১০. দসকনিপাতো

৪৩৯. চতুদ্ৱাৰজাতকং (১)

১. চতুদ্ৱাৰমিদং নগৰং, আযসং দড়্হপাকাৰং;

ওৰুদ্ধপটিৰুদ্ধোস্মি, কিং পাপং পকতং মযা.

২. সব্বে অপিহিতা দ্ৱাৰা, ওৰুদ্ধোস্মি যথা দিজো;

কিমাধিকৰণং যক্খ, চক্কাভিনিহতো অহং.

৩. লদ্ধা সতসহস্সানি, অতিৰেকানি ৱীসতি;

অনুকম্পকানং ঞাতীনং, ৱচনং সম্ম নাকৰি.

৪. লঙ্ঘিং সমুদ্দং পক্খন্দি, সাগৰং অপ্পসিদ্ধিকং;

চতুব্ভি অট্ঠজ্ঝগমা, অট্ঠাহিপি চ সোড়স.

৫. সোড়সাহি চ বাত্তিংস, অত্ৰিচ্ছং চক্কমাসদো;

ইচ্ছাহতস্স পোসস্স, চক্কং ভমতি মত্থকে.

৬. উপৰিৱিসালা দুপ্পূৰা, ইচ্ছা ৱিসটগামিনী [ৱিসটগামিনিং (পী. ক.)];

যে চ তং অনুগিজ্ঝন্তি, তে হোন্তি চক্কধাৰিনো.

৭. বহুভণ্ডং [বহুং ভণ্ডং (সী. পী.)] অৱহায, মগ্গং অপ্পটিৱেক্খিয;

যেসঞ্চেতং অসঙ্খাতং, তে হোন্তি চক্কধাৰিনো.

৮. কম্মং সমেক্খে ৱিপুলঞ্চ ভোগং, ইচ্ছং ন সেৱেয্য অনত্থসংহিতং;

কৰেয্য ৱাক্যং অনুকম্পকানং, তং তাদিসং নাতিৱত্তেয্য চক্কং.

৯. কীৱচিৰং নু মে যক্খ, চক্কং সিৰসি ঠস্সতি;

কতি ৱস্সসহস্সানি, তং মে অক্খাহি পুচ্ছিতো.

১০. অতিসৰো পচ্চসৰো [অচ্চসৰো (সী. স্যা. পী.)], মিত্তৱিন্দ সুণোহি মে;

চক্কং তে সিৰসি [সিৰস্মি (স্যা.)] মাৱিদ্ধং, ন তং জীৱং পমোক্খসীতি.

চতুদ্ৱাৰজাতকং পঠমং.

৪৪০. কণ্হজাতকং (২)

১১. কণ্হো ৱতাযং পুৰিসো, কণ্হং ভুঞ্জতি ভোজনং;

কণ্হে ভূমিপদেসস্মিং, ন ময্হং মনসো পিযো.

১২. ন কণ্হো তচসা হোতি, অন্তোসাৰো হি ব্ৰাহ্মণো;

যস্মিং পাপানি কম্মানি, স ৱে কণ্হো সুজম্পতি.

১৩. এতস্মিং তে সুলপিতে, পতিৰূপে সুভাসিতে;

ৱৰং ব্ৰাহ্মণ তে দম্মি, যং কিঞ্চি মনসিচ্ছসি.

১৪. ৱৰঞ্চে মে অদো সক্ক, সব্বভূতানমিস্সৰ;

সুনিক্কোধং সুনিদ্দোসং, নিল্লোভং ৱুত্তিমত্তনো;

নিস্নেহমভিকঙ্খামি, এতে মে চতুৰো ৱৰে.

১৫. কিং নু কোধে ৱা [কোধেৱ (সী. পী.)] দোসে ৱা, লোভে স্নেহে চ ব্ৰাহ্মণ;

আদীনৱং ত্ৱং পস্সসি [সম্পস্সসি (সী. পী.)], তং মে অক্খাহি পুচ্ছিতো.

