১০. দণ্ডৱগ্গো

১২৯. সব্বে তসন্তি দণ্ডস্স, সব্বে ভাযন্তি মচ্চুনো;

অত্তানং উপমং কত্ৱা, ন হনেয্য ন ঘাতযে.

১৩০. সব্বে তসন্তি দণ্ডস্স, সব্বেসং জীৱিতং পিযং;

অত্তানং উপমং কত্ৱা, ন হনেয্য ন ঘাতযে.

১৩১. সুখকামানি ভূতানি, যো দণ্ডেন ৱিহিংসতি;

অত্তনো সুখমেসানো, পেচ্চ সো ন লভতে সুখং.

১৩২. সুখকামানি ভূতানি, যো দণ্ডেন ন হিংসতি;

অত্তনো সুখমেসানো, পেচ্চ সো লভতে সুখং.

১৩৩. মাৱোচ ফৰুসং কঞ্চি, ৱুত্তা পটিৱদেয্যু তং [পটিৱদেয্যুং তং (ক.)];

দুক্খা হি সাৰম্ভকথা, পটিদণ্ডা ফুসেয্যু তং [ফুসেয্যুং তং (ক.)].

১৩৪. সচে নেৰেসি অত্তানং, কংসো উপহতো যথা;

এস পত্তোসি নিব্বানং, সাৰম্ভো তে ন ৱিজ্জতি.

১৩৫. যথা দণ্ডেন গোপালো, গাৱো পাজেতি গোচৰং;

এৱং জৰা চ মচ্চু চ, আযুং পাজেন্তি পাণিনং.

১৩৬. অথ পাপানি কম্মানি, কৰং বালো ন বুজ্ঝতি;

সেহি কম্মেহি দুম্মেধো, অগ্গিদড্ঢোৱ তপ্পতি.

১৩৭. যো দণ্ডেন অদণ্ডেসু, অপ্পদুট্ঠেসু দুস্সতি;

দসন্নমঞ্ঞতৰং ঠানং, খিপ্পমেৱ নিগচ্ছতি.

১৩৮. ৱেদনং ফৰুসং জানিং, সৰীৰস্স চ ভেদনং [সৰীৰস্স পভেদনং (স্যা.)];

গৰুকং ৱাপি আবাধং, চিত্তক্খেপঞ্চ [চিত্তক্খেপং ৱ (সী. স্যা. পী.)] পাপুণে.

১৩৯. ৰাজতো ৱা উপসগ্গং [উপস্সগ্গং (সী. পী.)], অব্ভক্খানঞ্চ [অব্ভক্খানং ৱ (সী. পী.)] দাৰুণং;

পৰিক্খযঞ্চ [পৰিক্খযং ৱ (সী. স্যা. পী.)] ঞাতীনং, ভোগানঞ্চ [ভোগানং ৱ (সী. স্যা. পী.)] পভঙ্গুৰং [পভঙ্গুনং (ক.)].

১৪০. অথ ৱাস্স অগাৰানি, অগ্গি ডহতি [ডয্হতি (ক.)] পাৱকো;

কাযস্স ভেদা দুপ্পঞ্ঞো, নিৰযং সোপপজ্জতি [সো উপপজ্জতি (সী. স্যা.)].

১৪১. ন নগ্গচৰিযা ন জটা ন পঙ্কা, নানাসকা থণ্ডিলসাযিকা ৱা;

ৰজোজল্লং উক্কুটিকপ্পধানং, সোধেন্তি মচ্চং অৱিতিণ্ণকঙ্খং.

১৪২. অলঙ্কতো চেপি সমং চৰেয্য, সন্তো দন্তো নিযতো ব্ৰহ্মচাৰী;

সব্বেসু ভূতেসু নিধায দণ্ডং, সো ব্ৰাহ্মণো সো সমণো স ভিক্খু.

১৪৩. হিৰীনিসেধো পুৰিসো, কোচি লোকস্মি ৱিজ্জতি;

যো নিদ্দং [নিন্দং (সী. পী.) সং. নি. ১.১৮] অপবোধেতি [অপবোধতি (সী. স্যা. পী.)], অস্সো ভদ্ৰো কসামিৱ.

১৪৪. অস্সো যথা ভদ্ৰো কসানিৱিট্ঠো, আতাপিনো সংৱেগিনো ভৱাথ;

সদ্ধায সীলেন চ ৱীৰিযেন চ, সমাধিনা ধম্মৱিনিচ্ছযেন চ;

সম্পন্নৱিজ্জাচৰণা পতিস্সতা, জহিস্সথ [পহস্সথ (সী. স্যা. পী.)] দুক্খমিদং অনপ্পকং.

১৪৫. উদকঞ্হি নযন্তি নেত্তিকা, উসুকাৰা নমযন্তি তেজনং;

দাৰুং নমযন্তি তচ্ছকা, অত্তানং দমযন্তি সুব্বতা.

দণ্ডৱগ্গো দসমো নিট্ঠিতো.