২৪. তণ্হাৱগ্গো

৩৩৪. মনুজস্স পমত্তচাৰিনো, তণ্হা ৱড্ঢতি মালুৱা ৱিয;

সো প্লৱতী [প্লৱতি (সী. পী.), পলৱেতী (ক.), উপ্লৱতি (?)] হুৰা হুৰং, ফলমিচ্ছংৱ ৱনস্মি ৱানৰো.

৩৩৫. যং এসা সহতে জম্মী, তণ্হা লোকে ৱিসত্তিকা;

সোকা তস্স পৱড্ঢন্তি, অভিৱট্ঠংৱ [অভিৱড্ঢংৱ (স্যা.), অভিৱট্টংৱ (পী.), অভিৱুড্ঢংৱ (ক.)] বীৰণং.

৩৩৬. যো চেতং সহতে জম্মিং, তণ্হং লোকে দুৰচ্চযং;

সোকা তম্হা পপতন্তি, উদবিন্দুৱ পোক্খৰা.

৩৩৭. তং ৱো ৱদামি ভদ্দং ৱো, যাৱন্তেত্থ সমাগতা;

তণ্হায মূলং খণথ, উসীৰত্থোৱ বীৰণং;

মা ৱো নড়ংৱ সোতোৱ, মাৰো ভঞ্জি পুনপ্পুনং.

৩৩৮. যথাপি মূলে অনুপদ্দৱে দড়্হে, ছিন্নোপি ৰুক্খো পুনৰেৱ ৰূহতি;

এৱম্পি তণ্হানুসযে অনূহতে, নিব্বত্ততী দুক্খমিদং পুনপ্পুনং.

৩৩৯. যস্স ছত্তিংসতি সোতা, মনাপসৱনা ভুসা;

মাহা [ৱাহা (সী. স্যা. পী.)] ৱহন্তি দুদ্দিট্ঠিং, সঙ্কপ্পা ৰাগনিস্সিতা.

৩৪০. সৱন্তি সব্বধি সোতা, লতা উপ্পজ্জ [উব্ভিজ্জ (সী. স্যা. কং. পী.)] তিট্ঠতি;

তঞ্চ দিস্ৱা লতং জাতং, মূলং পঞ্ঞায ছিন্দথ.

৩৪১. সৰিতানি সিনেহিতানি চ, সোমনস্সানি ভৱন্তি জন্তুনো;

তে সাতসিতা সুখেসিনো, তে ৱে জাতিজৰূপগা নৰা.

৩৪২. তসিণায পুৰক্খতা পজা, পৰিসপ্পন্তি সসোৱ বন্ধিতো [বাধিতো (বহূসু)];

সংযোজনসঙ্গসত্তকা, দুক্খমুপেন্তি পুনপ্পুনং চিৰায.

৩৪৩. তসিণায পুৰক্খতা পজা, পৰিসপ্পন্তি সসোৱ বন্ধিতো;

তস্মা তসিণং ৱিনোদযে, আকঙ্খন্ত [ভিক্খূ আকঙ্খী (সী.), ভিক্খু আকঙ্খং (স্যা.)] ৱিৰাগমত্তনো.

৩৪৪. যো নিব্বনথো ৱনাধিমুত্তো, ৱনমুত্তো ৱনমেৱ ধাৱতি;

তং পুগ্গলমেথ পস্সথ, মুত্তো বন্ধনমেৱ ধাৱতি.

৩৪৫. ন তং দড়্হং বন্ধনমাহু ধীৰা, যদাযসং দাৰুজপব্বজঞ্চ [দাৰূজং বব্বজঞ্চ (সী. পী.)];

সাৰত্তৰত্তা মণিকুণ্ডলেসু, পুত্তেসু দাৰেসু চ যা অপেক্খা.

৩৪৬. এতং দড়্হং বন্ধনমাহু ধীৰা, ওহাৰিনং সিথিলং দুপ্পমুঞ্চং;

এতম্পি ছেত্ৱান পৰিব্বজন্তি, অনপেক্খিনো কামসুখং পহায.

