৬. পণ্ডিতৱগ্গো

৭৬. নিধীনংৱ পৱত্তাৰং, যং পস্সে ৱজ্জদস্সিনং;

নিগ্গয্হৱাদিং মেধাৱিং, তাদিসং পণ্ডিতং ভজে;

তাদিসং ভজমানস্স, সেয্যো হোতি ন পাপিযো.

৭৭. ওৱদেয্যানুসাসেয্য, অসব্ভা চ নিৱাৰযে;

সতঞ্হি সো পিযো হোতি, অসতং হোতি অপ্পিযো.

৭৮. ন ভজে পাপকে মিত্তে, ন ভজে পুৰিসাধমে;

ভজেথ মিত্তে কল্যাণে, ভজেথ পুৰিসুত্তমে.

৭৯. ধম্মপীতি সুখং সেতি, ৱিপ্পসন্নেন চেতসা;

অৰিযপ্পৱেদিতে ধম্মে, সদা ৰমতি পণ্ডিতো.

৮০. উদকঞ্হি নযন্তি নেত্তিকা, উসুকাৰা নমযন্তি [দমযন্তি (ক.)] তেজনং;

দাৰুং নমযন্তি তচ্ছকা, অত্তানং দমযন্তি পণ্ডিতা.

৮১. সেলো যথা একঘনো [একগ্ঘনো (ক.)], ৱাতেন ন সমীৰতি;

এৱং নিন্দাপসংসাসু, ন সমিঞ্জন্তি পণ্ডিতা.

৮২. যথাপি ৰহদো গম্ভীৰো, ৱিপ্পসন্নো অনাৱিলো;

এৱং ধম্মানি সুত্ৱান, ৱিপ্পসীদন্তি পণ্ডিতা.

৮৩. সব্বত্থ ৱে সপ্পুৰিসা চজন্তি, ন কামকামা লপযন্তি সন্তো;

সুখেন ফুট্ঠা অথ ৱা দুখেন, ন উচ্চাৱচং [নোচ্চাৱচং (সী. অট্ঠ.)] পণ্ডিতা দস্সযন্তি.

৮৪. ন অত্তহেতু ন পৰস্স হেতু, ন পুত্তমিচ্ছে ন ধনং ন ৰট্ঠং;

ন ইচ্ছেয্য [নযিচ্ছে (পী.), নিচ্ছে (?)] অধম্মেন সমিদ্ধিমত্তনো, স সীলৱা পঞ্ঞৱা ধম্মিকো সিযা.

৮৫. অপ্পকা তে মনুস্সেসু, যে জনা পাৰগামিনো;

অথাযং ইতৰা পজা, তীৰমেৱানুধাৱতি.

৮৬. যে চ খো সম্মদক্খাতে, ধম্মে ধম্মানুৱত্তিনো;

তে জনা পাৰমেস্সন্তি, মচ্চুধেয্যং সুদুত্তৰং.

৮৭. কণ্হং ধম্মং ৱিপ্পহায, সুক্কং ভাৱেথ পণ্ডিতো;

ওকা অনোকমাগম্ম, ৱিৱেকে যত্থ দূৰমং.

৮৮. তত্ৰাভিৰতিমিচ্ছেয্য, হিত্ৱা কামে অকিঞ্চনো;

পৰিযোদপেয্য [পৰিযোদাপেয্য (?)] অত্তানং, চিত্তক্লেসেহি পণ্ডিতো.

৮৯. যেসং সম্বোধিযঙ্গেসু, সম্মা চিত্তং সুভাৱিতং;

আদানপটিনিস্সগ্গে, অনুপাদায যে ৰতা;

খীণাসৱা জুতিমন্তো, তে লোকে পৰিনিব্বুতা.

পণ্ডিতৱগ্গো ছট্ঠো নিট্ঠিতো.