৪৫৪. ঘটপণ্ডিতজাতকং (১৬)

১৬৫. উট্ঠেহি কণ্হ কিং সেসি, কো অত্থো সুপনেন তে;

যোপি তুয্হং [তাযং (পী.)] সকো ভাতা, হদযং চক্খু চ [চক্খুংৱ (পী.)] দক্খিণং;

তস্স ৱাতা বলীযন্তি, ঘটো জপ্পতি [সসং জপ্পতি (?)] কেসৱ.

১৬৬. তস্স তং ৱচনং সুত্ৱা, ৰোহিণেয্যস্স কেসৱো;

তৰমানৰূপো ৱুট্ঠাসি, ভাতুসোকেন অট্টিতো.

১৬৭. কিং নু উম্মত্তৰূপোৱ, কেৱলং দ্ৱাৰকং ইমং;

সসো সসোতি লপসি, কো নু তে সসমাহৰি.

১৬৮. সোৱণ্ণমযং মণীমযং, লোহমযং অথ ৰূপিযামযং;

সঙ্খসিলাপৱাড়মযং, কাৰযিস্সামি তে সসং.

১৬৯. সন্তি অঞ্ঞেপি সসকা, অৰঞ্ঞে ৱনগোচৰা;

তেপি তে আনযিস্সামি, কীদিসং সসমিচ্ছসি.

১৭০. ন চাহমেতে [ন চাহমেতং (সী.), ন ৱাহমেতে (স্যা.), ন ৱাহমেতং (পী.)] ইচ্ছামি, যে সসা পথৱিস্সিতা [পঠৱিংসিতা (সী. স্যা. পী.)];

চন্দতো সসমিচ্ছামি, তং মে ওহৰ কেসৱ.

১৭১. সো নূন মধুৰং ঞাতি, জীৱিতং ৱিজহিস্সসি;

অপত্থিযং যো পত্থযসি, চন্দতো সসমিচ্ছসি.

১৭২. এৱং চে কণ্হ জানাসি, যদঞ্ঞমনুসাসসি;

কস্মা পুৰে মতং পুত্তং, অজ্জাপি মনুসোচসি.

১৭৩. যং ন লব্ভা মনুস্সেন, অমনুস্সেন ৱা পুন [পন (পে. ৱ. ২১৫)];

জাতো মে মা মৰী পুত্তো, কুতো লব্ভা অলব্ভিযং.

১৭৪. ন মন্তা মূলভেসজ্জা, ওসধেহি ধনেন ৱা;

সক্কা আনযিতুং কণ্হ, যং পেতমনুসোচসি.

১৭৫. যস্স এতাদিসা অস্সু, অমচ্চা পুৰিসপণ্ডিতা;

যথা নিজ্ঝাপযে অজ্জ, ঘটো পুৰিসপণ্ডিতো.

১৭৬. আদিত্তং ৱত মং সন্তং, ঘতসিত্তংৱ পাৱকং;

ৱাৰিনা ৱিয ওসিঞ্চং, সব্বং নিব্বাপযে দৰং.

১৭৭. অব্বহী ৱত মে সল্লং, যমাসি হদযস্সিতং;

যো মে সোকপৰেতস্স, পুত্তসোকং অপানুদি.

১৭৮. সোহং অব্বূড়্হসল্লোস্মি, ৱীতসোকো অনাৱিলো;

ন সোচামি ন ৰোদামি, তৱ সুত্ৱান মাণৱ [ভাতিক (পে. ৱ. ২২৪)].

১৭৯. এৱং কৰোন্তি সপ্পঞ্ঞা, যে হোন্তি অনুকম্পকা;

নিৱত্তযন্তি সোকম্হা, ঘটো জেট্ঠংৱ ভাতৰন্তি.

ঘটপণ্ডিতজাতকং সোড়সমং.

দসকনিপাতং নিট্ঠিতং.