১৬. অপ্পো হুত্ৱা বহু হোতি, ৱড্ঢতে সো অখন্তিজো;

আসঙ্গী বহুপাযাসো, তস্মা কোধং ন ৰোচযে.

১৭. দুট্ঠস্স ফৰুসা [পঠমা (পী. সী. নিয্য)] ৱাচা, পৰামাসো অনন্তৰা;

ততো পাণি ততো দণ্ডো, সত্থস্স পৰমা গতি [পৰামসতি (ক.)];

দোসো কোধসমুট্ঠানো, তস্মা দোসং ন ৰোচযে.

১৮. আলোপসাহসাকাৰা [সহসাকাৰা (সী. স্যা. পী.)], নিকতী ৱঞ্চনানি চ;

দিস্সন্তি লোভধম্মেসু, তস্মা লোভং ন ৰোচযে.

১৯. স্নেহসঙ্গথিতা [সঙ্গধিতা (ক.), সঙ্গন্তিতা (স্যা.)] গন্থা, সেন্তি মনোমযা পুথূ;

তে ভুসং উপতাপেন্তি, তস্মা স্নেহং ন ৰোচযে.

২০. এতস্মিং তে সুলপিতে, পতিৰূপে সুভাসিতে;

ৱৰং ব্ৰাহ্মণ তে দম্মি, যং কিঞ্চি মনসিচ্ছসি.

২১. ৱৰঞ্চে মে অদো সক্ক, সব্বভূতানমিস্সৰ;

অৰঞ্ঞে মে ৱিহৰতো, নিচ্চং একৱিহাৰিনো;

আবাধা মা [ন (স্যা. পী.)] উপ্পজ্জেয্যুং, অন্তৰাযকৰা ভুসা.

২২. এতস্মিং তে সুলপিতে, পতিৰূপে সুভাসিতে;

ৱৰং ব্ৰাহ্মণ তে দম্মি, যং কিঞ্চি মনসিচ্ছসি.

২৩. ৱৰঞ্চে মে অদো সক্ক, সব্বভূতানমিস্সৰ;

ন মনো ৱা সৰীৰং ৱা, মং-কতে সক্ক কস্সচি;

কদাচি উপহঞ্ঞেথ, এতং সক্ক ৱৰং ৱৰেতি.

কণ্হজাতকং দুতিযং.

৪৪১. চতুপোসথিযজাতকং (৩)

২৪. যো কোপনেয্যে ন কৰোতি কোপং, ন কুজ্ঝতি সপ্পুৰিসো কদাচি;

কুদ্ধোপি সো নাৱিকৰোতি কোপং, তং ৱে নৰং সমণমাহু [সমণং আহু (সী.)] লোকে.

২৫. ঊনূদৰো যো সহতে জিঘচ্ছং, দন্তো তপস্সী মিতপানভোজনো;

আহাৰহেতু ন কৰোতি পাপং, তং ৱে নৰং সমণমাহু লোকে.

২৬. খিড্ডং ৰতিং ৱিপ্পজহিত্ৱান সব্বং, ন চালিকং ভাসসি কিঞ্চি লোকে;

ৱিভূসট্ঠানা ৱিৰতো মেথুনস্মা, তং ৱে নৰং সমণমাহু লোকে.

২৭. পৰিগ্গহং লোভধম্মঞ্চ সব্বং, যো ৱে পৰিঞ্ঞায পৰিচ্চজেতি;

দন্তং ঠিতত্তং অমমং নিৰাসং, তং ৱে নৰং সমণমাহু লোকে.

২৮. পুচ্ছাম কত্তাৰমনোমপঞ্ঞং [মনোমপঞ্ঞ (স্যা. ক.)], কথাসু নো ৱিগ্গহো অত্থি জাতো;

ছিন্দজ্জ কঙ্খং ৱিচিকিচ্ছিতানি, তদজ্জ [তযাজ্জ (সী.)] কঙ্খং ৱিতৰেমু সব্বে.

২৯. যে পণ্ডিতা অত্থদসা ভৱন্তি, ভাসন্তি তে যোনিসো তত্থ কালে;

কথং নু কথানং অভাসিতানং, অত্থং নযেয্যুং কুসলা জনিন্দা.

