২৩. নাগৱগ্গো

৩২০. অহং নাগোৱ সঙ্গামে, চাপতো পতিতং সৰং;

অতিৱাক্যং তিতিক্খিস্সং, দুস্সীলো হি বহুজ্জনো.

৩২১. দন্তং নযন্তি সমিতিং, দন্তং ৰাজাভিৰূহতি;

দন্তো সেট্ঠো মনুস্সেসু, যোতিৱাক্যং তিতিক্খতি.

৩২২. ৱৰমস্সতৰা দন্তা, আজানীযা চ [আজানীযাৱ (স্যা.)] সিন্ধৱা;

কুঞ্জৰা চ [কুঞ্জৰাৱ (স্যা.)] মহানাগা, অত্তদন্তো ততো ৱৰং.

৩২৩. ন হি এতেহি যানেহি, গচ্ছেয্য অগতং দিসং;

যথাত্তনা সুদন্তেন, দন্তো দন্তেন গচ্ছতি.

৩২৪. ধনপালো [ধনপালকো (সী. স্যা. কং. পী.)] নাম কুঞ্জৰো, কটুকভেদনো [কটুকপ্পভেদনো (সী. স্যা. পী.)] দুন্নিৱাৰযো;

বদ্ধো কবড়ং ন ভুঞ্জতি, সুমৰতি [সুসৰতি (ক.)] নাগৱনস্স কুঞ্জৰো.

৩২৫. মিদ্ধী যদা হোতি মহগ্ঘসো চ, নিদ্দাযিতা সম্পৰিৱত্তসাযী;

মহাৱৰাহোৱ নিৱাপপুট্ঠো, পুনপ্পুনং গব্ভমুপেতি মন্দো.

৩২৬. ইদং পুৰে চিত্তমচাৰি চাৰিকং, যেনিচ্ছকং যত্থকামং যথাসুখং;

তদজ্জহং নিগ্গহেস্সামি যোনিসো, হত্থিপ্পভিন্নং ৱিয অঙ্কুসগ্গহো.

৩২৭. অপ্পমাদৰতা হোথ, সচিত্তমনুৰক্খথ;

দুগ্গা উদ্ধৰথত্তানং, পঙ্কে সন্নোৱ [সত্তোৱ (সী. পী.)] কুঞ্জৰো.

৩২৮. সচে লভেথ নিপকং সহাযং, সদ্ধিং চৰং সাধুৱিহাৰিধীৰং;

অভিভুয্য সব্বানি পৰিস্সযানি, চৰেয্য তেনত্তমনো সতীমা.

৩২৯. নো চে লভেথ নিপকং সহাযং, সদ্ধিং চৰং সাধুৱিহাৰিধীৰং;

ৰাজাৱ ৰট্ঠং ৱিজিতং পহায, একো চৰে মাতঙ্গৰঞ্ঞেৱ নাগো.

৩৩০. একস্স চৰিতং সেয্যো, নত্থি বালে সহাযতা;

একো চৰে ন চ পাপানি কযিৰা, অপ্পোস্সুক্কো মাতঙ্গৰঞ্ঞেৱ নাগো.

৩৩১. অত্থম্হি জাতম্হি সুখা সহাযা, তুট্ঠী সুখা যা ইতৰীতৰেন;

পুঞ্ঞং সুখং জীৱিতসঙ্খযম্হি, সব্বস্স দুক্খস্স সুখং পহানং.

৩৩২. সুখা মত্তেয্যতা লোকে, অথো পেত্তেয্যতা সুখা;

সুখা সামঞ্ঞতা লোকে, অথো ব্ৰহ্মঞ্ঞতা সুখা.

৩৩৩. সুখং যাৱ জৰা সীলং, সুখা সদ্ধা পতিট্ঠিতা;

সুখো পঞ্ঞায পটিলাভো, পাপানং অকৰণং সুখং.

নাগৱগ্গো তেৱীসতিমো নিট্ঠিতো.