৪৫৩. মহামঙ্গলজাতকং (১৫)

১৫৫. কিংসু নৰো জপ্পমধিচ্চকালে, কং ৱা ৱিজ্জং কতমং ৱা সুতানং;

সো মচ্চো অস্মিঞ্চ [অস্মিংৱ (পী.)] পৰম্হি লোকে, কথং কৰো সোত্থানেন গুত্তো.

১৫৬. যস্স দেৱা পিতৰো চ সব্বে, সৰীসপা [সিৰিংসপা (সী. স্যা. পী.)] সব্বভূতানি চাপি;

মেত্তায নিচ্চং অপচিতানি হোন্তি, ভূতেসু ৱে সোত্থানং তদাহু.

১৫৭. যো সব্বলোকস্স নিৱাতৱুত্তি, ইত্থীপুমানং সহদাৰকানং;

খন্তা দুৰুত্তানমপ্পটিকূলৱাদী, অধিৱাসনং সোত্থানং তদাহু.

১৫৮. যো নাৱজানাতি সহাযমিত্তে [সহাযমত্তে (সী. পী.)], সিপ্পেন কুল্যাহি ধনেন জচ্চা;

ৰুচিপঞ্ঞো অত্থকালে মতীমা [মুতীমা (সী. পী.)], সহাযেসু ৱে সোত্থানং তদাহু.

১৫৯. মিত্তানি ৱে যস্স ভৱন্তি সন্তো, সংৱিস্সত্থা অৱিসংৱাদকস্স;

ন মিত্তদুব্ভী সংৱিভাগী ধনেন, মিত্তেসু ৱে সোত্থানং তদাহু.

১৬০. যস্স ভৰিযা তুল্যৱযা সমগ্গা, অনুব্বতা ধম্মকামা পজাতা [সজাতা (ক.)];

কোলিনিযা সীলৱতী পতিব্বতা, দাৰেসু ৱে সোত্থানং তদাহু.

১৬১. যস্স ৰাজা ভূতপতি [ভূতপতী (সী. স্যা. পী.)] যসস্সী, জানাতি সোচেয্যং পৰক্কমঞ্চ;

অদ্ৱেজ্ঝতা সুহদযং মমন্তি, ৰাজূসু ৱে সোত্থানং তদাহু.

১৬২. অন্নঞ্চ পানঞ্চ দদাতি সদ্ধো, মালঞ্চ গন্ধঞ্চ ৱিলেপনঞ্চ;

পসন্নচিত্তো অনুমোদমানো, সগ্গেসু ৱে সোত্থানং তদাহু.

১৬৩. যমৰিযধম্মেন পুনন্তি ৱুদ্ধা, আৰাধিতা সমচৰিযায সন্তো;

বহুস্সুতা ইসযো সীলৱন্তো, অৰহন্তমজ্ঝে সোত্থানং তদাহু.

১৬৪. এতানি খো সোত্থানানি লোকে, ৱিঞ্ঞুপ্পসত্থানি সুখুদ্ৰযানি [সুখিন্দ্ৰিযানি (পী.)];

তানীধ সেৱেথ নৰো সপঞ্ঞো, ন হি মঙ্গলে কিঞ্চনমত্থি সচ্চন্তি.

মহামঙ্গলজাতকং পন্নৰসমং.