৩০. কথং হৱে ভাসতি নাগৰাজা, গৰুড়ো পন ৱেনতেয্যো কিমাহ;

গন্ধব্বৰাজা পন কিং ৱদেসি, কথং পন কুৰূনং ৰাজসেট্ঠো.

৩১. খন্তিং হৱে ভাসতি নাগৰাজা, অপ্পাহাৰং গৰুড়ো ৱেনতেয্যো;

গন্ধব্বৰাজা ৰতিৱিপ্পহানং, অকিঞ্চনং কুৰূনং ৰাজসেট্ঠো.

৩২. সব্বানি এতানি সুভাসিতানি, ন হেত্থ দুব্ভাসিতমত্থি কিঞ্চি;

যস্মিঞ্চ এতানি পতিট্ঠিতানি, অৰাৱ নাভ্যা সুসমোহিতানি;

চতুব্ভি ধম্মেহি সমঙ্গিভূতং, তং ৱে নৰং সমণমাহু লোকে.

৩৩. তুৱঞ্হি [তুৱং নু (সী. পী.)] সেট্ঠো ত্ৱমনুত্তৰোসি, ত্ৱং ধম্মগূ ধম্মৱিদূ সুমেধো;

পঞ্ঞায পঞ্হং সমধিগ্গহেত্ৱা, অচ্ছেচ্ছি ধীৰো ৱিচিকিচ্ছিতানি;

অচ্ছেচ্ছি কঙ্খং ৱিচিকিচ্ছিতানি, চুন্দো যথা নাগদন্তং খৰেন.

৩৪. নীলুপ্পলাভং ৱিমলং অনগ্ঘং, ৱত্থং ইদং ধূমসমানৱণ্ণং;

পঞ্হস্স ৱেয্যাকৰণেন তুট্ঠো, দদামি তে ধম্মপূজায ধীৰ.

৩৫. সুৱণ্ণমালং সতপত্তফুল্লিতং, সকেসৰং ৰত্নসহস্সমণ্ডিতং;

পঞ্হস্স ৱেয্যাকৰণেন তুট্ঠো, দদামি তে ধম্মপূজায ধীৰ.

৩৬. মণিং অনগ্ঘং ৰুচিৰং পভস্সৰং, কণ্ঠাৱসত্তং [ৱসিতং (ক.)] মণিভূসিতং মে;

পঞ্হস্স ৱেয্যাকৰণেন তুট্ঠো, দদামি তে ধম্মপূজায ধীৰ.

৩৭. গৱং সহস্সং উসভঞ্চ নাগং, আজঞ্ঞযুত্তে চ ৰথে দস ইমে;

পঞ্হস্স ৱেয্যাকৰণেন তুট্ঠো, দদামি তে গামৱৰানি সোড়স.

৩৮. সাৰিপুত্তো তদা নাগো, সুপণ্ণো পন কোলিতো;

গন্ধব্বৰাজা অনুৰুদ্ধো, ৰাজা আনন্দ পণ্ডিতো;

ৱিধুৰো বোধিসত্তো চ, এৱং ধাৰেথ জাতকন্তি.

চতুপোসথিযজাতকং ততিযং.

৪৪২. সঙ্খজাতকং (৪)

৩৯. বহুস্সুতো সুতধম্মোসি সঙ্খ, দিট্ঠা তযা সমণব্ৰাহ্মণা চ;

অথক্খণে দস্সযসে ৱিলাপং, অঞ্ঞো নু কো তে পটিমন্তকো মযা.

৪০. সুব্ভূ [সুব্ভা (স্যা.), সুম্ভা, সুভ্মা (ক.)] সুভা সুপ্পটিমুক্ককম্বু, পগ্গয্হ সোৱণ্ণমযায পাতিযা;

‘‘ভুঞ্জস্সু ভত্তং’’ ইতি মং ৱদেতি, সদ্ধাৱিত্তা [সদ্ধাচিত্তা (সী. পী. ক.)], তমহং নোতি ব্ৰূমি.

