৮. অন্ধকৰণসুত্তং

৮৭. ৱুত্তঞ্হেতং ভগৱতা, ৱুত্তমৰহতাতি মে সুতং –

‘‘তযোমে, ভিক্খৱে, অকুসলৱিতক্কা অন্ধকৰণা অচক্খুকৰণা অঞ্ঞাণকৰণা পঞ্ঞানিৰোধিকা ৱিঘাতপক্খিকা অনিব্বানসংৱত্তনিকা. কতমে তযো? কামৱিতক্কো, ভিক্খৱে, অন্ধকৰণো অচক্খুকৰণো অঞ্ঞাণকৰণো পঞ্ঞানিৰোধিকো ৱিঘাতপক্খিকো অনিব্বানসংৱত্তনিকো. ব্যাপাদৱিতক্কো, ভিক্খৱে, অন্ধকৰণো অচক্খুকৰণো অঞ্ঞাণকৰণো পঞ্ঞানিৰোধিকো ৱিঘাতপক্খিকো অনিব্বানসংৱত্তনিকো. ৱিহিংসাৱিতক্কো, ভিক্খৱে, অন্ধকৰণো অচক্খুকৰণো অঞ্ঞাণকৰণো পঞ্ঞানিৰোধিকো ৱিঘাতপক্খিকো অনিব্বানসংৱত্তনিকো. ইমে খো, ভিক্খৱে, তযো অকুসলৱিতক্কা অন্ধকৰণা অচক্খুকৰণা অঞ্ঞাণকৰণা পঞ্ঞানিৰোধিকা ৱিঘাতপক্খিকা অনিব্বানসংৱত্তনিকা.

‘‘তযোমে, ভিক্খৱে, কুসলৱিতক্কা অনন্ধকৰণা চক্খুকৰণা ঞাণকৰণা পঞ্ঞাৱুদ্ধিকা অৱিঘাতপক্খিকা নিব্বানসংৱত্তনিকা. কতমে তযো? নেক্খম্মৱিতক্কো, ভিক্খৱে, অনন্ধকৰণো চক্খুকৰণো ঞাণকৰণো পঞ্ঞাৱুদ্ধিকো অৱিঘাতপক্খিকো নিব্বানসংৱত্তনিকো. অব্যাপাদৱিতক্কো, ভিক্খৱে, অনন্ধকৰণো চক্খুকৰণো ঞাণকৰণো পঞ্ঞাৱুদ্ধিকো অৱিঘাতপক্খিকো নিব্বানসংৱত্তনিকো. অৱিহিংসাৱিতক্কো, ভিক্খৱে, অনন্ধকৰণো চক্খুকৰণো ঞাণকৰণো পঞ্ঞাৱুদ্ধিকো অৱিঘাতপক্খিকো নিব্বানসংৱত্তনিকো. ইমে খো, ভিক্খৱে, তযো কুসলৱিতক্কা অনন্ধকৰণা চক্খুকৰণা ঞাণকৰণা পঞ্ঞাৱুদ্ধিকা অৱিঘাতপক্খিকা নিব্বানসংৱত্তনিকা’’তি. এতমত্থং ভগৱা অৱোচ. তত্থেতং ইতি ৱুচ্চতি –

‘‘তযো ৱিতক্কে কুসলে ৱিতক্কযে, তযো পন অকুসলে নিৰাকৰে;

স ৱে ৱিতক্কানি ৱিচাৰিতানি, সমেতি ৱুট্ঠীৱ ৰজং সমূহতং;

স ৱে ৱিতক্কূপসমেন চেতসা, ইধেৱ সো সন্তিপদং সমজ্ঝগা’’তি.

অযম্পি অত্থো ৱুত্তো ভগৱতা, ইতি মে সুতন্তি. অট্ঠমং.