১৮. মলৱগ্গো

২৩৫. পণ্ডুপলাসোৱ দানিসি, যমপুৰিসাপি চ তে [তং (সী. স্যা. কং. পী.)] উপট্ঠিতা;

উয্যোগমুখে চ তিট্ঠসি, পাথেয্যম্পি চ তে ন ৱিজ্জতি.

২৩৬. সো কৰোহি দীপমত্তনো, খিপ্পং ৱাযম পণ্ডিতো ভৱ;

নিদ্ধন্তমলো অনঙ্গণো, দিব্বং অৰিযভূমিং উপেহিসি [দিব্বং অৰিযভূমিমেহিসি (সী. স্যা. পী.), দিব্বমৰিযভূমিং উপেহিসি (?)].

২৩৭. উপনীতৱযো চ দানিসি, সম্পযাতোসি যমস্স সন্তিকে;

ৱাসো [ৱাসোপি চ (বহূসু)] তে নত্থি অন্তৰা, পাথেয্যম্পি চ তে ন ৱিজ্জতি.

২৩৮. সো কৰোহি দীপমত্তনো, খিপ্পং ৱাযম পণ্ডিতো ভৱ;

নিদ্ধন্তমলো অনঙ্গণো, ন পুনং জাতিজৰং [ন পুন জাতিজৰং (সী. স্যা.), ন পুন জাতিজ্জৰং (ক.)] উপেহিসি.

২৩৯. অনুপুব্বেন মেধাৱী, থোকং থোকং খণে খণে;

কম্মাৰো ৰজতস্সেৱ, নিদ্ধমে মলমত্তনো.

২৪০. অযসাৱ মলং সমুট্ঠিতং [সমুট্ঠায (ক.)], ততুট্ঠায [তদুট্ঠায (সী. স্যা. পী.)] তমেৱ খাদতি;

এৱং অতিধোনচাৰিনং, সানি কম্মানি [সককম্মানি (সী. পী.)] নযন্তি দুগ্গতিং.

২৪১. অসজ্ঝাযমলা মন্তা, অনুট্ঠানমলা ঘৰা;

মলং ৱণ্ণস্স কোসজ্জং, পমাদো ৰক্খতো মলং.

২৪২. মলিত্থিযা দুচ্চৰিতং, মচ্ছেৰং দদতো মলং;

মলা ৱে পাপকা ধম্মা, অস্মিং লোকে পৰম্হি চ.

২৪৩. ততো মলা মলতৰং, অৱিজ্জা পৰমং মলং;

এতং মলং পহন্ত্ৱান, নিম্মলা হোথ ভিক্খৱো.

২৪৪. সুজীৱং অহিৰিকেন, কাকসূৰেন ধংসিনা;

পক্খন্দিনা পগব্ভেন, সংকিলিট্ঠেন জীৱিতং.

২৪৫. হিৰীমতা চ দুজ্জীৱং, নিচ্চং সুচিগৱেসিনা;

অলীনেনাপ্পগব্ভেন, সুদ্ধাজীৱেন পস্সতা.

২৪৬. যো পাণমতিপাতেতি, মুসাৱাদঞ্চ ভাসতি;

লোকে অদিন্নমাদিযতি, পৰদাৰঞ্চ গচ্ছতি.

২৪৭. সুৰামেৰযপানঞ্চ, যো নৰো অনুযুঞ্জতি;

ইধেৱমেসো লোকস্মিং, মূলং খণতি অত্তনো.

২৪৮. এৱং ভো পুৰিস জানাহি, পাপধম্মা অসঞ্ঞতা;

মা তং লোভো অধম্মো চ, চিৰং দুক্খায ৰন্ধযুং.

২৪৯. দদাতি ৱে যথাসদ্ধং, যথাপসাদনং [যত্থ পসাদনং (কত্থচি)] জনো;

তত্থ যো মঙ্কু ভৱতি [তত্থ চে মংকু যো হোতি (সী.), তত্থ যো মঙ্কুতো হোতি (স্যা.)], পৰেসং পানভোজনে;

ন সো দিৱা ৱা ৰত্তিং ৱা, সমাধিমধিগচ্ছতি.

২৫০. যস্স চেতং সমুচ্ছিন্নং, মূলঘচ্চং [মূলঘচ্ছং (ক.)] সমূহতং;

স ৱে দিৱা ৱা ৰত্তিং ৱা, সমাধিমধিগচ্ছতি.

২৫১. নত্থি ৰাগসমো অগ্গি, নত্থি দোসসমো গহো;

নত্থি মোহসমং জালং, নত্থি তণ্হাসমা নদী.

২৫২. সুদস্সং ৱজ্জমঞ্ঞেসং, অত্তনো পন দুদ্দসং;

পৰেসং হি সো ৱজ্জানি, ওপুনাতি [ওফুনাতি (ক.)] যথা ভুসং;

অত্তনো পন ছাদেতি, কলিংৱ কিতৱা সঠো.

২৫৩. পৰৱজ্জানুপস্সিস্স, নিচ্চং উজ্ঝানসঞ্ঞিনো;

আসৱা তস্স ৱড্ঢন্তি, আৰা সো আসৱক্খযা.

২৫৪. আকাসেৱ পদং নত্থি, সমণো নত্থি বাহিৰে;

পপঞ্চাভিৰতা পজা, নিপ্পপঞ্চা তথাগতা.

২৫৫. আকাসেৱ পদং নত্থি, সমণো নত্থি বাহিৰে;

সঙ্খাৰা সস্সতা নত্থি, নত্থি বুদ্ধানমিঞ্জিতং.

মলৱগ্গো অট্ঠাৰসমো নিট্ঠিতো.