৯. পাপৱগ্গো

১১৬. অভিত্থৰেথ কল্যাণে, পাপা চিত্তং নিৱাৰযে;

দন্ধঞ্হি কৰোতো পুঞ্ঞং, পাপস্মিং ৰমতী মনো.

১১৭. পাপঞ্চে পুৰিসো কযিৰা, ন নং [ন তং (সী. পী.)] কযিৰা পুনপ্পুনং;

ন তম্হি ছন্দং কযিৰাথ, দুক্খো পাপস্স উচ্চযো.

১১৮. পুঞ্ঞঞ্চে পুৰিসো কযিৰা, কযিৰা নং [কযিৰাথেতং (সী. স্যা.), কযিৰাথেনং (পী.)] পুনপ্পুনং;

তম্হি ছন্দং কযিৰাথ, সুখো পুঞ্ঞস্স উচ্চযো.

১১৯. পাপোপি পস্সতি ভদ্ৰং, যাৱ পাপং ন পচ্চতি;

যদা চ পচ্চতি পাপং, অথ পাপো পাপানি [অথ পাপানি (?)] পস্সতি.

১২০. ভদ্ৰোপি পস্সতি পাপং, যাৱ ভদ্ৰং ন পচ্চতি;

যদা চ পচ্চতি ভদ্ৰং, অথ ভদ্ৰো ভদ্ৰানি [অথ ভদ্ৰানি (?)] পস্সতি.

১২১. মাৱমঞ্ঞেথ [মাপ্পমঞ্ঞেথ (সী. স্যা. পী.)] পাপস্স, ন মন্তং [ন মং তং (সী. পী.), ন মত্তং (স্যা.)] আগমিস্সতি;

উদবিন্দুনিপাতেন, উদকুম্ভোপি পূৰতি;

বালো পূৰতি [পূৰতি বালো (সী. ক.), আপূৰতি বালো (স্যা.)] পাপস্স, থোকং থোকম্পি [থোক থোকম্পি (সী. পী.)] আচিনং.

১২২. মাৱমঞ্ঞেথ পুঞ্ঞস্স, ন মন্তং আগমিস্সতি;

উদবিন্দুনিপাতেন, উদকুম্ভোপি পূৰতি;

ধীৰো পূৰতি পুঞ্ঞস্স, থোকং থোকম্পি আচিনং.

১২৩. ৱাণিজোৱ ভযং মগ্গং, অপ্পসত্থো মহদ্ধনো;

ৱিসং জীৱিতুকামোৱ, পাপানি পৰিৱজ্জযে.

১২৪. পাণিম্হি চে ৱণো নাস্স, হৰেয্য পাণিনা ৱিসং;

নাব্বণং ৱিসমন্ৱেতি, নত্থি পাপং অকুব্বতো.

১২৫. যো অপ্পদুট্ঠস্স নৰস্স দুস্সতি, সুদ্ধস্স পোসস্স অনঙ্গণস্স;

তমেৱ বালং পচ্চেতি পাপং, সুখুমো ৰজো পটিৱাতংৱ খিত্তো.

১২৬. গব্ভমেকে উপ্পজ্জন্তি, নিৰযং পাপকম্মিনো;

সগ্গং সুগতিনো যন্তি, পৰিনিব্বন্তি অনাসৱা.

১২৭. ন অন্তলিক্খে ন সমুদ্দমজ্ঝে, ন পব্বতানং ৱিৱৰং পৱিস্স [পৱিসং (স্যা.)];

ন ৱিজ্জতী [ন ৱিজ্জতি (ক. সী. পী. ক.)] সো জগতিপ্পদেসো, যত্থট্ঠিতো [যত্ৰট্ঠিতো (স্যা.)] মুচ্চেয্য পাপকম্মা.

১২৮. ন অন্তলিক্খে ন সমুদ্দমজ্ঝে, ন পব্বতানং ৱিৱৰং পৱিস্স;

ন ৱিজ্জতী সো জগতিপ্পদেসো, যত্থট্ঠিতং [যত্ৰট্ঠিতং (স্যা.)] নপ্পসহেয্য মচ্চু.

পাপৱগ্গো নৱমো নিট্ঠিতো.