৪৪৮. কুক্কুটজাতকং (১০)

১০৪. নাস্মসে কতপাপম্হি, নাস্মসে অলিকৱাদিনে;

নাস্মসে অত্তত্থপঞ্ঞম্হি, অতিসন্তেপি নাস্মসে.

১০৫. ভৱন্তি হেকে পুৰিসা, গোপিপাসিকজাতিকা [গোপিপাসকজাতিকা (সী. স্যা. পী.)];

ঘসন্তি মঞ্ঞে মিত্তানি, ৱাচায ন চ কম্মুনা.

১০৬. সুক্খঞ্জলিপগ্গহিতা, ৱাচায পলিগুণ্ঠিতা;

মনুস্সফেগ্গূ নাসীদে, যস্মিং নত্থি কতঞ্ঞুতা.

১০৭. ন হি অঞ্ঞঞ্ঞচিত্তানং, ইত্থীনং পুৰিসান ৱা;

নানাৱিকত্ৱা [নানাৱ কত্ৱা (সী. পী.)] সংসগ্গং, তাদিসম্পি চ নাস্মসে [তাদিসম্পি ন ৱিস্সসে (স্যা.)].

১০৮. অনৰিযকম্মমোক্কন্তং, অথেতং [অত্থেতং (সী. স্যা. পী.)] সব্বঘাতিনং;

নিসিতংৱ পটিচ্ছন্নং, তাদিসম্পি চ নাস্মসে.

১০৯. মিত্তৰূপেনিধেকচ্চে, সাখল্যেন অচেতসা;

ৱিৱিধেহি উপাযন্তি, তাদিসম্পি চ নাস্মসে.

১১০. আমিসং ৱা ধনং ৱাপি, যত্থ পস্সতি তাদিসো;

দুব্ভিং কৰোতি দুম্মেধো, তঞ্চ হন্ত্ৱান [ঝাত্ৱান (সী. পী.), হিত্ৱান (স্যা.)] গচ্ছতি.

১১১. মিত্তৰূপেন বহৱো, ছন্না সেৱন্তি সত্তৱো;

জহে কাপুৰিসে হেতে, কুক্কুটো ৱিয সেনকং.

১১২. যো চ [যোধ (জা. ১.৮.২৫ সুলসাজাতকে)] উপ্পতিতং অত্থং, ন খিপ্পমনুবুজ্ঝতি;

অমিত্তৱসমন্ৱেতি, পচ্ছা চ অনুতপ্পতি.

১১৩. যো চ উপ্পতিতং অত্থং, খিপ্পমেৱ নিবোধতি;

মুচ্চতে সত্তুসম্বাধা, কুক্কুটো ৱিয সেনকা;

১১৪. তং তাদিসং কূটমিৱোড্ডিতং ৱনে, অধম্মিকং নিচ্চৱিধংসকাৰিনং;

আৰা ৱিৱজ্জেয্য নৰো ৱিচক্খণো, সেনং যথা কুক্কুটো ৱংসকাননেতি.

কুক্কুটজাতকং দসমং.