১৯. ধম্মট্ঠৱগ্গো

২৫৬. ন তেন হোতি ধম্মট্ঠো, যেনত্থং সাহসা [সহসা (সী. স্যা. ক.)] নযে;

যো চ অত্থং অনত্থঞ্চ, উভো নিচ্ছেয্য পণ্ডিতো.

২৫৭. অসাহসেন ধম্মেন, সমেন নযতী পৰে;

ধম্মস্স গুত্তো মেধাৱী, ‘‘ধম্মট্ঠো’’তি পৱুচ্চতি.

২৫৮. ন তেন পণ্ডিতো হোতি, যাৱতা বহু ভাসতি;

খেমী অৱেৰী অভযো, ‘‘পণ্ডিতো’’তি পৱুচ্চতি.

২৫৯. ন তাৱতা ধম্মধৰো, যাৱতা বহু ভাসতি;

যো চ অপ্পম্পি সুত্ৱান, ধম্মং কাযেন পস্সতি;

স ৱে ধম্মধৰো হোতি, যো ধম্মং নপ্পমজ্জতি.

২৬০. ন তেন থেৰো সো হোতি [থেৰো হোতি (সী. স্যা.)], যেনস্স পলিতং সিৰো;

পৰিপক্কো ৱযো তস্স, ‘‘মোঘজিণ্ণো’’তি ৱুচ্চতি.

২৬১. যম্হি সচ্চঞ্চ ধম্মো চ, অহিংসা সংযমো দমো;

স ৱে ৱন্তমলো ধীৰো, ‘‘থেৰো’’ ইতি [সো থেৰোতি (স্যা. ক.)] পৱুচ্চতি.

২৬২. ন ৱাক্কৰণমত্তেন, ৱণ্ণপোক্খৰতায ৱা;

সাধুৰূপো নৰো হোতি, ইস্সুকী মচ্ছৰী সঠো.

২৬৩. যস্স চেতং সমুচ্ছিন্নং, মূলঘচ্চং সমূহতং;

স ৱন্তদোসো মেধাৱী, ‘‘সাধুৰূপো’’তি ৱুচ্চতি.

২৬৪. ন মুণ্ডকেন সমণো, অব্বতো অলিকং ভণং;

ইচ্ছালোভসমাপন্নো, সমণো কিং ভৱিস্সতি.

২৬৫. যো চ সমেতি পাপানি, অণুং থূলানি সব্বসো;

সমিতত্তা হি পাপানং, ‘‘সমণো’’তি পৱুচ্চতি.

২৬৬. ন তেন ভিক্খু সো হোতি, যাৱতা ভিক্খতে পৰে;

ৱিস্সং ধম্মং সমাদায, ভিক্খু হোতি ন তাৱতা.

২৬৭. যোধ পুঞ্ঞঞ্চ পাপঞ্চ, বাহেত্ৱা ব্ৰহ্মচৰিযৱা [ব্ৰহ্মচৰিযং (ক.)];

সঙ্খায লোকে চৰতি, স ৱে ‘‘ভিক্খূ’’তি ৱুচ্চতি.

২৬৮. ন মোনেন মুনী হোতি, মূড়্হৰূপো অৱিদ্দসু;

যো চ তুলংৱ পগ্গয্হ, ৱৰমাদায পণ্ডিতো.

২৬৯. পাপানি পৰিৱজ্জেতি, স মুনী তেন সো মুনি;

যো মুনাতি উভো লোকে, ‘‘মুনি’’ তেন পৱুচ্চতি.

২৭০. ন তেন অৰিযো হোতি, যেন পাণানি হিংসতি;

অহিংসা সব্বপাণানং, ‘‘অৰিযো’’তি পৱুচ্চতি.

২৭১. ন সীলব্বতমত্তেন, বাহুসচ্চেন ৱা পন;

অথ ৱা সমাধিলাভেন, ৱিৱিত্তসযনেন ৱা.

২৭২. ফুসামি নেক্খম্মসুখং, অপুথুজ্জনসেৱিতং;

ভিক্খু ৱিস্সাসমাপাদি, অপ্পত্তো আসৱক্খযং.

ধম্মট্ঠৱগ্গো একূনৱীসতিমো নিট্ঠিতো.