৪৫৫. মাতুপোসকজাতকং (১)

১. তস্স নাগস্স ৱিপ্পৱাসেন, ৱিৰূড়্হা সল্লকী চ কুটজা চ;

কুৰুৱিন্দকৰৱীৰা [কৰৱৰা (সী. স্যা.)] তিসসামা চ, নিৱাতে পুপ্ফিতা চ কণিকাৰা.

২. কোচিদেৱ সুৱণ্ণকাযুৰা, নাগৰাজং ভৰন্তি পিণ্ডেন;

যত্থ ৰাজা ৰাজকুমাৰো ৱা, কৱচমভিহেস্সতি অছম্ভিতো [অসম্ভীতো (সী. স্যা. পী.)].

৩. গণ্হাহি নাগ কবড়ং, মা নাগ কিসকো ভৱ;

বহূনি ৰাজকিচ্চানি, তানি [যানি (সী. পী.)] নাগ কৰিস্সসি.

৪. সা নূনসা কপণিকা, অন্ধা অপৰিণাযিকা;

খাণুং পাদেন ঘট্টেতি, গিৰিং চণ্ডোৰণং পতি.

৫. কা নু তে সা মহানাগ, অন্ধা অপৰিণাযিকা;

খাণুং পাদেন ঘট্টেতি, গিৰিং চণ্ডোৰণং পতি.

৬. মাতা মে সা মহাৰাজ, অন্ধা অপৰিণাযিকা;

খাণুং পাদেন ঘট্টেতি, গিৰিং চণ্ডোৰণং পতি.

৭. মুঞ্চথেতং মহানাগং, যোযং ভৰতি মাতৰং;

সমেতু মাতৰা নাগো, সহ সব্বেহি ঞাতিভি.

৮. মুত্তো চ বন্ধনা নাগো, মুত্তমাদায কুঞ্জৰো [কাসিৰাজেন পেসিতো (সী. স্যা.), মুত্তো দামাতো কুঞ্জৰো (পী. সী. নিয্য)];

মুহুত্তং অস্সাসযিত্ৱা [ৱিস্সমিত্ৱান (সী.)], অগমা যেন পব্বতো.

৯. ততো সো নড়িনিং [নিলিনং (স্যা.)] গন্ত্ৱা, সীতং কুঞ্জৰসেৱিতং;

সোণ্ডাযূদকমাহত্ৱা [মাহিত্ৱা (স্যা. ক.)], মাতৰং অভিসিঞ্চথ.

১০. কোয অনৰিযো দেৱো, অকালেনপি ৱস্সতি [অকালেন পৱস্সতি (সী. স্যা.), অকালেন’তিৱস্সতি (পী.)];

গতো মে অত্ৰজো পুত্তো, যো ময্হং পৰিচাৰকো.

১১. উট্ঠেহি অম্ম কিং সেসি, আগতো ত্যাহমত্ৰজো;

মুত্তোম্হি কাসিৰাজেন, ৱেদেহেন যসস্সিনা.

১২. চিৰং জীৱতু সো ৰাজা, কাসীনং ৰট্ঠৱড্ঢনো;

যো মে পুত্তং পমোচেসি, সদা ৱুদ্ধাপচাযিকন্তি.

মাতুপোসকজাতকং পঠমং.