদাহি মে গামৱৰানি পঞ্চ, দাসীসতং সত্ত গৱংসতানি;

পৰোসহস্সঞ্চ সুৱণ্ণনিক্খে, ভৰিযা চ মে সাদিসী দ্ৱে দদাহি.

১৬. তপো নু তে ব্ৰাহ্মণ ভিংসৰূপো, মন্তা নু তে ব্ৰাহ্মণ চিত্তৰূপা;

যক্খা নু [যক্খা ৱ (সী. পী.)] তে অস্সৱা সন্তি কেচি, অত্থং ৱা মে অভিজানাসি কত্তং.

১৭. ন মে তপো অত্থি ন চাপি মন্তা, যক্খাপি মে অস্সৱা নত্থি কেচি;

অত্থম্পি তে নাভিজানামি কত্তং, পুব্বে চ খো [পুব্বেৱ খো (স্যা. ক.)] সঙ্গতিমত্তমাসি.

১৮. পঠমং ইদং দস্সনং জানতো মে, ন তাভিজানামি ইতো পুৰত্থা;

অক্খাহি মে পুচ্ছিতো এতমত্থং, কদা কুহিং ৱা অহু সঙ্গমো নো.

১৯. গন্ধাৰৰাজস্স পুৰম্হি ৰম্মে, অৱসিম্হসে তক্কসীলাযং দেৱ;

তত্থন্ধকাৰম্হি তিমীসিকাযং [তিমিস্সিকাযং (সী. অট্ঠ.), তিমিস্সকাযং (স্যা.)], অংসেন অংসং সমঘট্টযিম্হ.

২০. তে তত্থ ঠত্ৱান উভো জনিন্দ, সাৰাণিযং [সাৰণীযং (ক.)] ৱীতিসাৰযিম্হ [ৱীতিসাৰিম্হ (সী. স্যা. পী.)] তত্থ;

সাযেৱ নো সঙ্গতিমত্তমাসি, ততো ন পচ্ছা ন পুৰে অহোসি.

২১. যদা কদাচি মনুজেসু ব্ৰহ্মে, সমাগমো সপ্পুৰিসেন হোতি;

ন পণ্ডিতা সঙ্গতিসন্থৱানি, পুব্বে কতং ৱাপি ৱিনাসযন্তি.

২২. বালাৱ [বালা চ (সী. স্যা. পী.)] খো সঙ্গতিসন্থৱানি, পুব্বে কতং ৱাপি ৱিনাসযন্তি;

বহুম্পি বালেসু কতং ৱিনস্সতি, তথা হি বালা অকতঞ্ঞুৰূপা.

২৩. ধীৰা চ খো সঙ্গতিসন্থৱানি, পুব্বে কতং ৱাপি ন নাসযন্তি;

অপ্পম্পি ধীৰেসু কতং ন নস্সতি, তথা হি ধীৰা সুকতঞ্ঞুৰূপা.

২৪. দদামি তে গামৱৰানি পঞ্চ, দাসীসতং সত্ত গৱংসতানি;

পৰোসহস্সঞ্চ সুৱণ্ণনিক্খে, ভৰিযা চ তে সাদিসী দ্ৱে দদামি.

২৫. এৱং সতং হোতি সমেচ্চ ৰাজ, নক্খত্তৰাজাৰিৱ তাৰকানং;

আপূৰতী কাসিপতী তথাহং, তযাপি মে সঙ্গমো অজ্জ লদ্ধোতি.

জুণ্হজাতকং দুতিযং.