৪১. এতাদিসং ব্ৰাহ্মণ দিস্ৱান [দিস্ৱ (সী. পী.)] যক্খং, পুচ্ছেয্য পোসো সুখমাসিসানো [সুখমাসসানো (স্যা.), সুখমাসিসমানো (ক.)];

উট্ঠেহি নং পঞ্জলিকাভিপুচ্ছ, দেৱী নুসি ত্ৱং উদ মানুসী নু.

৪২. যং ত্ৱং সুখেনাভিসমেক্খসে মং, ভুঞ্জস্সু ভত্তং ইতি মং ৱদেসি;

পুচ্ছামি তং নাৰি মহানুভাৱে, দেৱী নুসি ত্ৱং উদ মানুসী নু.

৪৩. দেৱী অহং সঙ্খ মহানুভাৱা, ইধাগতা সাগৰৱাৰিমজ্ঝে;

অনুকম্পিকা নো চ পদুট্ঠচিত্তা, তৱেৱ অত্থায ইধাগতাস্মি.

৪৪. ইধন্নপানং সযনাসনঞ্চ, যানানি নানাৱিৱিধানি সঙ্খ;

সব্বস্স ত্যাহং পটিপাদযামি, যং কিঞ্চি তুয্হং মনসাভিপত্থিতং.

৪৫. যং কিঞ্চি যিট্ঠঞ্চ হুতঞ্চ [যিট্ঠংৱ হুতংৱ (সী. পী.)] ময্হং, সব্বস্স নো ইস্সৰা ত্ৱং সুগত্তে;

সুসোণি সুব্ভমু [সুব্ভু (সী.), সুব্ভা (স্যা.)] সুৱিলগ্গমজ্ঝে [সুৱিলাকমজ্ঝে (স্যা. পী. সী. অট্ঠ.), সুৱিলাতমজ্ঝে (ক.)], কিস্স মে কম্মস্স অযং ৱিপাকো.

৪৬. ঘম্মে পথে ব্ৰাহ্মণ একভিক্খুং, উগ্ঘট্টপাদং তসিতং কিলন্তং;

পটিপাদযী সঙ্খ উপাহনানি [উপাহনাহি (সী. পী.)], সা দক্খিণা কামদুহা তৱজ্জ.

৪৭. সা হোতু নাৱা ফলকূপপন্না, অনৱস্সুতা এৰকৱাতযুত্তা;

অঞ্ঞস্স যানস্স ন হেত্থ [ন হত্থি (পী.)] ভূমি, অজ্জেৱ মং মোড়িনিং পাপযস্সু.

৪৮. সা তত্থ ৱিত্তা সুমনা পতীতা, নাৱং সুচিত্তং অভিনিম্মিনিত্ৱা;

আদায সঙ্খং পুৰিসেন সদ্ধিং, উপানযী নগৰং সাধুৰম্মন্তি.

সঙ্খজাতকং চতুত্থং.

৪৪৩. চূড়বোধিজাতকং (৫)

৪৯. যো তে ইমং ৱিসালক্খিং, পিযং সম্হিতভাসিনিং [সম্মিল্লভাসিনিং (সী. পী.), সম্মিল্লহাসিনিং (স্যা.)];

আদায বলা গচ্ছেয্য, কিং নু কযিৰাসি ব্ৰাহ্মণ.

৫০. উপ্পজ্জে [উপ্পজ্জ (সী. পী.)] মে ন মুচ্চেয্য, ন মে মুচ্চেয্য জীৱতো;

ৰজংৱ ৱিপুলা ৱুট্ঠি, খিপ্পমেৱ নিৱাৰযে [নিৱাৰযিং (ক.)].

৫১. যং নু পুব্বে ৱিকত্থিত্থো [ৱিকত্থিতো (ক. সী. স্যা. ক.)], বলম্হিৱ অপস্সিতো;

স্ৱজ্জ তুণ্হিকতো [তুণ্হিকতো (সী.), তুণ্হিক্খকো (পী.)] দানি, সঙ্ঘাটিং সিব্বমচ্ছসি.

