৪৪৭. মহাধম্মপালজাতকং (৯)

৯২. কিং তে ৱতং কিং পন ব্ৰহ্মচৰিযং, কিস্স সুচিণ্ণস্স অযং ৱিপাকো;

অক্খাহি মে ব্ৰাহ্মণ এতমত্থং, কস্মা নু তুম্হং দহৰা ন মিয্যৰে [মীযৰে (সী. পী.)].

৯৩. ধম্মং চৰাম ন মুসা ভণাম, পাপানি কম্মানি পৰিৱজ্জযাম [ৱিৱজ্জযাম (সী. স্যা. পী.)];

অনৰিযং পৰিৱজ্জেমু সব্বং, তস্মা হি অম্হং দহৰা ন মিয্যৰে.

৯৪. সুণোম ধম্মং অসতং সতঞ্চ, ন চাপি ধম্মং অসতং ৰোচযাম;

হিত্ৱা অসন্তে ন জহাম সন্তে, তস্মা হি অম্হং দহৰা ন মিয্যৰে.

৯৫. পুব্বেৱ দানা সুমনা ভৱাম, দদম্পি ৱে অত্তমনা ভৱাম;

দত্ৱাপি ৱে নানুতপ্পাম পচ্ছা, তস্মা হি অম্হং দহৰা ন মিয্যৰে.

৯৬. সমণে মযং ব্ৰাহ্মণে অদ্ধিকে চ, ৱনিব্বকে যাচনকে দলিদ্দে;

অন্নেন পানেন অভিতপ্পযাম, তস্মা হি অম্হং দহৰা ন মিয্যৰে.

৯৭. মযঞ্চ ভৰিযং নাতিক্কমাম, অম্হে চ ভৰিযা নাতিক্কমন্তি;

অঞ্ঞত্ৰ তাহি ব্ৰহ্মচৰিযং চৰাম, তস্মা হি অম্হং দহৰা ন মিয্যৰে.

৯৮. পাণাতিপাতা ৱিৰমাম সব্বে, লোকে অদিন্নং পৰিৱজ্জযাম;

অমজ্জপা নোপি মুসা ভণাম, তস্মা হি অম্হং দহৰা ন মিয্যৰে.

৯৯. এতাসু ৱে জাযৰে সুত্তমাসু, মেধাৱিনো হোন্তি পহূতপঞ্ঞা;

বহুস্সুতা ৱেদগুনো [ৱেদগুণা (স্যা. ক.)] চ হোন্তি, তস্মা হি অম্হং দহৰা ন মিয্যৰে.

১০০. মাতা পিতা চ [মাতা চ পিতা (ক.), মাতাপিতৰা (স্যা.)] ভগিনী ভাতৰো চ, পুত্তা চ দাৰা চ মযঞ্চ সব্বে;

ধম্মং চৰাম পৰলোকহেতু, তস্মা হি অম্হং দহৰা ন মিয্যৰে.

১০১. দাসা চ দাস্যো [দাস্সো (সী. পী.), দাসী (স্যা.)] অনুজীৱিনো চ, পৰিচাৰকা কম্মকৰা চ সব্বে;

ধম্মং চৰন্তি পৰলোকহেতু, তস্মা হি অম্হং দহৰা ন মিয্যৰে.

১০২. ধম্মো হৱে ৰক্খতি ধম্মচাৰিং, ধম্মো সুচিণ্ণো সুখমাৱহাতি;

এসানিসংসো ধম্মে সুচিণ্ণে, ন দুগ্গতিং গচ্ছতি ধম্মচাৰী.

১০৩. ধম্মো হৱে ৰক্খতি ধম্মচাৰিং, ছত্তং মহন্তং ৱিয ৱস্সকালে;

ধম্মেন গুত্তো মম ধম্মপালো, অঞ্ঞস্স অট্ঠীনি সুখী কুমাৰোতি.

মহাধম্মপালজাতকং নৱমং.