৪৪৬. তক্কলজাতকং (৮)

৮২. ন তক্কলা সন্তি ন আলুৱানি [আলুপানি (সী. স্যা. পী.)], ন বিড়ালিযো ন কড়ম্বানি তাত;

একো অৰঞ্ঞম্হি সুসানমজ্ঝে, কিমত্থিকো তাত খণাসি কাসুং.

৮৩. পিতামহো তাত সুদুব্বলো তে, অনেকব্যাধীহি দুখেন ফুট্ঠো;

তমজ্জহং নিখণিস্সামি সোব্ভে, ন হিস্স তং জীৱিতং ৰোচযামি.

৮৪. সঙ্কপ্পমেতং পটিলদ্ধ পাপকং, অচ্চাহিতং কম্ম কৰোসি লুদ্দং;

মযাপি তাত পটিলচ্ছসে তুৱং, এতাদিসং কম্ম জৰূপনীতো;

তং কুল্লৱত্তং অনুৱত্তমানো, অহম্পি তং নিখণিস্সামি সোব্ভে.

৮৫. ফৰুসাহি ৱাচাহি পকুব্বমানো, আসজ্জ মং ত্ৱং ৱদসে কুমাৰ;

পুত্তো মমং ওৰসকো সমানো, অহিতানুকম্পী মম ত্ৱংসি পুত্ত.

৮৬. ন তাহং [ত্যাহং (স্যা.)] তাত অহিতানুকম্পী, হিতানুকম্পী তে অহম্পি [অহঞ্হি (স্যা.)] তাত;

পাপঞ্চ তং কম্ম পকুব্বমানং, অৰহামি নো ৱাৰযিতুং ততো.

৮৭. যো মাতৰং ৱা পিতৰং সৱিট্ঠ [মাতৰং পিতৰং ৱা ৱসিট্ঠ (সী. পী.)], অদূসকে হিংসতি পাপধম্মো;

কাযস্স ভেদা অভিসম্পৰাযং, অসংসযং সো নিৰযং উপেতি [পৰেতি (সী. পী.)].

৮৮. যো মাতৰং ৱা পিতৰং সৱিট্ঠ, অন্নেন পানেন উপট্ঠহাতি;

কাযস্স ভেদা অভিসম্পৰাযং, অসংসযং সো সুগতিং উপেতি.

৮৯. ন মে ত্ৱং পুত্ত অহিতানুকম্পী, হিতানুকম্পী মে [মম (?)] ত্ৱংসি পুত্ত;

অহঞ্চ তং মাতৰা ৱুচ্চমানো, এতাদিসং কম্ম কৰোমি লুদ্দং.

৯০. যা তে সা ভৰিযা অনৰিযৰূপা, মাতা মমেসা সকিযা জনেত্তি;

নিদ্ধাপযে [নিদ্ধামসে (পী.)] তঞ্চ সকা অগাৰা, অঞ্ঞম্পি তে সা দুখমাৱহেয্য.

৯১. যা তে সা ভৰিযা অনৰিযৰূপা, মাতা মমেসা সকিযা জনেত্তি;

দন্তা কৰেণূৱ ৱসূপনীতা, সা পাপধম্মা পুনৰাৱজাতূতি.

তক্কলজাতকং অট্ঠমং.