৫২. উপ্পজ্জি মে ন মুচ্চিত্থ, ন মে মুচ্চিত্থ জীৱতো;

ৰজংৱ ৱিপুলা ৱুট্ঠি, খিপ্পমেৱ নিৱাৰযিং.

৫৩. কিং তে উপ্পজ্জি নো মুচ্চি, কিং তে ন মুচ্চি জীৱতো;

ৰজংৱ ৱিপুলা ৱুট্ঠি, কতমং ত্ৱং নিৱাৰযি.

৫৪. যম্হি জাতে ন পস্সতি, অজাতে সাধু পস্সতি;

সো মে উপ্পজ্জি নো মুচ্চি, কোধো দুম্মেধগোচৰো.

৫৫. যেন জাতেন নন্দন্তি, অমিত্তা দুক্খমেসিনো;

সো মে উপ্পজ্জি নো মুচ্চি, কোধো দুম্মেধগোচৰো.

৫৬. যস্মিঞ্চ জাযমানম্হি, সদত্থং নাৱবুজ্ঝতি;

সো মে উপ্পজ্জি নো মুচ্চি, কোধো দুম্মেধগোচৰো.

৫৭. যেনাভিভূতো কুসলং জহাতি, পৰক্কৰে ৱিপুলঞ্চাপি অত্থং;

স ভীমসেনো বলৱা পমদ্দী, কোধো মহাৰাজ ন মে অমুচ্চথ.

৫৮. কট্ঠস্মিং মত্থমানস্মিং [মন্থমানস্মিং (পী.), মদ্দমানস্মিং (ক.)], পাৱকো নাম জাযতি;

তমেৱ কট্ঠং ডহতি, যস্মা সো জাযতে গিনি.

৫৯. এৱং মন্দস্স পোসস্স, বালস্স অৱিজানতো;

সাৰম্ভা [সাৰব্ভা (ক.)] জাযতে কোধো, সোপি তেনেৱ ডয্হতি.

৬০. অগ্গীৱ তিণকট্ঠস্মিং, কোধো যস্স পৱড্ঢতি;

নিহীযতি তস্স যসো, কাড়পক্খেৱ চন্দিমা.

৬১. অনেধো [অনিন্ধো (সী. ক.), অনিন্দো (স্যা.)] ধূমকেতূৱ, কোধো যস্সূপসম্মতি;

আপূৰতি তস্স যসো, সুক্কপক্খেৱ চন্দিমাতি.

চূড়বোধিজাতকং পঞ্চমং.

৪৪৪. কণ্হদীপাযনজাতকং (৬)

৬২. সত্তাহমেৱাহং পসন্নচিত্তো, পুঞ্ঞত্থিকো আচৰিং [অচৰিং (সী. স্যা. পী.)] ব্ৰহ্মচৰিযং;

অথাপৰং যং চৰিতং মমেদং [মম যিদং (স্যা.), মমাযিদং (পী.)], ৱস্সানি পঞ্ঞাস সমাধিকানি;

অকামকো ৱাপি [ৱাহি (পী. ক.)] অহং চৰামি, এতেন সচ্চেন সুৱত্থি হোতু;

হতং ৱিসং জীৱতু যঞ্ঞদত্তো.

৬৩. যস্মা দানং নাভিনন্দিং কদাচি, দিস্ৱানহং অতিথিং ৱাসকালে;

ন চাপি মে অপ্পিযতং অৱেদুং, বহুস্সুতা সমণব্ৰাহ্মণা চ.

অকামকো ৱাপি অহং দদামি, এতেন সচ্চেন সুৱত্থি হোতু;

হতং ৱিসং জীৱতু যঞ্ঞদত্তো.

৬৪. আসীৱিসো তাত পহূততেজো, যো তং অদংসী [অডংসী (স্যা.)] সচৰা [বিলৰা (সী.), পিড়াৰা (স্যা.), পতৰা (পী.)] উদিচ্চ;