৭. অৰহন্তৱগ্গো

৯০. গতদ্ধিনো ৱিসোকস্স, ৱিপ্পমুত্তস্স সব্বধি;

সব্বগন্থপ্পহীনস্স, পৰিড়াহো ন ৱিজ্জতি.

৯১. উয্যুঞ্জন্তি সতীমন্তো, ন নিকেতে ৰমন্তি তে;

হংসাৱ পল্ললং হিত্ৱা, ওকমোকং জহন্তি তে.

৯২. যেসং সন্নিচযো নত্থি, যে পৰিঞ্ঞাতভোজনা;

সুঞ্ঞতো অনিমিত্তো চ, ৱিমোক্খো যেসং গোচৰো;

আকাসে ৱ সকুন্তানং [সকুণানং (ক.)], গতি তেসং দুৰন্নযা.

৯৩. যস্সাসৱা পৰিক্খীণা, আহাৰে চ অনিস্সিতো;

সুঞ্ঞতো অনিমিত্তো চ, ৱিমোক্খো যস্স গোচৰো;

আকাসে ৱ সকুন্তানং, পদং তস্স দুৰন্নযং.

৯৪. যস্সিন্দ্ৰিযানি সমথঙ্গতানি [সমথং গতানি (সী. পী.)], অস্সা যথা সাৰথিনা সুদন্তা;

পহীনমানস্স অনাসৱস্স, দেৱাপি তস্স পিহযন্তি তাদিনো.

৯৫. পথৱিসমো নো ৱিৰুজ্ঝতি, ইন্দখিলুপমো [ইন্দখীলূপমো (সী. স্যা. ক.)] তাদি সুব্বতো;

ৰহদোৱ অপেতকদ্দমো, সংসাৰা ন ভৱন্তি তাদিনো.

৯৬. সন্তং তস্স মনং হোতি, সন্তা ৱাচা চ কম্ম চ;

সম্মদঞ্ঞা ৱিমুত্তস্স, উপসন্তস্স তাদিনো.

৯৭. অস্সদ্ধো অকতঞ্ঞূ চ, সন্ধিচ্ছেদো চ যো নৰো;

হতাৱকাসো ৱন্তাসো, স ৱে উত্তমপোৰিসো.

৯৮. গামে ৱা যদি ৱাৰঞ্ঞে, নিন্নে ৱা যদি ৱা থলে;

যত্থ অৰহন্তো ৱিহৰন্তি, তং ভূমিৰামণেয্যকং.

৯৯. ৰমণীযানি অৰঞ্ঞানি, যত্থ ন ৰমতী জনো;

ৱীতৰাগা ৰমিস্সন্তি, ন তে কামগৱেসিনো.

অৰহন্তৱগ্গো সত্তমো নিট্ঠিতো.