২২. নিৰযৱগ্গো

৩০৬. অভূতৱাদী নিৰযং উপেতি, যো ৱাপি [যো চাপি (সী. পী. ক.)] কত্ৱা ন কৰোমি চাহ [ন কৰোমীতি চাহ (স্যা.)];

উভোপি তে পেচ্চ সমা ভৱন্তি, নিহীনকম্মা মনুজা পৰত্থ.

৩০৭. কাসাৱকণ্ঠা বহৱো, পাপধম্মা অসঞ্ঞতা;

পাপা পাপেহি কম্মেহি, নিৰযং তে উপপজ্জৰে.

৩০৮. সেয্যো অযোগুড়ো ভুত্তো, তত্তো অগ্গিসিখূপমো;

যঞ্চে ভুঞ্জেয্য দুস্সীলো, ৰট্ঠপিণ্ডমসঞ্ঞতো.

৩০৯. চত্তাৰি ঠানানি নৰো পমত্তো, আপজ্জতি পৰদাৰূপসেৱী;

অপুঞ্ঞলাভং ন নিকামসেয্যং, নিন্দং ততীযং নিৰযং চতুত্থং.

৩১০. অপুঞ্ঞলাভো চ গতী চ পাপিকা, ভীতস্স ভীতায ৰতী চ থোকিকা;

ৰাজা চ দণ্ডং গৰুকং পণেতি, তস্মা নৰো পৰদাৰং ন সেৱে.

৩১১. কুসো যথা দুগ্গহিতো, হত্থমেৱানুকন্ততি;

সামঞ্ঞং দুপ্পৰামট্ঠং, নিৰযাযুপকড্ঢতি.

৩১২. যং কিঞ্চি সিথিলং কম্মং, সংকিলিট্ঠঞ্চ যং ৱতং;

সঙ্কস্সৰং ব্ৰহ্মচৰিযং, ন তং হোতি মহপ্ফলং.

৩১৩. কযিৰা চে কযিৰাথেনং [কযিৰা নং (ক.)], দড়্হমেনং পৰক্কমে;

সিথিলো হি পৰিব্বাজো, ভিয্যো আকিৰতে ৰজং.

৩১৪. অকতং দুক্কটং সেয্যো, পচ্ছা তপ্পতি দুক্কটং;

কতঞ্চ সুকতং সেয্যো, যং কত্ৱা নানুতপ্পতি.

৩১৫. নগৰং যথা পচ্চন্তং, গুত্তং সন্তৰবাহিৰং;

এৱং গোপেথ অত্তানং, খণো ৱো [খণো ৱে (সী. পী. ক.)] মা উপচ্চগা;

খণাতীতা হি সোচন্তি, নিৰযম্হি সমপ্পিতা.

৩১৬. অলজ্জিতাযে লজ্জন্তি, লজ্জিতাযে ন লজ্জৰে;

মিচ্ছাদিট্ঠিসমাদানা, সত্তা গচ্ছন্তি দুগ্গতিং.

৩১৭. অভযে ভযদস্সিনো, ভযে চাভযদস্সিনো;

মিচ্ছাদিট্ঠিসমাদানা, সত্তা গচ্ছন্তি দুগ্গতিং.

৩১৮. অৱজ্জে ৱজ্জমতিনো, ৱজ্জে চাৱজ্জদস্সিনো;

মিচ্ছাদিট্ঠিসমাদানা, সত্তা গচ্ছন্তি দুগ্গতিং.

৩১৯. ৱজ্জঞ্চ ৱজ্জতো ঞত্ৱা, অৱজ্জঞ্চ অৱজ্জতো;

সম্মাদিট্ঠিসমাদানা, সত্তা গচ্ছন্তি সুগ্গতিং.

নিৰযৱগ্গো দ্ৱাৱীসতিমো নিট্ঠিতো.