৪৪০. কণ্হজাতকং (২)

১১. কণ্হো ৱতাযং পুৰিসো, কণ্হং ভুঞ্জতি ভোজনং;

কণ্হে ভূমিপদেসস্মিং, ন ময্হং মনসো পিযো.

১২. ন কণ্হো তচসা হোতি, অন্তোসাৰো হি ব্ৰাহ্মণো;

যস্মিং পাপানি কম্মানি, স ৱে কণ্হো সুজম্পতি.

১৩. এতস্মিং তে সুলপিতে, পতিৰূপে সুভাসিতে;

ৱৰং ব্ৰাহ্মণ তে দম্মি, যং কিঞ্চি মনসিচ্ছসি.

১৪. ৱৰঞ্চে মে অদো সক্ক, সব্বভূতানমিস্সৰ;

সুনিক্কোধং সুনিদ্দোসং, নিল্লোভং ৱুত্তিমত্তনো;

নিস্নেহমভিকঙ্খামি, এতে মে চতুৰো ৱৰে.

১৫. কিং নু কোধে ৱা [কোধেৱ (সী. পী.)] দোসে ৱা, লোভে স্নেহে চ ব্ৰাহ্মণ;

আদীনৱং ত্ৱং পস্সসি [সম্পস্সসি (সী. পী.)], তং মে অক্খাহি পুচ্ছিতো.

১৬. অপ্পো হুত্ৱা বহু হোতি, ৱড্ঢতে সো অখন্তিজো;

আসঙ্গী বহুপাযাসো, তস্মা কোধং ন ৰোচযে.

১৭. দুট্ঠস্স ফৰুসা [পঠমা (পী. সী. নিয্য)] ৱাচা, পৰামাসো অনন্তৰা;

ততো পাণি ততো দণ্ডো, সত্থস্স পৰমা গতি [পৰামসতি (ক.)];

দোসো কোধসমুট্ঠানো, তস্মা দোসং ন ৰোচযে.

১৮. আলোপসাহসাকাৰা [সহসাকাৰা (সী. স্যা. পী.)], নিকতী ৱঞ্চনানি চ;

দিস্সন্তি লোভধম্মেসু, তস্মা লোভং ন ৰোচযে.

১৯. স্নেহসঙ্গথিতা [সঙ্গধিতা (ক.), সঙ্গন্তিতা (স্যা.)] গন্থা, সেন্তি মনোমযা পুথূ;

তে ভুসং উপতাপেন্তি, তস্মা স্নেহং ন ৰোচযে.

২০. এতস্মিং তে সুলপিতে, পতিৰূপে সুভাসিতে;

ৱৰং ব্ৰাহ্মণ তে দম্মি, যং কিঞ্চি মনসিচ্ছসি.

২১. ৱৰঞ্চে মে অদো সক্ক, সব্বভূতানমিস্সৰ;

অৰঞ্ঞে মে ৱিহৰতো, নিচ্চং একৱিহাৰিনো;

আবাধা মা [ন (স্যা. পী.)] উপ্পজ্জেয্যুং, অন্তৰাযকৰা ভুসা.

২২. এতস্মিং তে সুলপিতে, পতিৰূপে সুভাসিতে;

ৱৰং ব্ৰাহ্মণ তে দম্মি, যং কিঞ্চি মনসিচ্ছসি.

২৩. ৱৰঞ্চে মে অদো সক্ক, সব্বভূতানমিস্সৰ;

ন মনো ৱা সৰীৰং ৱা, মং-কতে সক্ক কস্সচি;

কদাচি উপহঞ্ঞেথ, এতং সক্ক ৱৰং ৱৰেতি.

কণ্হজাতকং দুতিযং.