১১. জৰাৱগ্গো

১৪৬. কো নু হাসো [কিন্নু হাসো (ক.)] কিমানন্দো, নিচ্চং পজ্জলিতে সতি;

অন্ধকাৰেন ওনদ্ধা, পদীপং ন গৱেসথ.

১৪৭. পস্স চিত্তকতং বিম্বং, অৰুকাযং সমুস্সিতং;

আতুৰং বহুসঙ্কপ্পং, যস্স নত্থি ধুৱং ঠিতি.

১৪৮. পৰিজিণ্ণমিদং ৰূপং, ৰোগনীড়ং [ৰোগনিড্ঢং (সী. পী.), ৰোগনিদ্ধং (স্যা.)] পভঙ্গুৰং;

ভিজ্জতি পূতিসন্দেহো, মৰণন্তঞ্হি জীৱিতং.

১৪৯. যানিমানি অপত্থানি [যানিমানি অপত্থানি (সী. স্যা. পী.), যানিমানি’পৱিদ্ধানি (?)], অলাবূনেৱ [অলাপূনেৱ (সী. স্যা. পী.)] সাৰদে;

কাপোতকানি অট্ঠীনি, তানি দিস্ৱান কা ৰতি.

১৫০. অট্ঠীনং নগৰং কতং, মংসলোহিতলেপনং;

যত্থ জৰা চ মচ্চু চ, মানো মক্খো চ ওহিতো.

১৫১. জীৰন্তি ৱে ৰাজৰথা সুচিত্তা, অথো সৰীৰম্পি জৰং উপেতি;

সতঞ্চ ধম্মো ন জৰং উপেতি, সন্তো হৱে সব্ভি পৱেদযন্তি.

১৫২. অপ্পস্সুতাযং পুৰিসো, বলিবদ্ধোৱ [বলিৱদ্দোৱ (সী. স্যা. পী.)] জীৰতি;

মংসানি তস্স ৱড্ঢন্তি, পঞ্ঞা তস্স ন ৱড্ঢতি.

১৫৩. অনেকজাতিসংসাৰং, সন্ধাৱিস্সং অনিব্বিসং;

গহকাৰং [গহকাৰকং (সী. স্যা. পী.)] গৱেসন্তো, দুক্খা জাতি পুনপ্পুনং.

১৫৪. গহকাৰক দিট্ঠোসি, পুন গেহং ন কাহসি;

সব্বা তে ফাসুকা ভগ্গা, গহকূটং ৱিসঙ্খতং;

ৱিসঙ্খাৰগতং চিত্তং, তণ্হানং খযমজ্ঝগা.

১৫৫. অচৰিত্ৱা ব্ৰহ্মচৰিযং, অলদ্ধা যোব্বনে ধনং;

জিণ্ণকোঞ্চাৱ ঝাযন্তি, খীণমচ্ছেৱ পল্ললে.

১৫৬. অচৰিত্ৱা ব্ৰহ্মচৰিযং, অলদ্ধা যোব্বনে ধনং;

সেন্তি চাপাতিখীণাৱ, পুৰাণানি অনুত্থুনং.

জৰাৱগ্গো একাদসমো নিট্ঠিতো.