২১. পকিণ্ণকৱগ্গো

২৯০. মত্তাসুখপৰিচ্চাগা, পস্সে চে ৱিপুলং সুখং;

চজে মত্তাসুখং ধীৰো, সম্পস্সং ৱিপুলং সুখং.

২৯১. পৰদুক্খূপধানেন, অত্তনো [যো অত্তনো (স্যা. পী. ক.)] সুখমিচ্ছতি;

ৱেৰসংসগ্গসংসট্ঠো, ৱেৰা সো ন পৰিমুচ্চতি.

২৯২. যঞ্হি কিচ্চং অপৱিদ্ধং [তদপৱিদ্ধং (সী. স্যা.)], অকিচ্চং পন কযিৰতি;

উন্নড়ানং পমত্তানং, তেসং ৱড্ঢন্তি আসৱা.

২৯৩. যেসঞ্চ সুসমাৰদ্ধা, নিচ্চং কাযগতা সতি;

অকিচ্চং তে ন সেৱন্তি, কিচ্চে সাতচ্চকাৰিনো;

সতানং সম্পজানানং, অত্থং গচ্ছন্তি আসৱা.

২৯৪. মাতৰং পিতৰং হন্ত্ৱা, ৰাজানো দ্ৱে চ খত্তিযে;

ৰট্ঠং সানুচৰং হন্ত্ৱা, অনীঘো যাতি ব্ৰাহ্মণো.

২৯৫. মাতৰং পিতৰং হন্ত্ৱা, ৰাজানো দ্ৱে চ সোত্থিযে;

ৱেযগ্ঘপঞ্চমং হন্ত্ৱা, অনীঘো যাতি ব্ৰাহ্মণো.

২৯৬. সুপ্পবুদ্ধং পবুজ্ঝন্তি, সদা গোতমসাৱকা;

যেসং দিৱা চ ৰত্তো চ, নিচ্চং বুদ্ধগতা সতি.

২৯৭. সুপ্পবুদ্ধং পবুজ্ঝন্তি, সদা গোতমসাৱকা;

যেসং দিৱা চ ৰত্তো চ, নিচ্চং ধম্মগতা সতি.

২৯৮. সুপ্পবুদ্ধং পবুজ্ঝন্তি, সদা গোতমসাৱকা;

যেসং দিৱা চ ৰত্তো চ, নিচ্চং সঙ্ঘগতা সতি.

২৯৯. সুপ্পবুদ্ধং পবুজ্ঝন্তি, সদা গোতমসাৱকা;

যেসং দিৱা চ ৰত্তো চ, নিচ্চং কাযগতা সতি.

৩০০. সুপ্পবুদ্ধং পবুজ্ঝন্তি, সদা গোতমসাৱকা;

যেসং দিৱা চ ৰত্তো চ, অহিংসায ৰতো মনো.

৩০১. সুপ্পবুদ্ধং পবুজ্ঝন্তি, সদা গোতমসাৱকা;

যেসং দিৱা চ ৰত্তো চ, ভাৱনায ৰতো মনো.

৩০২. দুপ্পব্বজ্জং দুৰভিৰমং, দুৰাৱাসা ঘৰা দুখা;

দুক্খোসমানসংৱাসো, দুক্খানুপতিতদ্ধগূ;

তস্মা ন চদ্ধগূ সিযা, ন চ [তস্মা ন চদ্ধগূ ন চ (ক.)] দুক্খানুপতিতো সিযা [দুক্খানুপাতিতো (?)].

৩০৩. সদ্ধো সীলেন সম্পন্নো, যসোভোগসমপ্পিতো;

যং যং পদেসং ভজতি, তত্থ তত্থেৱ পূজিতো.

৩০৪. দূৰে সন্তো পকাসেন্তি, হিমৱন্তোৱ পব্বতো;

অসন্তেত্থ ন দিস্সন্তি, ৰত্তিং খিত্তা যথা সৰা.

৩০৫. একাসনং একসেয্যং, একো চৰমতন্দিতো;

একো দমযমত্তানং, ৱনন্তে ৰমিতো সিযা.

পকিণ্ণকৱগ্গো একৱীসতিমো নিট্ঠিতো.