২০. মগ্গৱগ্গো

২৭৩. মগ্গানট্ঠঙ্গিকো সেট্ঠো, সচ্চানং চতুৰো পদা;

ৱিৰাগো সেট্ঠো ধম্মানং, দ্ৱিপদানঞ্চ চক্খুমা.

২৭৪. এসেৱ [এসোৱ (সী. পী.)] মগ্গো নত্থঞ্ঞো, দস্সনস্স ৱিসুদ্ধিযা;

এতঞ্হি তুম্হে পটিপজ্জথ, মাৰস্সেতং পমোহনং.

২৭৫. এতঞ্হি তুম্হে পটিপন্না, দুক্খস্সন্তং কৰিস্সথ;

অক্খাতো ৱো [অক্খাতো ৱে (সী. পী.)] মযা মগ্গো, অঞ্ঞায সল্লকন্তনং [সল্লসন্থনং (সী. পী.), সল্লসত্থনং (স্যা.)].

২৭৬. তুম্হেহি কিচ্চমাতপ্পং, অক্খাতাৰো তথাগতা;

পটিপন্না পমোক্খন্তি, ঝাযিনো মাৰবন্ধনা.

২৭৭. ‘‘সব্বে সঙ্খাৰা অনিচ্চা’’তি, যদা পঞ্ঞায পস্সতি;

অথ নিব্বিন্দতি দুক্খে, এস মগ্গো ৱিসুদ্ধিযা.

২৭৮. ‘‘সব্বে সঙ্খাৰা দুক্খা’’তি, যদা পঞ্ঞায পস্সতি;

অথ নিব্বিন্দতি দুক্খে, এস মগ্গো ৱিসুদ্ধিযা.

২৭৯. ‘‘সব্বে ধম্মা অনত্তা’’তি, যদা পঞ্ঞায পস্সতি;

অথ নিব্বিন্দতি দুক্খে, এস মগ্গো ৱিসুদ্ধিযা.

২৮০. উট্ঠানকালম্হি অনুট্ঠহানো, যুৱা বলী আলসিযং উপেতো;

সংসন্নসঙ্কপ্পমনো [অসম্পন্নসঙ্কপ্পমনো (ক.)] কুসীতো, পঞ্ঞায মগ্গং অলসো ন ৱিন্দতি.

২৮১. ৱাচানুৰক্খী মনসা সুসংৱুতো, কাযেন চ নাকুসলং কযিৰা [অকুসলং ন কযিৰা (সী. স্যা. কং. পী.)];

এতে তযো কম্মপথে ৱিসোধযে, আৰাধযে মগ্গমিসিপ্পৱেদিতং.

২৮২. যোগা ৱে জাযতী [জাযতে (কত্থচি)] ভূৰি, অযোগা ভূৰিসঙ্খযো;

এতং দ্ৱেধাপথং ঞত্ৱা, ভৱায ৱিভৱায চ;

তথাত্তানং নিৱেসেয্য, যথা ভূৰি পৱড্ঢতি.

২৮৩. ৱনং ছিন্দথ মা ৰুক্খং, ৱনতো জাযতে ভযং;

ছেত্ৱা ৱনঞ্চ ৱনথঞ্চ, নিব্বনা হোথ ভিক্খৱো.

২৮৪. যাৱ হি ৱনথো ন ছিজ্জতি, অণুমত্তোপি নৰস্স নাৰিসু;

পটিবদ্ধমনোৱ [পটিবন্ধমনোৱ (ক.)] তাৱ সো, ৱচ্ছো খীৰপকোৱ [খীৰপানোৱ (পী.)] মাতৰি.

২৮৫. উচ্ছিন্দ সিনেহমত্তনো কুমুদং সাৰদিকংৱ [পাণিনা];

সন্তিমগ্গমেৱ ব্ৰূহয, নিব্বানং সুগতেন দেসিতং.

২৮৬. ইধ ৱস্সং ৱসিস্সামি, ইধ হেমন্তগিম্হিসু;

ইতি বালো ৱিচিন্তেতি, অন্তৰাযং ন বুজ্ঝতি.

২৮৭. তং পুত্তপসুসম্মত্তং, ব্যাসত্তমনসং নৰং;

সুত্তং গামং মহোঘোৱ, মচ্চু আদায গচ্ছতি.

২৮৮. ন সন্তি পুত্তা তাণায, ন পিতা নাপি বন্ধৱা;

অন্তকেনাধিপন্নস্স, নত্থি ঞাতীসু তাণতা.

২৮৯. এতমত্থৱসং ঞত্ৱা, পণ্ডিতো সীলসংৱুতো;

নিব্বানগমনং মগ্গং, খিপ্পমেৱ ৱিসোধযে.

মগ্গৱগ্গো ৱীসতিমো নিট্ঠিতো.