৪৪১. চতুপোসথিযজাতকং (৩)

২৪. যো কোপনেয্যে ন কৰোতি কোপং, ন কুজ্ঝতি সপ্পুৰিসো কদাচি;

কুদ্ধোপি সো নাৱিকৰোতি কোপং, তং ৱে নৰং সমণমাহু [সমণং আহু (সী.)] লোকে.

২৫. ঊনূদৰো যো সহতে জিঘচ্ছং, দন্তো তপস্সী মিতপানভোজনো;

আহাৰহেতু ন কৰোতি পাপং, তং ৱে নৰং সমণমাহু লোকে.

২৬. খিড্ডং ৰতিং ৱিপ্পজহিত্ৱান সব্বং, ন চালিকং ভাসসি কিঞ্চি লোকে;

ৱিভূসট্ঠানা ৱিৰতো মেথুনস্মা, তং ৱে নৰং সমণমাহু লোকে.

২৭. পৰিগ্গহং লোভধম্মঞ্চ সব্বং, যো ৱে পৰিঞ্ঞায পৰিচ্চজেতি;

দন্তং ঠিতত্তং অমমং নিৰাসং, তং ৱে নৰং সমণমাহু লোকে.

২৮. পুচ্ছাম কত্তাৰমনোমপঞ্ঞং [মনোমপঞ্ঞ (স্যা. ক.)], কথাসু নো ৱিগ্গহো অত্থি জাতো;

ছিন্দজ্জ কঙ্খং ৱিচিকিচ্ছিতানি, তদজ্জ [তযাজ্জ (সী.)] কঙ্খং ৱিতৰেমু সব্বে.

২৯. যে পণ্ডিতা অত্থদসা ভৱন্তি, ভাসন্তি তে যোনিসো তত্থ কালে;

কথং নু কথানং অভাসিতানং, অত্থং নযেয্যুং কুসলা জনিন্দা.

৩০. কথং হৱে ভাসতি নাগৰাজা, গৰুড়ো পন ৱেনতেয্যো কিমাহ;

গন্ধব্বৰাজা পন কিং ৱদেসি, কথং পন কুৰূনং ৰাজসেট্ঠো.

৩১. খন্তিং হৱে ভাসতি নাগৰাজা, অপ্পাহাৰং গৰুড়ো ৱেনতেয্যো;

গন্ধব্বৰাজা ৰতিৱিপ্পহানং, অকিঞ্চনং কুৰূনং ৰাজসেট্ঠো.

৩২. সব্বানি এতানি সুভাসিতানি, ন হেত্থ দুব্ভাসিতমত্থি কিঞ্চি;

যস্মিঞ্চ এতানি পতিট্ঠিতানি, অৰাৱ নাভ্যা সুসমোহিতানি;

চতুব্ভি ধম্মেহি সমঙ্গিভূতং, তং ৱে নৰং সমণমাহু লোকে.

৩৩. তুৱঞ্হি [তুৱং নু (সী. পী.)] সেট্ঠো ত্ৱমনুত্তৰোসি, ত্ৱং ধম্মগূ ধম্মৱিদূ সুমেধো;

পঞ্ঞায পঞ্হং সমধিগ্গহেত্ৱা, অচ্ছেচ্ছি ধীৰো ৱিচিকিচ্ছিতানি;

অচ্ছেচ্ছি কঙ্খং ৱিচিকিচ্ছিতানি, চুন্দো যথা নাগদন্তং খৰেন.

৩৪. নীলুপ্পলাভং ৱিমলং অনগ্ঘং, ৱত্থং ইদং ধূমসমানৱণ্ণং;

পঞ্হস্স ৱেয্যাকৰণেন তুট্ঠো, দদামি তে ধম্মপূজায ধীৰ.

৩৫. সুৱণ্ণমালং সতপত্তফুল্লিতং, সকেসৰং ৰত্নসহস্সমণ্ডিতং;

পঞ্হস্স ৱেয্যাকৰণেন তুট্ঠো, দদামি তে ধম্মপূজায ধীৰ.

৩৬. মণিং অনগ্ঘং ৰুচিৰং পভস্সৰং, কণ্ঠাৱসত্তং [ৱসিতং (ক.)] মণিভূসিতং মে;

পঞ্হস্স ৱেয্যাকৰণেন তুট্ঠো, দদামি তে ধম্মপূজায ধীৰ.

৩৭. গৱং সহস্সং উসভঞ্চ নাগং, আজঞ্ঞযুত্তে চ ৰথে দস ইমে;

পঞ্হস্স ৱেয্যাকৰণেন তুট্ঠো, দদামি তে গামৱৰানি সোড়স.

৩৮. সাৰিপুত্তো তদা নাগো, সুপণ্ণো পন কোলিতো;

গন্ধব্বৰাজা অনুৰুদ্ধো, ৰাজা আনন্দ পণ্ডিতো;

ৱিধুৰো বোধিসত্তো চ, এৱং ধাৰেথ জাতকন্তি.

চতুপোসথিযজাতকং ততিযং.