৫. বালৱগ্গো

৬০. দীঘা জাগৰতো ৰত্তি, দীঘং সন্তস্স যোজনং;

দীঘো বালানং সংসাৰো, সদ্ধম্মং অৱিজানতং.

৬১. চৰঞ্চে নাধিগচ্ছেয্য, সেয্যং সদিসমত্তনো;

একচৰিযং [একচৰিযং (ক.)] দড়্হং কযিৰা, নত্থি বালে সহাযতা.

৬২. পুত্তা মত্থি ধনম্মত্থি [পুত্তমত্থি ধনমত্থি (ক.)], ইতি বালো ৱিহঞ্ঞতি;

অত্তা হি [অত্তাপি (?)] অত্তনো নত্থি, কুতো পুত্তা কুতো ধনং.

৬৩. যো বালো মঞ্ঞতি বাল্যং, পণ্ডিতো ৱাপি তেন সো;

বালো চ পণ্ডিতমানী, স ৱে ‘‘বালো’’তি ৱুচ্চতি.

৬৪. যাৱজীৱম্পি চে বালো, পণ্ডিতং পযিৰুপাসতি;

ন সো ধম্মং ৱিজানাতি, দব্বী সূপৰসং যথা.

৬৫. মুহুত্তমপি চে ৱিঞ্ঞূ, পণ্ডিতং পযিৰুপাসতি;

খিপ্পং ধম্মং ৱিজানাতি, জিৱ্হা সূপৰসং যথা.

৬৬. চৰন্তি বালা দুম্মেধা, অমিত্তেনেৱ অত্তনা;

কৰোন্তা পাপকং কম্মং, যং হোতি কটুকপ্ফলং.

৬৭. ন তং কম্মং কতং সাধু, যং কত্ৱা অনুতপ্পতি;

যস্স অস্সুমুখো ৰোদং, ৱিপাকং পটিসেৱতি.

৬৮. তঞ্চ কম্মং কতং সাধু, যং কত্ৱা নানুতপ্পতি;

যস্স পতীতো সুমনো, ৱিপাকং পটিসেৱতি.

৬৯. মধুৱা [মধুং ৱা (দী. নি. টীকা ১)] মঞ্ঞতি বালো, যাৱ পাপং ন পচ্চতি;

যদা চ পচ্চতি পাপং, বালো [অথ বালো (সী. স্যা.) অথ (?)] দুক্খং নিগচ্ছতি.

৭০. মাসে মাসে কুসগ্গেন, বালো ভুঞ্জেয্য ভোজনং;

ন সো সঙ্খাতধম্মানং [সঙ্খতধম্মানং (সী. পী. ক.)], কলং অগ্ঘতি সোড়সিং.

৭১. ন হি পাপং কতং কম্মং, সজ্জু খীৰংৱ মুচ্চতি;

ডহন্তং বালমন্ৱেতি, ভস্মচ্ছন্নোৱ [ভস্মাছন্নোৱ (সী. পী. ক.)] পাৱকো.

৭২. যাৱদেৱ অনত্থায, ঞত্তং [ঞাতং (?)] বালস্স জাযতি;

হন্তি বালস্স সুক্কংসং, মুদ্ধমস্স ৱিপাতযং.

৭৩. অসন্তং ভাৱনমিচ্ছেয্য [অসন্তং ভাৱমিচ্ছেয্য (স্যা.), অসন্তভাৱনমিচ্ছেয্য (ক.)], পুৰেক্খাৰঞ্চ ভিক্খুসু;

আৱাসেসু চ ইস্সৰিযং, পূজা পৰকুলেসু চ.

৭৪. মমেৱ কত মঞ্ঞন্তু, গিহীপব্বজিতা উভো;

মমেৱাতিৱসা অস্সু, কিচ্চাকিচ্চেসু কিস্মিচি;

ইতি বালস্স সঙ্কপ্পো, ইচ্ছা মানো চ ৱড্ঢতি.

৭৫. অঞ্ঞা হি লাভূপনিসা, অঞ্ঞা নিব্বানগামিনী;

এৱমেতং অভিঞ্ঞায, ভিক্খু বুদ্ধস্স সাৱকো;

সক্কাৰং নাভিনন্দেয্য, ৱিৱেকমনুব্ৰূহযে.

বালৱগ্গো পঞ্চমো নিট্ঠিতো.