৩৪৭. যে ৰাগৰত্তানুপতন্তি সোতং, সযংকতং মক্কটকোৱ জালং;

এতম্পি ছেত্ৱান ৱজন্তি ধীৰা, অনপেক্খিনো সব্বদুক্খং পহায.

৩৪৮. মুঞ্চ পুৰে মুঞ্চ পচ্ছতো, মজ্ঝে মুঞ্চ ভৱস্স পাৰগূ;

সব্বত্থ ৱিমুত্তমানসো, ন পুনং জাতিজৰং উপেহিসি.

৩৪৯. ৱিতক্কমথিতস্স জন্তুনো, তিব্বৰাগস্স সুভানুপস্সিনো;

ভিয্যো তণ্হা পৱড্ঢতি, এস খো দড়্হং [এস গাড়্হং (ক.)] কৰোতি বন্ধনং.

৩৫০. ৱিতক্কূপসমে চ [ৱিতক্কূপসমেৱ (ক.)] যো ৰতো, অসুভং ভাৱযতে সদা সতো;

এস [এসো (?)] খো ব্যন্তি কাহিতি, এস [এসো (?)] ছেচ্ছতি মাৰবন্ধনং.

৩৫১. নিট্ঠঙ্গতো অসন্তাসী, ৱীততণ্হো অনঙ্গণো;

অচ্ছিন্দি ভৱসল্লানি, অন্তিমোযং সমুস্সযো.

৩৫২. ৱীততণ্হো অনাদানো, নিৰুত্তিপদকোৱিদো;

অক্খৰানং সন্নিপাতং, জঞ্ঞা পুব্বাপৰানি চ;

স ৱে ‘‘অন্তিমসাৰীৰো, মহাপঞ্ঞো মহাপুৰিসো’’তি ৱুচ্চতি.

৩৫৩. সব্বাভিভূ সব্বৱিদূহমস্মি, সব্বেসু ধম্মেসু অনূপলিত্তো;

সব্বঞ্জহো তণ্হক্খযে ৱিমুত্তো, সযং অভিঞ্ঞায কমুদ্দিসেয্যং.

৩৫৪. সব্বদানং ধম্মদানং জিনাতি, সব্বৰসং ধম্মৰসো জিনাতি;

সব্বৰতিং ধম্মৰতি জিনাতি, তণ্হক্খযো সব্বদুক্খং জিনাতি.

৩৫৫. হনন্তি ভোগা দুম্মেধং, নো চ পাৰগৱেসিনো;

ভোগতণ্হায দুম্মেধো, হন্তি অঞ্ঞেৱ অত্তনং.

৩৫৬. তিণদোসানি খেত্তানি, ৰাগদোসা অযং পজা;

তস্মা হি ৱীতৰাগেসু, দিন্নং হোতি মহপ্ফলং.

৩৫৭. তিণদোসানি খেত্তানি, দোসদোসা অযং পজা;

তস্মা হি ৱীতদোসেসু, দিন্নং হোতি মহপ্ফলং.

৩৫৮. তিণদোসানি খেত্তানি, মোহদোসা অযং পজা;

তস্মা হি ৱীতমোহেসু, দিন্নং হোতি মহপ্ফলং.

৩৫৯. (তিণদোসানি খেত্তানি, ইচ্ছাদোসা অযং পজা;

তস্মা হি ৱিগতিচ্ছেসু, দিন্নং হোতি মহপ্ফলং.) [( ) ৱিদেসপোত্থকেসু নত্থি, অট্ঠকথাযম্পি ন দিস্সতি]

তিণদোসানি খেত্তানি, তণ্হাদোসা অযং পজা;

তস্মা হি ৱীততণ্হেসু, দিন্নং হোতি মহপ্ফলং.

তণ্হাৱগ্গো চতুৱীসতিমো নিট্ঠিতো.